Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlv. Capittel.

1

DIt seyt die Heere mijnen ghesalfden Cyro, ⁺wiens rechte hant ick ghegrepen hebbe, dat ick voer sijn aensicht die Heydenen onderdanich soude maken, ende der coninghen rugghen keeren, ende ick sal die dooren voer hem opendoen, ende die poorten en sullen niet ghesloten worden,

+ A

2

ick sal voer v gaen, ende ick sal die gloriose der aerden vernederen, die metalen poorten sal ick heel in stucken breken, ende die ysere grendelen sal ick breken.

3

Ende ick sal v die verborghen scatten gheuen, ende die verborghen dinghen der verholentheden. Op dat ghy weten moecht dat ick die Heere ben die uwen naem noeme Israels Godt.

4

Om mijnen knecht Iacob, ende om Israel mijnen wtuercorenen, ende ick heb v ghenoemt met uwen naem, ick heb v verghelijct, ende ghy en hebt my niet ghekent.

5

Ick ben die Heere, ende daer is gheen meer, buyten my en isser gheen Godt, ick heb v ghegort, ende ghy en hebt my niet ghekent.

6

Om dat sij weten souden die vanden opganck der sonnen zijn, ende die vanden onderganck zijn, ⁺datter gheen sonder my en is. Ic ben die Heere, ende daer en is gheen ander,

+ B

7

makende dlicht, ende sceppende die duysternisse, makende vrede, ende sceppende tquaet. Ick ben die Heere alle dese dinghen doende.

8

Dauwt ghy hemelen van bouen, ende die wolcken laet reghenen den rechtuerdighen, laet die eerde gheopent worden, ende laetse voertbrenghen den salichmaker, ende die rechtuerdicheyt spruyte te samen. Ick die Heere heb hem ghescapen.

9

Wee den ghenen die teghen sijnen scepper seyt, eenen scerf van der eerden des lant van Samo. Sal die pot eerde haren potbacker segghen. Wat maecte ghy? ende v werck is sonder handen?

10

Wee hem die den vader seyt, wat genereerdi? ende der vrouwen, Wat baerdi?

11

Dit seyt die Heere die heylighe van Israel sijn sceppere. Toecomende dinghen vraecht my, ouer mijn kinderen, ende opt werck mijnder handen beueelt my.

12

Ic heb deerde ghemaect, ende ick heb den mensch op haer ghescapen, mijn handen hebben die hemelen wtghespannen, ende alle haren heyre heb ick beuolen.

13

Ick heb hem verwect ter rechtuerdicheyt, ende alle zijn weghen sal ik te rechte bescicken. ⁺Hy sal mijn stadt optimmeren, ende mijn gheuanghenisse sal hy laten gaen, niet doer prijs oft doer gauen seyt die Heere die Godt der heyrscaren.

+ C

14

Dit seyt die Heere. Den arbeyt van Egypten, ende die comenscap vant Morianen lant, ende Sabaim die hooghe mannen, sullen tot v ouer comen, ende sij sullen uwe sijn. Nae v sullen sij wandelen, ghebonden met hant boeyen sullen sij reysen, ende sij sullen v aenbidden, ende v smeekende bidden. Alleenlijck in v is Godt, ende sonder v en isser gheen Godt.

15

Voerwaer ghy sijt een verborghen Godt. Israels Godt die salichmaker.

16

Die stichters der dolinghen sijn bescaemt, ende sij hebben hen allegader ghescaemt, sij sijn te samen wech ghegaen ter bescaemtheyt.

17

Israel is behouden in den Heere met een eewighe salicheyt, ghy en sult niet bescaemt worden, ende ghy en

[p. *580]

sult v niet scamen tot in die eewe der eewen.

18

Want dit seyt die Heere sceppende die hemelen, die selue Heere figurerende die aerde ende die makende, hij is haer sceppere, hy en heeftse niet te vergheefs ghescapen, om datse bewoont soude worden heeft hy die ghemaect. Ic ben die Heere, ende daer en is gheen ander.

19

Ic en heb int verborghen niet ghesproken, in een duyster plaetse der aerden. Ick en heb Iacobs sade niet geseyt. Soect my te vergheefs. Ic ben die Heere sprekende rechtuerdicheyt, vercondighende rechte dinghen.

20

Wert vergadert ende coemt, ende naket te samen die behouden sijt wten Heydenen, sij en hebben niet gheweten die thout van hare snijtsele opheffen, ende sij bidden den Godt die niet salich en maect.

21

Vercondighet ende coemt ende houdt raet te samen, wie heeft dat doen hooren vanden beghinne, wie heeft dat van doen te voren gheseyt? ⁺En ben ic niet die Heere, ende daer en is voerts gheen Godt sonder my? Daer en is gheen rechtuerdich ende behoudende Godt sonder my.

+ D

22

Bekeert v tot my, ende ghy sult salich wesen, alle ghy eynden der eerden, want ick ben Godt, ende daer en is gheen ander.

23

In my seluen heb ick ghesworen, wt mijnen monde sal gaen het woert der rechtuerdicheyt, ende ten sal niet wederkeeren.

24

Want my sullen alle knyen ghebuycht worden, ende alle tonghen sweren.

25

Aldus in den Heere (sal hy segghen) sijn die rechtuerdicheden mijne ende die machticheyt, tot hem sullen sij alle comen ende bescaemt worden die hem wederstaen.

26

Inden Heere sal gherechtuerdicht ende ghepresen worden alle tsaet van Israel.