Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlvi. Capittel.

1

⁺BEl is ghebroken. Nabo es al in stucken gewreuen, hen beelden sijn gheworden den beesten ende den vee, v lasten sijn van swaren ghewichte tot vermoeytheyt.

+ A

2

Sij sijn heel verdwenen ende alte samen in stucken ghebroken, sy en hebben niet moghen salichmaken den ghenen diese droech, ende hen ziele sal in de gheuanghenisse gaen.

3

Hoort my ghy Iacobs huys, ende alle dat ouerblijfsel des huys van Isarael, die ghedraghen wort van mijnen buyck, die ghedraghen wort van mijn moederstede

4

⁺Tot den ouderdom ben ick die selue, ende tot die grijsheyt sal ik draghen, ick hebt ghemaect, ende ick salt draghen. Ick sal draghen, ende salich maken.

+ B

5

Wien hebdi my verghelijct, ende ghelijck gheacht, ende gheleken ende wien hebdi my ghelijck gemaect?

6

Die tgout te hope brengt wten buydel, ende tsiluer met een waghe weecht, huerende eenen goutsmit, dat hy eenen Godt maken soude, ende sij vallen neder, ende aenbidden.

7

⁺Sy draghen dien op hen scouderen draghende ende stellende dien in zijn plaetse, ende hy sal staen ende van sijnder plaetse niet beroert worden. Maer oock als sij tot hem roepen sullen, soo en sal hijt niet hooren, van die tribulatie en sal hyse niet verlossen.

+ C

8

Weest deses ghedachtich ende wert bescaemt. Keert weder om ghy ouertreders ter herten.

9

Weest ghedachtich der voerleder eewen. Want ick ben Godt, ende daer en is voerts meer gheen Godt, ⁺noch daer en is niemant mijns ghelijcke

+ D

10

vercondighende van tbeghinsel den laetsten, ende van tbeghinsel datter noch niet ghedaen en is, segghende. Mijnen raet sal staen, ende alle mijnen wille sal ghescieden.

11

Roepende vanden oosten den voghel, ende van verre lande den man van mijnen wille, ende ick heb ghesproken, ende ick sal dat aenbrenghen, ick hebt ghescapen, ende ick sal dat doen. Hoort my ghy die hardt van herten sijt, die verre sijt vander rechuerdicheyt.

12

Ick heb mijn rehtuerdicheyt by ghemaect, ende sij en sal niet verlingt worden ende mijn salicheyt en sal niet toenen. Ick sal in Sion salicheyt gheuen, ende in Israel mijn glorie.