Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺ENde dwoort des Heeren is tot my ghesciet segghende.

+ A

2

Gaet henen ende roept in die ooren van Iherusalem segghende. Dit seydt die Heere. Ick heb ws ghedachtich gheweest ontfermende uwer ioncheyt, ende der liefden ws ondertrouwens, als ghy my volchdet in die woestijne int lant dat niet besaeydt en wort.

3

Heylich is Israel den Heere dierste van sijnen vruchten, alle die hem verslinden die misdoen, quade dinghen sullen ouer hen comen seyt die Heere.

4

Hoort des Heeren woort ghi huys van Iacob ende alle die gheslachten des huys van Israel,

5

dit seyt die Heere. Wat ongerechticheyt hebben v vaders in my gheuonden om dat sij van my verureemt zijn, ende hebben ghewandelt nae die ydelheyt ende zijn ydel gheworden?

6

Ende si en hebben niet gheseydt, waer is die Heere die ons heeft doen opclimmen wten lande van Egipten, die ons gheleyt heeft door die woestijne, door het ombewoonlijck ende onbewandelt lant, door het lant des dorsts, ende door die ghelijckenisse des doots, ⁺door dlant daer gheen man door ghewandelt en heeft, noch gheen mensch inghewoont?

+ B

7

Ende ick heb v gheleydt int lant van den Carmelus dat ghy zijn vruchten, ende zijn alderbeste eten soudt, ende als ghy daer in ghecomen sijt soo hebdy mijn lant besmedt, ende mijn erffenisse hebdy ghestelt tot een afgrijselijcheyt.

8

Die priesters en hebben niet gheseyt, Waer is die Heere? ende die de wet hielden en hebben my niet ghekent, ende die herders hebben ouerghetreden teghen my, ende die propheten hebben ghepropheteert door Baal, ende sij hebben die affgoden gheuolcht,

9

daerom sal ic noch met rechte teghen v strijden seyt die Heere, ende met uwen kinderen twistich wesen.

10

Gaet door tot die eylanden van Cethim ende besiet, ende sendt tot in Cedar, ende aenmerct seer neerstelijc ende besiet oft desghelijcs ghesciet is,

11

oft eenich volck sijn goden verandert heeft, ende die en zijn nochtans voorwaer gheen goden, maer mijn volck heeft zijn glorie verkeert in eenen affgodt.

12

⁺Ghy hemelen verwondert v seere hier aff, ende ghi haer poorten wert crachtelijc verwoest, seyt die Heere,

+ C

13

want twee quaden heeft mijn volck ghedaen. Sij hebben my verlaten die fonteyne des leuende waters, ende si hebben voor hen gheborsten putten ghegrauen die gheen water houden en connen.

14

Is Israel een eyghen knecht oft van eenen eyghen knecht des huysghesins geboren? waerom is hy dan gheworden tot een rooff?

15

op hem hebben die leeuwen ghebriescht, ende hen stemmen ghegheuen, si hebben zijn lant tot een verlaten plaetse ghestelt, zijn steden sijn verbrant, ende daer en is niemant die daer in woont.

16

Die kinderen van Memphis, ende van Thaphnis, hebben v ontsuyuert totten toppe ws hoofts.

17

En is v dit niet gheschiet om dat ghy den Heere uwen Godt verlaten hebt in dien tijt doen hy v leydde door den wech?

18

Ende nv wat wildi v inden wech van Egipten om te drincken turbel water? ⁺ende wat hebdi te doen metten wech van Assirien dat ghy dwater vanden riuiere drincken soudt?

+ D

19

V quaetheyt sal v berispen ende v affkeeringhe sal v straffen. Weet ende siet dat v quaet ende bitter is dat ghy den Heere uwen Godt verlaten hebt, ende dat mijn vreese by v niet en is, seyt die Heere die Godt der heyrscaren.

