Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .l. Capittel.

1

⁺DIt seyt die Heree, Welc is desen sceybrief van uwer moeder waer mede icse verlaten hebbe? Oft wie is mijn scultheere den wecken ic v vercocht hebbe? siet in v boosheden sijdi vercocht, ende in v groote misdaden heb ic v moeder verlaten.

+ A

2

Want ic ben ghecomen ende daer en was gheen man, ic heb gheroepen ende daer en was niemant diet hoorde? Es mijn hant vercort ende cleyn gheworden, dat ick niet en soude connen verlossen? oft en is in my gheen macht om te bevrijden? ⁺Siet in mijn straffinghe sal ick die zee verwoest maken, ick sal die vloeden tot een drooghe plaetse stellen, die visschen sullen verrotten sonder water, ende sij sullen steruen van dorste.

+ B

3

Ick sal die hemelen ouertrecken met duysternissen, ende eenen sack sal ik hen ouerdecsel stellen.

4

Die Heere heeft my een wel gheleerde tonghe ghegheuen, dat ick weten soude te onderhouden den ghenen die vermoeyt is metten woerde, hy richt op des morghens, des morghens, richt hy my die oore, ⁺op dat ick en hooren soude als den meester.

+ C

5

Die Heere Godt heeft my die oore gheopent, ende ick en seggher niet teghen, ick en ben niet achterwaerts ghegaen.

6

Mijn lichaem heb ick ghegheuen den slaenden, ende mijn wanghen den wt treckenden, mijn aensicht en heb ick niet affghekeert van die berispende, ende bespouwende.

7

Die Heere die Godt es mijn hulper, daer om en ben ich niet bescaemt, daer om heb ick mijn aensicht ghestelt als eenen alderhartsten steen, ende ick weet dat ick niet en sal bescaemt worden.

8

Hy is nae by die my rechtuerdich maket, wie sal teghen my spreken? laet ons te samen staen, ⁺wie is mijn teghenpartijder? Hy come tot my.

+ D

9

Siet die Heere die Godt is mijn helpere, wie esser die my verdoemen mach? Siet sij sullen allegader als een cleedt versleten worden, die motte salse eten.

10

Wie esser van v lieden den Heere vreesende, hoorende die stemme sijns knechts, die in die duysternissen ghewandelt heeft, ende dien gheen licht en is? Hy hope inden naem des Heeren ende hy leue op sijnen Godt.

11

Siet ghy sijt allegader tvier ontstekende, omgort met vlammen, wandelt int licht ws viers, ende in de vlammen die ghy ontsteken hebt, van mijnder hant is v dit ghesciedt, in pijnen suldi slapen.