Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .liiij. Capittel.

1

⁺LOeft ghy die onvruchtbarighe die niet en baert, singhet loff ende briescht, die niet en baerde. Want meer kinderen heeft die verlaten vrouwe, dan die ghene die eenen man heeft, seyt die Heere.

+ A

2

Verbreyt die plaetse van uwer tenten, ende rect wt die vellen van uwen tabernakelen, en spaert niet, maect v zeelkens lanck, ende maect v spannagelen vast.

3

Want tot die rechte hant ende die slincke suldi doergaen, ende v saet sal die Heydenen beeruen, ende tsal die verlaten steden bewoonen.

4

En wilt niet vreesen, Want ghy en sult niet ter scanden worden, noch ghy en sult v niet scamen, want ghy en sult van scaemten niet root worden, want ghy sult die bescaemtheden uwer ioncheyt vergheten, ⁺ende tverwijt van uwer weduscap en suldi voertaen niet meer ghedencken.

+ B

5

Want hi sal heerscappie ouer v hebben die v ghemaect heeft. Die Heere der heyscaren is sijnen naem, ende v verlosser die heylighe van Israel sal die Godt van gheheel eertrijck ghenoemt worden.

6

Want als als een verlaten vrouwe, ende truerich van gheeste heeft v die Heere ghenoemt, ende een huysvrouwe vander ioncheyt verworpen, heeft v Godt gheseyt.

7

Tot eenen oghenblick ende een luttelken heb ick v verlaten, ende in groote bermherticheden sal ick v vergaderen.

8

In eenen oghenblick der verbolghentheyt heb ick mijn aensicht een weynich van v verborghen, ende in een eewighe bermherticheyt heb ick ws ontfermt, ⁺heeft gheseyt v verlosser die Heere.

+ C

9

Dit is my als in die daghen van Noe, den welcken ic ghesworen hebbe, dat ic die wateren van Noe voorts niet meer brenghen en soude op die eerde, alsoo heb ick ghesworen dat ick op v niet gram sijn en soude, ende dat ick v niet straffen en soude.

10

Want die berghen sullen beweecht worden, ende die hueuelen sullen beuen, maer mijn bermherticheyt en sal van v niet sceyden, ende het verbont van mijnen vrede en sal niet verroert worden, heeft gheseyt v ontfermer die Heere.

11

Ghi arme metten onweder gheslaghen sonder eenighen troost. Siet ick sal v steenen veruolghens legghen, ende ick sal v funderen met Saphiren,

12

ende ick sal stellen van Iaspis steen v voergheweer, ende v poorten van ghesneden steenen, ende alle v palen met lustighe steenen.

13

⁺Allen v kinderen gheleert vanden Heere, ende veelheyt des vreedts uwen kinderen.

+ D

14

Ende in die rechtuerdicheyt suldi ghefundeert worden. Gaet verre van die valsche besculdinghe, want ghy en sult niet vreesen, ende van die verscrictheyt, want die en sal v niet ghenaken.

15

Siet die vreemde bijwoonder sal comen die met my niet en was, die wylen v vreemdelinck was sal met v versaemt worden.

16

Siet ic heb den smidt ghescapen blasende int vier die colen, ende voortbrenghende een instrument tot sijnen wercke, ende ic heb den dootslaender ghescapen om te vernielen.

17

Alle instrument dat versiert is teghen v sal niet voerspoedich wesen, ende alle tonghe die v wederstaet int ordeel, sult ghi ordeelen. Dit is die erffenisse van des Heeren dienaers, ende hen rechtuerdicheyt bi mi seyt die Heere.