Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .lx. Capittel.

1

STaet op ende wert verlicht Ierusalem, ⁺want v licht is ghecomen, ende die glorie des Heeren is ouer v opghegaen.

+ A

2

Want siet die duysternissen sullen deerde ouerdecken, ende een donckerheyt die volcken, maer ouer v sal die Heere opgaen, ende sijn glorie sal in v ghesien worden.

3

Ende die Heydenen sullen wandelen in v licht, ende die coninghen in dat schijnsel van uwen opganck.

4

Heft op v ooghen rontsomme ende siet, alle dese sijn vergadert, sij sijn v ghecomen, uwe sonen sullen van verre comen, ende v dochteren sullen van besijden opstaen.

5

Dan suldi sien ende ouervloedich wesen, ende v herte sal hem verwonderen, ende verbreyt worden, als tot v sal bekeert zijn die menichte der zee, die stercheyt der Heydenen v comen sal zijn.

6

Ouervloedicheyt van kemelen sal v ouderdecken, dromedarisen van Madian ende Epha, alle die van Saba sullen comen, gout ende wieroock brenghende, ende loff den Heere vercondighende.

7

Alle cleyn vee van Cedar sal v vergadert worden, die rammen van Nabaioth sullen v dienen, sij sullen gheoffert worden op mijnen wel behaghenden outaer, ende thuys van mijnder maiesteyt sal ick glorioes maken.

[p. *587]

8

Wie sijn dese die als wolcken vlieghen, ende als duyuen aen hen vinsteren?

9

⁺want die eylanden verwachten my, ende die scepen der zee int beghinsel, dat ic v kinderen soude aenbrenghen van verre, hen siluer ende hen gout is met hen, den name des Heeren ws Godts ende den heylighen van Israel die v gheglorificeert heeft.

+ B

10

Ende die kinderen der pelgrimmen sullen v mueren op timmeren, ende hen coninghen sullen v dienen, want in mijn verbolghentheyt heb ick v gheslaghen, ende in mijn versoeninghe heb ic uwer ontfermt.

11

Ende v poorten sullen altijt gheopent worden, dach ende nacht en sullen sij niet ghesloten worden, op dat tot v ghebracht worde die stercheyt der Heydenen, ende dat haerlieder coninghen aenghebracht worden.

12

Want het volck, ende het rijck dat v niet dienen en sal, dat sal vergaen. Ende die Heydenen sullen met verwoestinghe verdoruen worden.

13

Die glorie vanden Libanus sal tot v comen, den abeel boom ende den busboom ende den pijnboom te samen om te vercieren die plaetse mijnder heylichmakinghe, ⁺ende die plaetse mijnder voeten sal ick glorioos maken.

+ C

14

Ende tot v sullen crom comen alle die kinderen der gheender v vernedert hebben, ende sij sullen aenbidden die voetstappen van uwen voeten, alle die v lasterden, ende sij sullen v noemen die stadt des Heeren, Sion des heylighen van Israel.

15

Om dat ghy verlaten hebt gheweest ende ghehaet, ende datter niemant en was die door v passeerde, soo sal ick v stellen tot een hoocheyt, der eewicheden, tot een blijscap tot gheslachte ende gheslachte.

16

Ende ghy sult suyghen het melck der Heydenen, ende met die borsten der coninghen suldi ghesoocht worden, ende ghy sult weten dat ick die Heere ben v salich makende, ende v verlosser die stercke van Iacob.

17

Voer metael sal ick gout brenghen, ende voer yser sal ick siluer brenghen, ende voer hout metael, ende voer steenen yser, ende ick sal v besoeckinghe stellen vrede, ende v ouerste rechtuerdicheyt.

18

⁺Daer en sal voerts gheen ongherechticheyt ghehoort worden in v lant, verwoestheyt ende vernielinghe in uwe palen, ende die salicheyt sal v mueren besitten, ende v poorten die louinghe.

+ D

19

Ghy en sult die sonne niet meer hebben om te lichten in den dach, noch der manen scijnsel en sal v niet verlichten, maer die Heere sal v wesen tot een eewich licht, ende v Godt, in v glorie.

20

V sonne en sal niet meer ondergaen, ende v mane en sal niet ghemindert worden. Want die Heere sal v sijn tot een eewich licht, ende die daghen uwer beweeninghe sullen voleynt worden.

21

Maer v volck alle rechtuerdighe sullen inder eewicheyt die eerde beeruen, het spruytsel van mijnder plantinghen, het werck mijnder handen om glorioos te maken.

22

Die minste sal tot duysent wesen, ende een cleyn kindeken tot een alderstercste volcke. Ick die Heere, sal in sijnen tijt dit onuersienlijk doen.