20

Van tbeghin der werelt hebdi mijn iock ghebroken ende mijn banden in stucken ghetrocken, ende ghi hebt gheseyt. Ick en sal niet dienen, want op alle hooghe hueuelen ende onder alle dick gheloouerde boomen worde ghy hoere neder ghestrect,

21

Maer ick heb v gheplant tot eenen wtuercoren wijngaert, alle warachtich saet, hoe sijdi my verkeert tot den quade, ghi vreemde wijngaert?

22

Eest dat ghi v wascht met niter ende dat ghy voor v vermenichfuldicht het cruyt Borith, soo sijdi besmedt in v boosheyt voor my, seydt die Heere Godt.

23

Hoe segt ghy, ick en ben niet besmedt, ick en heb nae Baalim niet ghewandelt? besiet v weghen in die valleye, ⁺weet wat ghy ghedaen hebt, een licht looper zijn weghen ouerloopende

+ E

24

eenen wilden ezel gewent in die woestijne, heeft in die begheerte sijnder zielen den wint sijnder liefden nae hem ghetrocken, niemant en sal haer affkeeren, alle die haer soecken, en sullen niet moede worden, in haer maenstonden sullen si haer vinden.

25

Verbiedt uwen voet van naectheyt, ende v kele vanden dorst. Ende ghy hebt gheseyt, ick heb mishoept, ic en sals gheen sins doen, want ick heb die vreemde lief ghehadt, ende nae die sal ick wandelen.

26

Ghelijck een dief bescaemt wort als hy beuonden wort, alsoo zijn die van Israels huyse bescaemt, si ende hen coninghen, hen princen ende priesteren, ende hen propheten

27

segghende den houte. Ghy zijn mijn vader, ende den steene, ghy hebt my ghewonnen, si hebben tot my den rugghe ghekeert ende niet het aensicht, ende ten tijde haers lijdens, sullen sij segghen. Staet op ende verlost ons,

28

⁺waer zijn v goden die ghy voor v ghemaeckt hebt? laet die opstaen, ende v verlossen inden tijt ws lijdens, want na tghetal uwer steden waren v goden o Iuda,

+ F

29

wat wildy int recht met my strijden ghy hebt my allegader verlaten, seyt die Heere.

30

Te vergheefs heb ik v kinderen gheslaghen, si en hebben gheen onderwijsinghe ontfanghen, v sweert heeft v propheten verslonden, als eenen verderuenden leeuw is v gheslachte.

31

Besiet het woort des Heeren. Ben ick in Israhel een woestijne gheworden oft een spadich lant? Waerom heeft dan mijn volck gheseyt. Wij sijn wechghegaen, wij en sullen voortaen niet meer tot v comen?

32

Sal een maghet haer cieraet vergheten, oft een bruyt den bant van haer borst cieraet? maer mijn volck heeft my vergheten ontellijcken veel daghen,

33

wat arbeyddy om uwen wech goet te toonen, ⁺om liefde te soecken, die daer bouen oock v quaetheden gheleert hebt uwe weghen,

+ G

34

ende in v vloghelen is gheuonden dbloet van die zielen der armen, ende der onnooselen? ick en hebse in die grachten niet gheuonden, maer in alle die dinghen die ic te voren verhaelt hebbe.

35

Ende ghy hebt

[p. *592]

gheseyt. Ick ben sonder sonde, ende onnoosel, ende daer om laet v verbolghentheyt van my affghekeert worden. Siet ick sal int recht met v strijden, om dat ghy gheseyt hebt, ick en heb niet ghesondicht. Hoe snoode bouen maten sijdi gheworden, v weghen hernemende? Ende van Egipten suldi bescaemt worden, ghelijck ghy bescaemt zijt van Assur,

36

want van dese suldi oock wtgaen, ende v handen sullen op v hooft wesen, want die Heere heeft v betrouwen vernielt, ende ghy en sult niet voorspoedichs hebben.