Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .li. Capittel.

1

HOort my die daer volcht dat rechtuerdich is, ende die den Heere soect, ⁺aenmerct op den steen waer wt dat ghy ghehouwen sijt, ende op dat hol des puts daer ghy aff ghesneden sijt.

+ A

2

Merct op Abraham uwen vader, ende op Saram die v lieden ghebaert heeft. Want ick heb hem een gheroepen, ende ick heb hem ghebenedijt, ende ick heb hem vermenichfuldicht.

3

Hier om sal die Heere Sion vertroosten, ende hy sal vertroosten allen haer veruallinghen, ende hy sal haer verwoestheyt stellen als wellustticheden, ende haer verlatenheyt als den hoff des Heeren. Blijsscap ende vrolijcheyt sal daer in gheuonden worden, ⁺dancsegghinge ende die stemme des loefs.

+ B

4

Merct aen nae my mijn volck, ende mijn gheslachte hoort my, want een wet sal van my wtgaen, ende mijn ordeel sal int licht der volcken rusten.

5

Mijn rechtuerdighe is nae by, mijn salichmaker is wtghegaen, ende mijn armen sullen die volcken ordeelen, my sullen die eylanden verwachten, ende mijnen arm sullen sij verbeyden.

6

Heft opwaerts ten hemel v ooghen, ende besiet onder die eerde neder waerts, want die hemelen sullen als eenen roock smelten, ende die eerde sal als een cleedt versleten worden, ende haer bewoonders sullen als dese steruen.

Maer mijn salicheyt sal inder eewicheyt wesen, ⁺ende mijn rechtuerdicheyt en sal niet ghebreken.

+ C

7

Hoort my ghy die den rechtuerdighen kent, mijn volck, mijn wet is in hen herten, en wilt niet ontsien het verwijt der menschen, ende hen blasphemien en wilt niet vreesen.

8

Want ghelijck een cleedt alsoo salse den worm eten, ende als wolle soo sal hen die motte verslinden. Maer mijn salicheyt sal inder eewicheyt wesen, ende mijn rechtuerdicheyt tot die gheslachten der gheslachten.

9

Staet op, staet op, doet sterckeyt aen o ghy arm des Heeren, staet op als in die oude daghen, ⁺in die gheslachten der eewen, en hebdi ghi niet den hoouerdighen gheslaghen? den draeck ghewont?

+ D

10

En hebdi niet die zee verdroocht, het water van die crachtighe diepte, die de diepte der zee eenen wech ghestelt hebt dat die verloste doer gaen souden?

11

Ende nu die verlost zijn vanden Heere sullen wederom comen, ende sij sullen in Sion comen louende, ende eewighe blijscap op hen hoofden. Blijscap ende vrolijcheyt sullen sij houden, pijne ende suchtinghe sullen vlieden.

12

Ick, ic selue sal v vertroosten, wie sijdi dat ghy vreesen soude van eenen sterffelijcken

[p. *583]

mensch, ende van des menschen sone, die welcke als hoy verdorren sal?

13

Ende ghi hebt vergheten den Heere uwen makere, die de hemelen ghespannen heeft, ende die eerde ghefundeert, ende ghy hebt ghevreest altijt den gheheelen dach van daensicht sijnder rasender gramscap, die v quelde, ende bereydt hadde om te verderuen, waer is nu den rasenden toren des quelders?

14

Haestelijck sal hy comen gaende om open te doen, ende hy en sal niet dootslaen totter gantscher vernielinghen, noch sijn broot en sal niet ghebreken.

15

Maer ic ben die Heere v God, die de zee verstoore ende haer baren heffen op. Heere der heyrscaren is mijnen naem.

16

Ick heb mijn woerden ghestelt in uwen mont, ⁺ende in die scaduwe mijnder hant heb ick v bescermt, dat ghy die hemelen planten soudt, ende die eerde funderen, ende tot Sion segghen, Mijn volck sijt ghy.

+ F

17

Wert verheuen, wert verheuen staet op Ierusalem, die ghedroncken hebt wter hant des Heeren den kelck sijnder gramscap, totten gront vanden kelck des slaeps hebdi ghedroncken, ende ghy hebbet ghedroncken totten ghiste.

18

Daer en is niemand diese onderhoude van allen den kinderen die sij voertghebracht heeft. Ende daer en is niemant die haer hant aengrijpt wt alle die kinderen, die sij opgheuoedt heeft.

19

Twee dingen sijnder die v teghen ghecomen sijn, wie sal bedroeft worden over v? verwoestheyt, ende vernielinghe, ende den hongher, ende tsweert, wie sal v vertroosten?

20

V kinderen zijn verworpen, sij hebben gheslapen int hooft van allen weghen als den Orix met eenen strick ghevanghen, ⁺soo zijn sij vol van des Heeren verbolghentheyt, van die straffinghe ws Godts.

+ G

21

Daer om hoort dit ghy arm vrouken, ende droncken niet van wijne.

22

Dit seyt v heerscapper die Heere, ende v Godt, die ghestreden heeft voer zijn volck. Siet ick heb van uwer handt ghenomen den kelck des slaeps, den gront van den kelck mijnder verbolghentheyt, ghy en sult dien voerts niet meer drincken.

23

Ende ick sal dien stellen in hen hant die v vernedert hebben, ende v zielen gheseyt hebben. Buycht v dat wy doergaen moghen, ende ghy hebt v lichaem ghestelt als eerde, ende als eenen wech den voerbijgangers.