Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .lv. Capittel.

1

⁺ALle ghi dorstighe coemt tot die wateren, ende die gheen ghelt en hebt coemt haestelijck, coopt ende etet, coemt coopt sonder ghelt, ende sonder eenighe wisselinghe, wijn ende melck.

+ A

2

Waerom weechdi v ghelt, ende niet aen brooden, ende uwen arbeyt ende niet in versaetheyt? Hoort my hoorende ende etet goet, ende v ziele sal in die vetticheyt verlusticht werden.

3

Neycht v ooren, ende coemt tot my, hoort, ende v ziele sal leuen, ende ick sal met v lieden een eewich verbont maken, Dauids ghetrouwe bermherticheden.

4

⁺Siet ick heb hem ghegheuen tot eenen ghetuyghe den volcken, tot eenen vorst ende meester den heydenen.

+ B

5

Siet het volck dat ghy niet en kendet suldi roepen, ende die Heydenen die v niet ghekent en hebben sullen tot v loopen, om den Heere uwen Godt, ende den heylighe van Israel, want hy v gheglorificeert heeft.

6

Soect den Heere als hy mach gheuonden worden, roept hem aen als hi bi is.

7

Die ongoddelijcke verlate sijnen wech, ende een ongherechtich man sijn ghedachten, ende laet hem wederkeeren totten Heere, ende hy sal sijns ontfermen, ende tot onsen Godt, want hy is veel om te vergheuen.

8

⁺Want mijn ghedachten en sijn v ghedachten niet, noch v weghen, en sijn mijn weghen niet, seyt die Heere,

+ C

9

Want ghelijck die hemelen verheuen worden vander eerden, alsoo sijn mijn weghen verheuen van uwe weghen, ende mijn ghedachten van uwen ghedachten.

10

Ende ghelijck den reghen ende den sneu nederdaelt vanden hemel, ende en keert daer voert niet wederom, maer maect die eerde droncken, ende beghiet die, ende doet die wtspruyten, ende gheeft saet den sayere, ende broot den etere.

11

⁺Alsoo sal mijn woert sijn dat wt mijnen monde gaen sal, ten sal tot my niet ydel wederkeeren, maer tsal doen al dat ick ghewilt hebbe, ende tsal voer spoedich wesen in die dinghen, daer ict toe ghesonden hebbe.

+ D

12

Want in blijscap suldi wtgaen, ende in vrede suldi gheleydt worden, die berghen ende hueuelen sullen voer v lieden loff singhen, ende alle die boomen des lants sullen metten handen tsamen staen.

13

Voer corte dornen sullen abeel bomen op gaen. Voer netelen sal myrtus wassen, ende die Heere sal vernaemt wesen tot een eewich teeken, dat niet en sal affghenomen worden.