Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .lvi. Capittel.

1

DIt seyt die Heere, Onderhoudt dat ordeel ende doet rechtuerdicheyt. ⁺Want mijn salicheyt is na by om te comen, ende mijn rechtuerdicheyt om gheopenbaert te worden.

+ A

2

Salich is die man die dat doet, ende des menschen sone die dit aengrijpen sal, bewarende den sabboth, dat hi dien niet en ontsuyuere, bewarende sijn handen dat hy alle quaet niet en doe.

3

Ende die sone des vreemdelincs die den Heere aencleeft en spreke niet segghende. Met een versceydinghe sal die Heere my sceyden van sijnen volcke. Ende die ghesneden man en segge niet. Siet ic ben eenen dorren boom.

4

⁺Want dit seyt die Heere den ghesneden mannen. Soe wie mijn Sabbothen bewaren, ende verkiesen dat ic ghewilt hebbe, ende houden mijn verbont

+ B

5

dien sal ick in mijn huys ende binnen mijn mueren plaetse gheuen, ende eenen beteren naem dan der sonen ende der dochteren, eenen eewighen naem sal ick hen gheuen, die niet vergaen en sal.

6

Ende die kinderen des vreemdelincs die den Heere aenhanghen, dat sy hem eeren souden, ende sijnen naem liefhebben, op dat sij hem

[p. *585]

tot dienaers sijn souden alle, ⁺die den Sabboth bewaert dat hy dien niet en besmette, ende houdende mijn verbont.

+ C

7

Ick sal die aenbrenghen op mijnen heylighen berch, ende ick salse verblijden int huys mijns ghebedts, hen heelbrantofferanden, ende hen slachofferanden sullen my behaghen op mijnen outaer. Want mijn huys sal een huys des biddens ghenoemt worden alle den volcken,

8

Seyt die Heere die Godt, die Israels verstroydde vergadert. Noch sal ic tot hem vergaderen sijne vergaderde.

9

Alle ghy beesten des velts coemt om te verslinden, alle ghy beesten der bosschagien.

10

⁺Hen wachters sijn alle blint, sij allegader en hebbent niet gheweten, stomme honden die niet baffen en connen, siende ydelheden, slapende, ende droomen liefhebbende.

+ D

11

Ende die alder ontscamelste honden en hebben van gheen versaetheyt gheweten die herders selue en hebben die verstandicheyt niet gheweten, sij sijn allegader in haren wech affgeweken, een ieghelijc tot sijn ghiericheyt, vanden ouersten totten laesten.

12

Coemt laet ons wijn nemen, ende laet ons veruult worden met dronckenscap, ende ghelijct heden is, soe salt morghen oock sijn, ende noch veel meer.