Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺DWoort dat ghesciedt is tot Ieremiam van den Heere seggende.

+ A

2

Staet in die poorte van des Heeren huys, ende preect daer dit woort ende segt. Hoort des Heeren woort gheheel Iuda, die door dese poorten ingaet om den Heere te aenbidden

3

Dit seyt die Heere der heyrscaren die Godt van Israhel. Maect v weghen ende v naersticheden goet, ende ick sal by v lieden woonen in dese plaetse.

4

En wilt niet betrouwen in die woorden der loghenen seggende. Des Heeren tempel, des Heeren tempel, des Heeren tempel ist,

5

Want eest dat ghy v weghen wel bescict, ende v naersticheden, eest dat ghy recht doet tusschen den man ende sijnen naesten,

6

ende dat ghy den aencomelinc ende die weese ende der weduwen gheen bedrieghelijck onrecht en doet, ende dat ghy oock gheen onnoosel bloet en stort in dese plaetse, ⁺ende dat ghy nae gheen vreemde goden en wandelt ten quade voor v seluen,

+ B

7

soo sal ick met v lieden woonen in dese plaetse, int lant dat ick uwen vaderen ghegheuen hebbe van die eewicheyt ende tot in die eewicheyt.

8

Siet ghy hebt v betrouwen in die loghentalen, die v niet baten en sullen,

9

stelen, dooden, ouerspel doen, valschelijc sweren Baalim vochtighe offerande doen, ende gaen na vreemde goden die ghy niet en kent.

10

Ende ghy sijt ghecomen ende hebt ghestaen voor my in dit huys, int welcke mijnen naem aengeroepen is, ende ghi hebt gheseyt. Wij sijn verlost om dat wij alle dese affgrijselijcheden ghedaen hebben.

11

Is dan dit huys een speluncke der moordenaren gheworden, daer mijnen naem aengeroepen is, in v lieder ooghen? Ick ick bent, ick hebt ghesien, seyt die Heere.

12

⁺Gaet tot mijn plaetse in Silo, daer mijnen naem ghewoont heeft van tbeghinsel, ende besiet wat ick dier ghedaen hebbe, om die quaetheyt mijns volcs Israel.

+ C

13

Ende nv want ghy allen dese dinghen ghedaen hebt, seydt die Heere, ende ick tot v ghesproken hebbe smorghens opstaende, ende sprekende, ende ghy en hebbes niet ghehoort, ende ick heb v lieden gheroepen, ende ghy en hebt niet gheantwoort.

14

Soo sal ick desen huyse doen daer in mijnen naem aengheroepen is, ende daer ghy betrouwen in hebt, ende der plaetsen die ick v ghegheuen hebbe, ende uwen vaderen, ghelijck ick Silo ghedaen hebbe.

15

Ende ick sal v verworpen van mijn aensicht, ghelijc ic alle uwe broeders verworpen hebbe, alle tgheheel saet van Ephraim.

16

Daerom en wilt ghy niet bidden voor dit volck, ⁺noch en neemt voor hen gheenen lof ende ghebedt aen, ende en wederstaet my niet, want ick en sal v niet verhooren.

+ D

17

En siet ghy niet wat dese doen in die steden van Iuda, ende in die straten van Ierusalem?

18

Die kinderen vergaderen thout, ende die vaders ontsteken tvier, ende die vrouwen beslaen het vet des inghewants, om vlaeyen te maken der coninghinnen des hemels, ende dat si souden vochtighen offer doen den vreemden goden, ende my tot gramscap verwecken.

19

Verwecken sij my tot gramscappen seyt die Heere? en doen sij dit hen seluen niet tot bescaemtheyt haers aensichts?

20

Daerom dit seyt die Heere Godt? Siet mijn rasende gramschap ende mijn verbolghentheyt wort tsamen ghegoten op dese plaetse, op die mannen, ende op dit vee, ende op die boomen des lants, ende op die vruchten der eerden, ⁺ende tsal ontsteken worden, ende ten sal niet wtghebluscht worden.

+ E

21

Dit seyt die Heere der heyrscaren, die God van Israel. Doet v brantofferanden tot uwen slachofferanden ende eedt vleesch,

22

want ic en heb niet gesproken met uwen vaderen, ende ic en heb hen niet beuolen inden dach doen icse leydde wten lande van Egipten, van dwoort der brantofferanden ende slachofferanden,

23

maer dit woort heb ick hen beuolen segghende. Hoort mijn stemme ende ick sal v lieden een Godt sijn, ende ghy sult my een volck sijn, ende wandelt in alle den wech, die ick v lieden beuolen hebbe, op dat v wel sij.

24

Ende si en hebbens niet ghehoort, noch si en hebben hen ooren niet geneycht, maer si sijn wech ghegaen in het wellusticheden, ende in die quaetheyt van hen quaet herte, ende sij sijn ghecomen achterwaerts ende niet voortwaerts

25

vanden dag dat hen vaders wtgegaen sijn wten lande van Egipten, tot op desen dach toe. ⁺Ende ick heb tot v lieden ghesonden alle mijn dienaers die propheten des daechs, des smorgens vroech opstaende, ende sendende.

+ F

26

Ende sij en hebben my niet ghehoort, noch si en hebben hen ooren niet geneycht, maer si hebben haren nec verhart, ende hebben arger gedaen, dan hen vaderen.

27

Ende ghy sult tot hen spreken allen dese woorden, ende sij en sullen v niet antwoorden.

28

Ende ghy sult tot hen segghen. Dits het volc dat die stemme des Heeren sijns Godts niet ghehoort en heeft, noch gheen onderwijsinghe ontfanghen en heeft. Tghelooue is vergaen, ende tis wechghenomen van haerlieder mont.

29

Scheert het hair ws hoofts, ende worpet wech, ende neemt int rechte een claghelijcke weeninghe, want die Heere heeft verworpen ende verlaten die gheslachten, van sijnder rasender gramscappen,

30

want die kinderen van Iuda hebben quaet ghedaen in mijn ooghen, seyt die Heere. Sij hebben hen verarghernissen ghesteldt int huys, daer mijnen naem aengheroepen is, om dat sij dat besmetten souden,

31

⁺ende sij hebben opghetimmert die hoochden van Topheth, welck is in die valleye des soons van Ennom, om dat sij verbranden souden hen sonen, ende hen dochteren metten viere, dat ick niet gheboden en hebbe, noch ghedacht in mijn herte.

+ G

32

Daerom siet die daghen comen, seydt die Heere, ende daer en sal niet meer gheseyt worden Topheth, ende die valleye des soons Ennom, maer die valleye der doodinghen, ende sij sullen begrauen in Topheth om datter gheen plaetse en is.

33

Ende die doode lichamen dees volcks sullen wesen tot een spijse den voghelen des hemels, ende den beesten der eerden, ende daer en sal niemant wesen diese affiaghe.

34

Ende ick sal doen rusten van die steden van Iuda, ende van die straten van Iherusalem die stemme der blijscappen, ende die stemme der vrolijcheyt, die stemme des brudegoms, ende die stemme der bruyt, want dlant sal in een verwoestinghe wesen.