Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlix. Capittel.

1

HOort ghy eylanden, ⁺ende luystert toe ghy volcken van verre. Die Heere heeft my van de buyck gheroepen, van mijns moeders buyck heeft hi mijns naems ghedachtich gheweest.

+ A

2

Ende hy heeft mijnen mont ghestelt als een scerp sweert, in die scaduwe van sijnder hant heeft hy my bescermt, ende hy heeft my ghestelt als eenen wtghecoren pijl, in sijnen pijlkoker heeft hy my gheborghen.

3

Ende hy heeft my gheseyt, Mijn knecht sijdi Israel, want in v sal ick glorieeren.

4

Ende ick heb gheseyt, Te vergheefs heb ick ghearbeyt, sonder sake, ende ydelijck heb ick mijn stercheyt verdaen, daer om is mijn ordeel metten Heere, ende mijn werck met mijnen Godt.

5

Ende nu seyt die Heere sceppende my wt den buyck hem tot eenen knecht, dat ick Iacob wederom brenghen soude tot hem, ende Israel en sal niet vergadert worden, ⁺ende ick ben gheglorificeert gheweest in des Heeren ooghen, ende mijn Godt is mijn stercheyt gheworden.

+ B

6

Ende hy heeft gheseyt, Het is luttel dat ghy my soudt een knecht zijn om te verwecken die gheslachten van Iacob, ende om den ghist van Israel te bekeeren. Siet ick heb v ghegheuen tot een licht der Heydenen, dat ghy mijn salicheyt zijn soudt tot dat wterste der eerden.

7

Dit seyt die Heere die verlosser van Israel, zijn heyleghe, tot een versmadelijcke ziele, tot een verfoeyt volck, tot den knecht der Heeren. Die coninghen sullen sien, ende die princen sullen te samen opstaen, ende sij sullen aenbidden om den Heere, want hy ghetrouwe is, ende den heylighen van Israel die v vercoren heeft.

8

Dit seyt die Heere, Inden aenghenamen tijdt heb ick v verhoort, ende in den dach der salicheyt heb ik v gheholpen, ⁺ende ick heb v bewaert, ende ik heb v ghegheuen tot een verbont des volcs, dat ghy deerde verwecken soudt, ende besitten die verstroydde erffenissen,

+ C

9

dat ghy segghen soudt den ghenen die gheuangen zijn. Gaet wt, ende den ghenen die in duysternisse zijn. Wert ghesien. Op die weghen sullen sij weyden, ende in alle effen plaetsen zijn hen weyden.

10

Sij en sullen noch hongher noch dorst hebben, ende die hitte ende die sonne en salse niet slaen. Want hen ontfermer salse regeren, ende aen die fonteynen der wateren sal hijse te drincken gheuen,

11

ende ick sal alle mijn berghen stellen tot eenen wech, ende mijn paden sullen verheuen worden.

12

Siet dese sullen van verre comen, ende siet die vanden noorden ende vander zee, ende dese vant zuyden landt.

13

⁺Loeft ghy hemelen ende verhuecht v ghy eerde, ende ghy berghen singt den loff met iolijt, want die Heere heeft sijn volck vertroost, ende sijnder armen sal hij ontfermen.

+ D

14

Ende Sion heeft gheseyt, Die Heere heeft my verlaten, ende die Heere heeft mijns vergheten.

15

Ist moghelijck dat een vrouwe soude haer sprakeloos kint vergheten, dat sij niet en soude ontfermen den sone haers buycs, ende al waert dat sijt verghate, ick en sal nogtans ws niet vergheten.

16

Siet in mijn handen heb ick v bescreuen. V mueren sijn in mijn ooghen altijt.

17

V timmerlieden zijn ghecomen v verderuende, ende

[p. *582]

verstroyende sullen sij van v wtgaen.

18

⁺Heft op v ooghe int ronde ende siet, alle dese zijn vergadert, sij sijn v ghecomen. Ick leue seyt die Heere, dat ghy met alle dese sult als met een cieraet ghecleedt worden, ende ghy sultse v seluen omhangen als een bruyt.

+ E

19

Want v woestijnen, ende v verlaten plaetsen, ende dlant van uwer veruallinghe, sullen nu enghe zijn van die bewoonders, ende sij sullen verre ter vlucht ghedreuen worden die v verslonden.

20

Noch sullen die kinderen van uwer onvruchtbaerheyt in v ooren segghen, Die plaetse is my enghe, maect my ruymte dat ick woonen mach.

21

Ende ghy sult segghen in v herte. ⁺Wie heeft my dese voertghebracht? Ic ben een onvruchtbarich ende niet barende, ouerghevoert, ende gheuanghen, ende wie heeft dese op ghevoedt? Ic ben een verlatene ende eenige, ende waer waren dese hier?

+ F

22

Dit seyt die Heere die Godt, Siet ic sal tot die Heydenen mijn hant opheffen, ende tot die volcken sal ic mijn teeken verheffen. Ende sij sullen v sonen brenghen in die armen, ende v dochteren sullen sij op die scouderen draghen.

23

Ende die coninghen sullen v voesterheeren sijn ende die coninghinnen v voesteren, met gheneychden hoofden ter aerden sullen sij v aenbidden, ende het ghestubbe uwer voeten sullen sij lecken. Ende ghy sult weten dat ick die Heere ben. Waer op dat sij niet en sullen bescaemt worden die hem verwachten.

24

⁺Sal den roof vanden stercken ghenomen worden? oft dat gheuangen is vanden vromen, sal dat mogen behouden wesen?

+ G

25

Want dit seyt die Heere, warachtelijck dat gheuanghen is sal vanden stercken ghenomen worden, ende dat wech ghenomen is vanden vromen sal behouden worden. Maer die ghene die v gheordeelt hebben, sal ick ordeelen, ende v kinderen sal ick behouden.

26

Ende ic sal v vianden spijsen met haren vleessche, ende als met moste sullen sij met haren bloede droncken worden, ende alle vleesch sal weten dat ick die Heere ben v behoudende, ende v verlosser die stercke van Iacob.