Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺VVort versterct ghy kinderen van Beniamin, int midden van Ierusalem, ende in thecua maect gheluyt metten trompette, ende ouer Bethacaren richt op die baniere, want daer is quaet ghesien van den noorden, ende een groote vernielinghe.

+ A

2

Ick heb die dochter van Sion geleken by een schoone ende weeldige vrouwe.

3

Tot haer sullen die herders comen met haren cudden, si hebben in haer die tenten geslagen al rontsomme een ieghelijc sal die weyden die onder sijn hant sijn.

4

Heylicht ouer haer eenen strijt, staet te samen op, ende laet ons opclimmen inden middach, Wee ons want den dach is affgeweken, want die scaduwen zijn langher gheworden tsauonts.

5

Staetop ende laet ons opclimmen inden nacht, ende laet ons haer huysen verderuen,

6

want dit seyt die Heere die God der heyrscaren. Houwet haer boomen af, ende maect omtrent haer eenen wal, dit is die stadt der besoeckighen alle onrecht is int midden van haer.

7

⁺Ghelijc eenen put zijn water cout maect, also heeft sij haer quaetheyt cout gemaect, ongerechticheyt, ende verderffenisse sal in haer ghehoort worden, voor mi is altijt siecte ende plaghe,

+ B

8

Wert onderwesen Iherusalem dat by auontueren mijn ziele van v niet en gae, dat ic v by auontureren niet verwoest en make, een onbewoonlijc lant.

9

Dit seyt die Heere der heyrscaren. Sij sullen die bleuelinghen van Israel vergaderen tot eenen druyf toe, soomen inden wijngaert doet, keert v hant omme als een wijnsnijder totten corf.

10

Wien sal ic aenspreken? ende wien sal ic betuyghen, dat hijt hoore? Siet hen ooren sijn ombesneden, ende si en moghen niet hooren. Siet des Heeren woort is hen gheworden tot eenen spot, ende si en sullens niet ontfanghen.

11

⁺Daerom ben ic vol van des Heeren verbolghentheden, ic heb ghearbeyt verdraghende, stortet wt opt cleyn kint buyten, ende op die vergaderinge der ionghelinghen tsamen, want die vrouwe sal metten man gheuanghen worden, die oude man metten ghenen die vol van daghen is.

+ C

12

Ende hen huysen sullen ouergaen tot andere, hen ackers ende huysvrouwen te samen, want ick sal mijn hant wtstrecken op die bewoonders des lants, seyt die Heere,

13

want voorwaer vanden minsten totten meesten, soo zijn si alle naerstelijc becommert met ghiericheyt, ende vanden propheet totten priester toe doen si allegader bedroch.

14

Ende si genasen mijns volcs quetsuere met versmaetheyt seggende. Vrede, vrede ende ten was gheenen vrede.

15

⁺Sij zijn bescaemt gheweest, want si hebben affgrijselijcheyt ghedaen. Iae waerlijcker si en sijn niet bescaemt gheweest met bescaemthede, ende si en hebben hen niet connen ghescamen. Daerom sullen si vallen tusschen die ghene die vallen, inden tijt van hen versoeckinghe sullen sij vallen, seyt die Heere.

+ D

16

Dit seyt die Heere. Staet op die weghen ende besiet, ende vraecht nae die oude weghen, welc den goeden wech is, ende wandelt in dien, ende ghy sult vercoelinge vinden voor uwe zielen. Ende si hebben gheseyt. Wij en sullender niet in wandelen.

17

Ende ic hebbe ouer v lieden gestelt wachters, hoort der trompetten gheluyt, ende si hebben gheseyt, wij en sullens niet hooren.

18

⁺Daerom hoort ghi Heydenen, ende bekennet ghi vergaderinge, hoe groote dingen dat ic hen doen sal,

+ E

19

Hoort ghi eerde. Siet ic sal quade dinghen brenghen op dit volc, die vrucht van sijnen ghedachten. Om dat sij mijn woorden niet ghehoort en hebben, ende mijn wet verworpen hebben.

20

Waertoe brenght ghy my wieroock van Saba, ende den welriekende calamus van verren lande? v brantofferen en sijn niet ghenaem, ende v slachofferanden en hebben my niet behaecht.

21

Daerom dit seydt die Heere. Siet ick sal in dit volck vallinghen gheuen, ende onder hen sullen vallen die vaders ende die kinderen tsamen, die naghebuer ende naeste, ende sij sullen vergaen.

22

Dit seydt die Heere. Siet daer coemt een volc vant noorden lant, ende een groot volc sal tsamen opstaen van die eynden der eerden.

23

⁺Den scicht ende schilt salt aennemen, het is wreet, ende ten sal niet sparen, zijn stemme sal als die zee gheluyt gheuen, ende sij sullen op peerden climmen bereydt als een man ten strijde teghen v ghy dochter van Sion.

+ F

24

Wij hebben sijn gherucht ghehoort, ons handen sijn on-

[p. *595]

machtich gheworden, tribulacie heeft ons beuanghen pijnen als eender barender vrouwen.

25

En wilt niet wtgaen tot die velden, ende en wandelt inden wech niet, want het sweert des viants is den grouwel int ronde.

26

⁺Mijns volcs dochter omgort v met een hairen cleedt, ende bespraeydt v met asschen, den rouwe van eenen eenighen sone maect voor v een bitter ghescrey, want haestelijc sal die verderuer op ons comen.

+ G

27

Ick heb v een vroem proeuer onder mijnen volc ghemaect, ende ghy sult weten ende proeuen haren wech

28

Alle dese princen sijn affwijckende onghetrouwelijc wandelende, het metael, ende yser zijn heel verdoruen,

29

den blaesbalck faelgeerde, dloot is int vier heel verteert, die smeltere heeftse te vergheefs ghesmolten, want hen quaetheden en zijn niet verteert gheweest.

30

Noemtse verworpen siluer, want die Heere heeftse verworpen.