Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺EEst dat ghy wederom keert Israel, seyt die Heere, so bekeert v tot my, eest dat ghi v arghernissen wech doet van mijn aensichte, so en suldi niet beroert worden.

+ A

2

Ende ghy sult sweren. Die Heere leeft inder waerheyt, ende int ordeel ende in die rechtuerdicheyt, ende die Heydenen sullen hem ghebenedijden, ende hem louen,

3

want dit seydt die Heere

[p. *593]

den man van Iuda ende van Ierusalem. Vernieuwet voor v eenen nieuwen acker, ende wilt op die doornen niet saeyen,

4

wert besneden den Heere, ende neemt aff die ombesnedenheyt uwer herten, ghy mannen van Iuda, ende bewoonders van Ierusalem, op dat by auontueren mijn verbolgentheyt niet wt en gae als een vier, ende ontsteken worde, ende datter niemant en si diet wtblussche. ⁺Om die quaetheyt uwer ghedachten

+ B

5

vercondiget in Iuda, ende maect dat ghehoort worde in Ierusalem, spreect, ende roept met een trompet int lant roept luyde, ende segget. Wert vergadert, ende laet ons gaen in die vaste steden,

6

heft een teeken op in Sion, wert versterct en wilt niet staen, want ic brenghe een quaet vanden noorden, ende een groote verderuinghe

7

Den leeuw is opgheclommen wt sijn rustplaetse, ende der Heydenen roouer heeft het opghehauen, hi is wtghegaen wt sijn plaetse, op dat hy v landt soude stellen in een verwoestinghe, v steden sullen verwoest worden, blijuende sonder bewoonder.

8

Hierom soo omgort v met hairen cleederen, crijscht ende huylt, want die gramscap van des Heeren verbolghentheyt en is niet affghekeert van v lieden.

9

⁺Ende tsal zijn in dien dach seyt die Heere, dat vergaen sal des conincs herte, ende therte der princen, ende die priesters sullen verbaest worden, ende die propheten heel verslaghen.

+ C

10

Ende ick heb gheseyt. Ach ach ach Heere Godt. Hebdy dan dit volck ende Ierusalem bedroghen segghende. Het sal vrede met v wesen, ende siet het sweert is ghecomen totter zielen toe?

11

In dien tijden salmen desen volcke ende Ierusalem segghen.

12

Eenen berrenden wint is in die weghen die in die woestijne sijn des weechs van die dochter mijns volcs niet om te wannen ende te suyueren. Eenen vollen gheest sal my van desen comen, ende nv sal ick mijn ordeelen met hen spreken.

13

Siet hy sal als een wolcke opclimmen, ende als eenen tempeest is sijnen waghen, ⁺sijn peerden zijn snelder dan arents, wee ons want wij zijn verdoruen,

+ D

14

Ierusalem wascht v herte van die quaetheyt dat ghy moecht behouden worden, hoe langhe sullen die quade ghedachten in v herte woonen?

15

Want die stemme des bootscappers is van Dan, ende die den affgodt kenlijc maect vanden berch Ephraim.

16

Verwect die Heydenen. Siet het is ghehoort in Ierusalem dat die wachters comen wt verren lande, ende om hen stemme te gheuen op die steden van Iuda.

17

Als wachters der ackers zijn sij ouer haer gheworden int ronde, want hi heeft my tot gramscap verwect, seydt die Heere.

18

V weghen ende ghedachten hebben v dese dinghen ghedaen, dese uwe quaetheyt, want sij bitter is, want sij v herte gheraect heeft.

19

⁺Mijnen buyck mijnen buyck doet my wee, die sinnen mijns herten sijn in my ontstelt, ick en sal niet swijghen, want mijn ziele heeft die stemme des trompets ghehoort, een oorloochsgeroep.

+ E

20

Verderuinghe op verderuinghe isser gheroepen, ende alle dlant is verwoest, haestelijc sijn mijn tabernakelen verwoest, onuersienlijck mijn vellen.

21

Hoe langhe sal ick den vliedende sien, die stemme des trompets hooren?

22

Want mijn dwaes volck en heeft my niet bekent, het sijn onwijse kinderen, ende onuerstandighe, sij zijn wijs om quaet te doen, maer wel doen en connen sij niet.

23

Ick heb die eerde aensien, ende siet sij was ydel ende te niete, ende die hemelen, ende daer en was gheen licht inne.

24

Ick heb die berghen ghesien, ende siet sij werden beroert, ende alle hueuelen sijn verstoort.

25

⁺Ick hebt aenscouwet, ende daer en was gheen mensch, ende alle tgheuoghelte des hemels was wech gheghaen.

+ F

26

Ick heb opghesien, ende siet den Carmelus was verwoest, ende alle zijn steden sijn verdoruen van des Heeren aensichte, ende van daensichte der gramscap van sijnder verbolghentheyt,

27

want dit seyt die Heere. Alle dlant sal verlaten sijn, maer nochtans en sal ickt niet heel te niete brenghen.

28

Die eerder sal rouwich zijn, ende die hemelen sullen truerich sijn van bouen, om dat ickt ghesproken hebbe, ick hebt ghedacht, ende ten heeft my niet berouwen, noch ick en ben daer niet affghekeert gheweest.

29

Van die stemme des rosuolcs, ende des scutters, ⁺is die gheheel stadt gheuloden, sij sijn gheghaen op die hooghe plaetsen ende sij zijn gheclommen op die steenrootsen, alle die steden sijn verlaten, ende daer en woont gheen mensch inne.

+ G

30

Maer ghy verwoeste wat suldi doen? als ghi v sult ghecleedt hebben met roode sijde cleederen, als ghy v sult verciert hebben met een gulden hals cieraet, ende dat ghy v ooghen sult ghescildert hebben met stybius, so suldi te vergheefs ghepalleert worden V minnaers hebben v versmaet, si sullen v ziele soecken.

30

Ic heb een stemme ghehoort als van eender vrouwen die in barens noode is, benautheden als van een die baert. Die stemme der dochter van Sion is tusschen die ghene die steruen, ende hen handen wtsteken wee my, want mijn ziele heeft my begheuen om die ghedoodde.