Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺GAet al omme die weghen van Iherusalem, ende aensiet, ende merct, ende soect in haer straten oft ghy eenen man vint die ordeel doet, ende tghelooue soect, ende ick sal sijns ghenadich zijn,

+ A

2

maer al ist oock dat sij segghen. Die Heere leuet, dat sullen sij valschelijck sweren.

3

Heere v ooghen aensien tghelooue, ghy hebtse gheslaghen ende sij en hebben gheen wee ghehadt, ghy hebtse verdruct, ende sij en hebben gheen onderwijsinghe willen ontfanghen, si hebben hen aensichten harder ghemaect dan eenen steen, ende sij en hebben niet willen wederkeeren.

4

Maer ic heb gheseyt. Sij sijn by auontueren arm oft dwaes, niet wetende den wech des Heeren, haers Gods ordeel.

5

Daerom sal ick tot hen edelmannen gaen, ende tot hen spreken, want sij hebben des Heeren wech ghekent, haers Gods ordeel, ende siet dese hebben noch meer het iock te samen ghebroken, ⁺die banden in stucken ghetrocken,

+ B

6

daerom heeftse den leeuw wten bosch gheslaghen, den wolf heeftse aenden auont verwoest Die lupaert wakende op hen steden, alle die daerwt coemt, sal gheuanghen worden, want hen ouertredinghen sijn vermenichfuldicht, hen affkeeringhen zijn versterct gheweest,

7

waer ouer sal ick uwer moghen ghenadich wesen? V kinderen hebben my verlaten ende sij sweren by die ghene die gheen goden en zijn, ick hebse versaedt, ende sij hebben oncuyscheyt bedreuen, ende inder hoeren huys deden sij oncuyscheyt.

8

Hittighe ende besprenghende peerden zijn sij gheworden, een ieghelijck wrenschte tot zijns naesten huysvrouwe.

9

En sal ick ouer dese dinghen gheen besoeck doen seyt die Heere? ende en sal mijn ziele in sulc volc gheen wrake doen?

10

⁺Climt op zijn mueren, ende verderft se, maer en wiltse niet heel te niet brenghen, neemt zijn rancken aff, want sij en behooren den Heere niet toe,

+ C

11

want met ouertredinghe heeft het huys van Israel, ende thuys van Iuda teghen my ouertreden, seyt die Heere.

12

Sij hebben den Heere gheloochent ende gheseyt. Hy en eest niet, noch tquaet en sal ouer ons niet comen, tsweert ende den hongher en sullen wij niet sien.

13

Die propheten hebben inden wint ghespro-

[p. *594]

ken, ende daer en heeft gheen antwoorde in hen gheweest, daerom sullen dese dinghen hen ouercomen.

14

⁺Dit seyt die Heere die Godt der heyrscaren. Om dat ghy dit woort ghesproken hebt, siet ick gheue mijn woorden in uwen mont tot een vier, ende dit volck tot hout, ende het salse verslinden.

+ D

15

Siet ic sal ouer v lieden ghy huys van Israel een volck brenghen van verre, seyt die Heere, een sterc volck, een oudt volc, een volck wiens tale ghy niet kennen en sult, noch ghi en sult niet verstaen wat si spreken.

16

Sijnen pijlkoker is als een open graff, sij sijn alle sterc.

17

Ende het sal v coren eten, ende v broot, het sal v sonen ende v dochteren verslinden, v cleyn vee, ende v runderen salt eten het sal uwen wijngaert ende uwen vijchboom aff eten, ende tsal v vaste steden vernielen, waer in ghy v betrouwen hebt, metten sweerde,

18

⁺maer nochtans in die daghen, seyt die Heere, en sal ick v niet gheheel vernielen.

+ E

19

Maer eest dat ghy seght. Waerom heeft ons onse Godt alle dese dinghen ghedaen? soo suldi tot henlieden segghen. Alsoo ghy my verlaten hebt, ende hebt den vreemden goden ghedient in v lant, also suldi den vreemden dienen in een landt dat uwe niet en is.

20

Vercondicht dat den huyse van Iacob ende maect dat ghehoort worde in Iuda segghende.

21

Hoort ghy dwaes volc die gheen herte en hebt, die ooghen hebbende niet en siet, ende ooren hebt ende niet en hoort.

22

En suldi my hierom niet vreesen, seyt die Heere, ende en suldy van mijn aensicht gheenen rouwe hebben? Die tsandt tot een pale ghestelt hebbe der zee, ⁺een eewich ghebodt dat niet voorby gaen en sal, ende haer baren sullen beroert worden, ende si en sullents niet vermoghen, ende si sullen op swillen ende si en sullen daer ouer niet gaen,

+ F

23

maer desen volcke is een ongheloouich ende een verbitterende herte gheworden, sij sijn affgesceyden, ende wechghegaen

24

ende si en hebben in hen herte niet gheseyt. Laet ons den Heere onsen God vreesen, die ons gheeft den tijdeghen ende spaden reghen, te sijnen tijde, die ons bewaert die volheyt vanden iaerlijcschen oochst.

25

V boosheden hebben dese dingen afgekeert, ende v sonden hebben tgoet van v beledt,

26

want in mijn volc zijn ongoddelijcke gheuonden, laghen legghende, als voghelaers, stricken ende voerstroppen legghende om mannen te vanghen,

27

⁺ghelijc eenen voghelslach vol vogelen, alsoo zijn hen huysen vol bedrochs, daerom zijn si groot ende rijck gheworden,

+ G

28

Sij zijn dick gheworden ende vet, ende si hebben mijn woorden ouertreden seer qualijc. Der weduwen sake en hebben si niet gheuonnist, der weesen sake en hebben si niet nae recht beslicht, ende het ordeel der armen en hebben si niet gheordeelt.

29

En sal ick ouer dese dinghen gheen recht doen, seydt die Heere? of en sal ouer alsulc volc mijn ziele haer niet wreken?

30

Verwonderinghe ende wonderlijcke dinghen sijn op die eerde ghesciet

31

die propheten propheteerden loghenen, ende die priesters presen dat met haren handen te samen staende, ende mijn volck heeft sulcke dinghen lief ghehadt, wat sal dan ghescieden in zijn wterste?