Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .liij. Capittel.

1

VVie heeft onsen ghehoore ghelooft? ende wien es den arm des Heeren gheopenbaert?

2

⁺Ende hy sal opgaen als een spruytken voer hem, ende ghelijck een wortel van die dorstighe eerde, hy en heeft gheen ghedaente noch schoonheyt, ende wy hebben hem ghesien, ende daer en was gheen aenscouwen, ende wy hebben hem begheert.

+ A

3

Versmaet ende den laetsten der mannen, eenen man der smerten, ende die crancheyt kennende, ende als verborghen was zijn aensicht ende versmaedt, waer om dat wy hem ooc niet gheacht en hebben.

4

Voerwaer hy heeft onse qualen gheleden ende onse smerten heeft hy ghedraghen, ende wy hebben hem gheacht als eenen melaetschen, ende gheslaghen van Godt, ⁺ende vernedert.

+ B

5

Maer hij is ghewont gheweest om onse boosheden, ende ghequetst om onse groote misdaden die castijnghe ons vredes, was op hem, ende met sijnen stramen sijn wij ghenesen.

6

Wy allegader hebben als scapen ghedoelt, een yeghelijck heeft in sijnen wech affgheweken, ende die Heere heeft op hem geleydt die boosheyt van ons allen.

7

Hij is gheoffert gheweest, omdat hijt ghewilt heeft, ende hy en heeft sijnen mont niet open ghedaen, als een scaep zal hy der doodinghen geleydt worden, ende als een lam voer den ghenen diet sceert, sal hi stom wesen, ende hy en sal sijnen mont niet opendoen.

8

Van die bangicheyt, ⁺ende vanden ordeel is hij wechgenomen, wie sal sijn generatie wtspreken? Want hy is affghesneden van der eerden der leuender, om die groote misdaet mijns volcs heb ic hem gheslaghen.

+ C

9

Ende hy sal die ongoddelijcke gheuen voer die begrauinghe, ende den rijcke voer sijn doot, om dat hy gheen boosheyt ghedaen en heeft, noch gheen bedroch in sijnen mont gheweest en heeft.

10

Ende die Heere heeft hem willen heel in stucken breken in die crancheyt, eest dat hy voer die sonde sijn ziele stelt, soo sal hy langhe gheduerich saet sien ende den wille des Heeren sal in sijn hant wel beschict worden.

11

⁺Om dat zijn ziele ghearbeyt heeft, sal hy

+ D

[p. *584]

sien ende versaedt worden, in sijn wetenheyt sal der mijn rechtuerdich knecht selue vele rechtuerdich maken, ende hen boosheden sal hy draghen.

12

Daerom sal icker hen seer veel bedeylen, ende der stercker roouen sal hy deylen, om dat hi ter doot sijn ziele gheleuert heeft, ende dat hy metten misdadighen gherekent is gheweest, ende hi heeft die sonden van vele ghedraghen, ende voer die ouertreders ghebeden.