Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .lxi. Capittel.

1

⁺DEn gheest Godts is op my, om dat die Heere my ghesalft heeft om den saechmoedighen te vercondighen heeft hy my ghesonden, dat ick ghenesen soude die bedructe van herten, ende dat ic den gheuanghene preken soude vergiffenisse, ende den beslotenen opendoeninghe.

+ A

2

Dat ic preken soude het versoenlijck iaer den Heere, ende den dach der wraken onsen Godt, dat ic troosten soude alle rouwighe.

3

Dat ic den weenende van Sion stellen soude, ende hen ghenen een croone voer asschen, olie der blijscap voer weeninghe, ⁺den mantel des loefs voer den gheest des truerens, ende in haer sullen ghenoemt worden, die stercke der rechtuerdicheyt, die plantighe des Heeren om te glorificeren.

+ B

4

Ende sij sullen timmeren die verlaten plaetsen vander eewicheyt, ende die oude veruallinghen sullen sij op richten, ende sij sullen wederom vermaken die verwoeste steden, ende die verstroydde tot gheslachte ende geslachte.

5

Ende die vreemde sullen staen, ende sullen v cleyn vee weyden, ende die kinderen der vreemdelinghen sullen v ackerluyden ende wyngaerders wesen.

6

⁺Maer ghy sult des Heeren priesters ghenoemt worden. Ons Godts dienaers salmen v segghen, die stercheyt her Heydenen suldi eten, ende in hen glorie suldi v verheffen.

+ C

7

Voer v dobbel scande ende bescaemtheyt, sullen sij hen deel prijsen, daerom sullen sij in hen lant dobbele besitten, eewighe blijscap sullen sij hebben.

8

Want ick ben die Heere beminnende dat ordeel, ende hatende den roof in die brantofferande, ende ick sal hen werck gheuen in die waerheyt, ende een eewich verbont sal ick met hen maken.

9

⁺Ende men sal in die Heydenen hen saet weten, ende hen spruytsel int midden der volcken, alle die hen sien, sullense kennen. Want dese sijn tsaet, den welcken die Heere ghebenedijt heeft.

+ D

10

Verblijdende sal ick my verblijden inden Heere, ende mijn ziele sal haer verhueghen in mijnen Godt. Want hy heeft my ghecleedt met die cleederen der salicheyt, ende met die cleedinghe der rechtuerdicheyt heeft hy my al om behanghen, als eenen brudegom verciert met een croone, ende als een bruyt verciert met haren halscieraten.

11

Want ghelijck die eerde haer spruytsel voertsbrengt, ende ghelijck eenen hoff zijn saet wt doet groeyen, alsoo sal die Heere die Godt die rechtuerdicheyt, ende den loff doen groeyen voer alle Heydenen.