Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺DIE woorden Ieremie des soons Helcie, van den priesters die gheweest hebben in Anathot int lant van Beniamin.

+ A

2

Dwoort des Heeren dat tot hem ghesciet is in die daghen van Iosias Amons sone des conincs van Iuda int derthienste iaer van sijnen rijcke.

3

Ende het is ghesciet in die daghen van Ioacim den sone van Iosias den coninck van Iuda, tot die voleyndinge des elfsten iaers Sedechie Iosias sone des conincs van Iuda, tot die ouervoeringhe van Ierusalem, in die vijfste maent.

4

Ende het woort des Heeren is tot my ghesciet segghende.

5

Eer ick v maecte inden buyck soo heb ick v ghekent ende eer ghy wter moeder quaemt soo heb ick v gheheylicht, ⁺ende ic heb v tot eenen propheet in die Heydenen ghegheuen.

+ B

6

Ende ick heb gheseyt. A a a Heere Godt, siet ick en can niet spreken, want ick ben een kint.

7

Ende die Heere heeft tot my gheseydt. En wilt niet segghen. Ick ben een kint, want tot alle dat ick v senden sal suldi gaen, ende alle dat ick v ghebieden sal suldi spreken.

8

En vreest niet van hen aensicht, want ick ben met v om v te verlossen, seyt die Heere.

9

Ende die Heere heeft zijn hant wtghesteken, ende mijnen mont gheraect, ende die Heere heeft tot my gheseyt. Siet ick heb mijn woorden ghegheuen in uwen mont

10

siet ick heb v heden ghestelt ouer die Heydenen, ende ouer die conincrijcken, dat ghy soudt wt trecken, ende verderuen, ende vernielen, ende verstroyen, ende timmeren ende planten.

11

Ende het woort des Heeren is tot mi ghesciet segghende. Wat siet ghy Ieremia? Ende ick heb gheseyt. Een wacker roede sien ick.

12

⁺Ende die Heere heeft tot my gheseyt. Ghy hebbet wel ghesien, want ick sal waken ouer mijn woort, dat ick dat doe.

+ C

13

Ende dwoort des Heeren is ten tweeden mael tot my ghesciet seggende, Wat siedi? Ende ic heb gheseyt. Eenen gloeyenden pot sien ic, ende sijn aensicht vanden aensichte vant noorden.

14

Ende die Heere heeft tot my gheseydt. Van dat noorden sal tquaet verthoont worden ouer alle die inwoonders der eerden,

15

want siet ick sal te sa-

[p. *591]

men roepen alle die maesscappen van die rijcken vanden noorden, seyt die Heere, ende sij sullen comen ende ieghelijck sal sijnen throon stellen inden inganck der poorten van Ierusalem, ende op allen hen mueren rontsomme, ende ouer alle die steden van Iuda.

16

⁺Ende ick sal mijn oordeelen spreken met henlieden ouer alle die quaetheyt der gheender die my verlaten hebben, ende hebben den vreemden goden vochtighe offerande gheoffert, ende hebben aenbeden het werck haerder handen.

+ D

17

Daerom omgort v lendenen, ende staet op, ende spreect tot henlieden alle dat ic v ghebiede. En vreest niet van hen aensicht, want ick en sal v hen aensicht niet doen vreesen,

18

Want ick heb v voorwaer heden ghegheuen tot een vaste stadt, ende tot een yseren columne, ende tot eenen metalen muer ouer alle daertrijck, den coninghen van Iuda, haren princen ende priesteren, ende den volcke des landts.

19

Ende sij sullen teghen v strijden, ende sij en sullen v niet verwinnen, want ic ben met v seyt die Heere, om v te verlossen.