Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .lij. Capittel.

1

⁺STaet op, staet op, doet aen v stercheyt Sion, doet aen die cleederen nwer glorien Ierusalem, stadt des heylighen. Want die ombesnedene ende onsuyuere en sal voerts niet meer daer toe doen om doer v te gaen.

+ A

2

Scudt v wten ghestubbe, staet op, sidt Ierusalem, ontbindt die banden van uwen halse ghy gheuanghene dochtere van Sion.

3

Want dit seyt die Heere, om niet sijdi vercocht, ende sonder ghelt suldi ghelost worden,

4

want dit seyt die Heere Godt. In Egypten is mijn volck nederghedaelt ierstmael, om dat daer een vreemdelinck zijn soude, ende Assur heeft sonder eenighe sake hem gheweldich onrecht ghedaen.

5

Ende nu wat is my hier seyt die Heere, ⁺dat mijn volck om niet wech gheleyt is? Hen heerscappers doen ongherechtelijck, seyt die Heere, ende altoos den gheheelen dach wort mijnen naem gheblasphemeert.

+ B

6

Daerom sal mijn volc mijnen naem weten in dien dach. Want siet ick selue die daer sprack ben teghenwoerdich.

7

Hoe schoon sijn op die berghen die voeten vanden ghenen die den vrede vercondicht ende preect, diet goet vercondicht, die de salicheyt preect, segghende tot Sion. V Godt sal reregneren?

8

Die stemme uwer wachters, sij hebben een stemme opghehauen, sij sullen te samen louen, ⁺want sij sullent ooghe aen ooghe sien, als die Heere Sion sal wederom ghekeert hebben.

+ C

9

Verblijdt v ende loeft te samen ghy woestijnen van Ierusalem, want die Heere heeft zijn volck vertroost, hy heeft Ierusalem verlost.

10

Die Heere heeft zijnen heylighen arm bereydt in die ooghen van allen den Heydenen, ende alle die hoecken der aerden sullen sien die salicheyt ons Godts.

11

Gaet wech, gaet wech, gaet daer wt, het besmette en wilt niet aentasten, gaet wt dat midden van haer, ⁺wert ghesuyuert die des Heeren vaten draecht.

+ D

12

Want ghy en sult met gheenen geruchte wt gaen, noch ghy en sult in gheen vluchte haestelijck loopen, want die Heere sal voer v lieden gaen, ende Godt van Israel sal v vergaderen.

13

Siet mijn knecht salt verstaen, hij zal verhauen worden ende opghevuert, ende hy sal seer hooghe wesen.

14

Ghelijcker vele ouer v hen verwondert hebben, alsoo sal zijn aensien onder die mannen sonder glorie wesen, ende zijn ghedaente onder die kinderen der menschen.

15

Dese sal veel Heydenen bespraeyen, ouer hem sullen die coninghen haren mont toe houden, want den welcken van hem niet vertelt en was, die hebbent ghesien, ende diet niet ghehoort en hadden hebbent aenghemerct