Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlviij. Capittel.

[p. *581]

1

HOort dit ghy huys van Iacob, ⁺die ghenoemt wort metten name van Israel, ende die wten wateren van Iuda ghecomen sijt, die daer sweert inden naem des Heeren, ende ghedachtich sijt Israels Godt, niet in die waerheyt noch in die rechtuerdicheyt.

+ A

2

Want van die heylighe stadt sijn zij gheroepen, ende op de Godt van Israel sijn sij ghevesticht. Heere der heyrscaren is sijnen naem.

3

Die ierste dingen heb ick van doen vercondicht, ende wt mijnen mont sijn sij wtghegaen, ende ick hebse doen hooren, onuersienlijck heb ict ghewracht, ende sij zijn ghecomen.

4

Want ick wist wel dat ghy hart sijt, ende dat uwen necke een yseren senuwe is, ende v voorhooft metalen.

5

Ick hebt v te voren gheseyt van doen, eer sij quamen soe heb ict v te kennen ghegheuen, op dat ghy bijauonturen niet segghen en soudt. ⁺Mijn affgoden hebben dese dinghen ghedaen, ende mijn ghesneden ende ghegoten beelden hebben dese dinghen beuolen.

+ B

6

Dat ghy ghehoort hebt besieghet al, maer hebdi ghy lieden dat vercondicht? Ic heb v nieuwe dinghen doen hooren van doen, ende sij zijn bewaert gheweest die ghy niet en weet,

7

nu sijn die ghescapen, ende niet van dier tijt, ende voer den dach, ende ghy en hebtse niet ghehoort, dat ghy bijauontueren niet en segget. Siet ick hebse gheweten.

8

Ghy en hebse noch gehoort, noch ghekent, noch v oore en is van doen niet gheopent gheweest. Want ick weet dat ghy ouertredende ouertreden sult, ende eenen ouertreder vanden buyck heb ik v ghenoemt.

9

Om mijnen naem sal ic mijn rasende gramscap verre wech doen, ende met mijnen loff sal ik v breydelen op dat ghy niet en vergaet.

10

Siet ick heb v gheproeft, maer niet als silver, ick heb v vercoren inden ouen der armoeden.

11

⁺Om mijnen wille, om mijnen wille sal ict doen, dat ick niet gheblasphemeert en worde, ende mijn glorie en sal ic gheenen anderen gheuen.

+ C

12

Hoort my Iacob ende Israel den welcken ick roepe. Ick selue ick ben dierste ende die laetste.

13

Ende mijn hant heeft die eerde ghefundeert, ende mijn rechte hant heeft die hemelen ghemeten. Ick salse roepen ende sij sullen tsamen staen.

14

Wert vergadert ghy allegader, ende hoort. Wie van dien heeft dese dinghen vercondicht? Die Heere heeft hem bemint, hy sal sijnen wille doen, in Babilonien, ende sijnen arm in die Chaldeen.

15

Ick heb ghesproken, ende heb hem gheroepen, ick heb hem aenghebracht, ende sijnen wech is voerspoedich gheworden.

16

Coemt tot my ende hoort dat. Ick en heb van tbeghinsel int verborgen niet ghesproken, van den tijt eer dattet ghesciedde, soe was ic daer, ende nu heeft my die Heere die Godt ghesonden, ende sijnen gheest.

17

⁺Dit seyt die Heere v verlosser, die heylighe van Israel. Ick ben die Heere uwe Godt leerende v oorbaerlijcke dinghen, regerende v inden wech daer ghy in wandelt.

+ D

18

Och oft ghy mijn gheboden waerghenomen hadt, soo soude uwen vrede als eenen vloet ghemaect hebben gheweest, ende uwe rechtuerdicheyt als die goluen der zee,

19

ende v saet soude als landt gheweest hebben, ende dat gheslachte ws buycs als haer steenkens, ten soude niet verstoruen hebben, ende sijnen naem en soude niet vergaen sijn van mijnen aensichte.

20

Gaet wt Babilonien, Vliedt van die Chaldeen, in die stemme des verhueghens vercondighet, doet datmen dit hoore, ende draecht dat wt tot aen duyterste der aerden. Segt, Die Heere heeft sijnen knecht Iacob verlost.

21

Sij en hebben gheenen dorst ghehadt in die woestijne, doen hyse wtleydde, hy heeft hen water wten steen voert ghebracht, ende hy heeft die steenroetse gheclouen, ende die wateren hebben ghevloeydt.

22

Die ongoddelijcke en hebben gheenen vrede seyt die Heere.