Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlvij. Capittel.

1

DAelt neder, ⁺sidt int stubbe ghy maget dochter van Babilonien, sidt opt derde, ende daer en is gheenen stoel voer die dochter der Chaldeen. Want ghy en sult voertaen niet meer ghenoemt worden weeck ende teeder.

+ A

2

Neemt die molen ende maelt meel, maect bloot v leelijcheyt, ontdect v scondere, ontdect v beenen, gaet doer die vloeden.

3

V scandelijcheyt sal ontdect worden, ende v versmadelijcheyt sal ghesien worden, ick sal wrake nemen, ende my en sal gheen mensch wederstaen.

4

Onse verlosser die Heere der heyrscaren is sijnen naem, die heylighe van Israel.

5

Sidt swijghende, ende gaet in die duysternisse dochter der Chaldeen. Want ghy en sult voerts niet ghenoemt worden, ⁺die vrouwe der conincrijcken.

+ B

6

Ick ben gram op mijn volck. Ick heb mijn erffenisse besmet, ende ick hebse ghegheuen in v hant, ghy en hebt hen gheen bermherticheden ghestelt, opden ouden hebdi v iock seer beswaert.

7

Ende ghy hebt geseyt. Inder eewicheyt sal ik vrouwe wesen, ghy en hebt dese dinghen op v herte niet gheleydt, noch ghy en hebt ws wterste niet ghedachtich gheweest.

8

Ende nu hoort dit ghy weeldighe, ende vrijlijck woonende, die segt in v herte. Ick bent, ende behaluen my en is daer niemant meer, ick en sal gheen weduwe sitten, ende ick en sal gheen onvruchtbaerheyt weten.

9

Dese twee sullen v onuersienlijck comen in eenen dach, onvruchtbaerheyt, ende weduwescap. Allegader sijn sij op v ghecomen om die menichte uwer toouerien, ende om die crachtighe hartheyt uwer tooueraers.

10

⁺Ende ghy hebt betrouwen ghehadt in v quaetheyt, ende ghy hebt gheseyt, Daer en is niemand die mij siet. V wijsheyt ende dese uwe wetenheyt heeft v bedroghen. Ende ghy hebt gheseyt in v herte, Ick bent ende sonder my en is gheen andere.

+ C

11

Het quaet sal ouer v comen, ende ghi en sult sijnen oorspronck niet weten, ende dien allendicheyt sal up v vallen, die welcke ghy niet en sult connen suyueren. V sal onuersienlijck katijuicheyt ouer comen die ghy niet weten en sult.

12

Staet met uwen tooueraers, ende met die menichte uwer toouerien, in die welcke ghi ghearbeyt hebt van uwer ioncheyt aen, oft v bijauontueren iet helpen mochte, oft dat ghy mocht stercker worden.

13

⁺Ghy hebt ghefaelgeert in die menichte uwer raden, laet die waersegghers des hemels staen ende v behouden, die de sterren aenscouwen, ende telden die maenden, dat sij daer wt v souden vercondighen die dinghen die v toecomende zijn.

+ D

14

Siet sij zijn gheworden als stroo, het vier heeftse verbrant, sij en sullen hen zielen niet verlossen van die hant der vlammen, ten sijn gheen gloeyende colen daer sy aff werm mochten worden, noch ten is gheenen heerdt dat sij daer aen sitten souden.

15

Alsoo sijn v die gheworden, in alle die dinghen daer ghy in ghearbeydt hadt. V coopluyden van uwer ioncheyt, een ieghelijck heeft van sijnder ioncheyt ghedoelt, daer en is niemand die v behoude.