Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .lviij. Capittel.

1

ROept, ende en houdt niet op, ⁺als een trompet soe verheft v stemme, ende vercondicht mijnen volcke hen groote misdaden, ende den huyse van Iacob hen sonden.

+ A

2

Want sij vraghen my van daghe te daghe, ende sij willen mijn weghen weten als een volck dat rechtuerdicheyt ghedaen heeft, ende het ordeel sijns Godts niet verlaten en heeft, sij vraghen van my die vonnissen der rechtuerdicheyt, sij willen Godt na by comen.

3

Waerom hebben wij gheuast, ende ghi en hebbes niet aensien, wy hebben onse zielen verootmoedicht, ende ghy en hebbes niet gheweten? Siet inden dach ws vastens wort uwen wille gheuonden, ende allen v sculdenaers maendi wederom.

4

Siet ghi vast tot kijuagien ende twistighe crijghen, ende ghi slaet metter vuyst onghenadelijck. ⁺En wilt niet vasten ghelijc ghy ghedaen hebt tot heden toe, dat int hooghe v gheroep ghehoort worde.

+ B

5

Ist alsulcken vasten die ic vercoren hebbe, dat een mensch den dach doore sijn ziele pijnighe? Is dat die vasten dat een mensch sijn hooft cromme als eenen reep, ende eenen sack ende asschen onder legghe? suldi dit vasten noemen, ende eenen dach den Heere aenghenaem?

6

En is dit niet meer het vasten dat ic vercoren hebbe? Ontbindt die bindinghen der ongoddelijcheyt. Sceydt van een die nederdruckende bondelkens, laetse vrij gaen die heel ghebroken zijn, ende schoort van een alle lasten.

7

⁺Breect den hongerighen v broot, ende die arme ende dwalende leydt in v huys, als ghy eenen naecten siet soe dect hem, ende en versmaedt v vleesch niet.

+ C

8

Dan sal v licht als eenen morghenstont wtbersten, ende v ghesontheyt sal haestelijck opgaen, ende v rechtuerdicheyt sal voer v aensicht gaen, ende die glorie des Heeren sal v vergaderen.

9

Dan suldi aenroepen, ende die Heere salt verhooren, ghy sult roepen, ende hy sal segghen. Siet ick ben hier, eest dat ghy van tmidden van v die ketenen wechneemt, ende dat ghy op houdt

[p. *586]

van uwen vingher wt te steken, ende te spreken dat niet oorbaerlijck en is.

10

Als ghy den hongherighen v ziele wt ghestort hebt, ende dat ghy die ghepijnichde ziele veruult hebt, dan sal v licht in die duysternisten op gaen, ende v duysternissen sullen wesen als den middach.

11

Ende die Heere sal v altijt ruste gheuen, ende hy sal v ziele veruullen met blinckende claerheden, ende v ghebeenten sal hy verlossen, ende ghy sult zijn als eenen ghewaterden hoff, ende als een fonteyn der wateren wiens wateren niet ghebreken en sullen.

12

⁺Ende in v sullen opghetimmert werden die verlaten plaetsen der eeuwen, die fundamenten der generatien ende generatien suldi verwecken, ende ghy sult ghenoemt worden een thuyn maker, die weghen afkeerende ter rusten.

+ D

13

Eest dat ghy uwen voet vanden Sabboth affkeert, om uwen wille te doen in mijnen heylighen dach, ende dat ghy hem noemt den wellustighen Sabboth, ende het glorioes heylich des Heeren, ende dat ghy hem glorificeert als ghy uwe weghen niet en doet, ende dat uwen wille niet gheuonden en wort, om een reden te spreken.

14

Dan suldi opden Heere ghenoechte hebben, ende ick sal v verheffen op die hoocheden der aerden, ende ick sal v spijsen met Iacobs ws vaders erffenisse, want den mont des Heeren heuet ghesproken.