Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xliiij. Capittel.

1

ENde nu hoort Iacob mijn dienaer, ende Israel den welcken ick vercoren hebbe.

2

⁺Dit seyt die Heere v makende, ende figurerende vanden buyck, v helper, en wilt niet vreesen mijn knecht Iacob, ende ghy alderrechtste den welcken ick vercoren hebbe.

+ A

3

Want ick sal wateren wtstorten op den dorstighen, ende vloeden op die drooghe, ick sal mijnen gheest wtstorten op v saet, ende mijn ghebenedijdinghe op v gheslachte.

4

Ende sij sullen groeyen tusschen die cruyden als wilghen omtrent die voer by vlietende wateren.

5

Dese sal segghen, Den Heere behoir ick toe, ende die ander sal roepen in Iacobs naem, ende dese sal met sijnder hant scrijuen den Heere, ende in Israels naem sal hy verghelijct worden.

6

Dit seyt die Heere die coninck van Israel, ende sijn verlosser die Heere der heyrscaren. Ick ben dierste, ende ic ben die laetste, ende behaluen my en isser gheen Godt.

7

Wie isser mijns ghelijck? die roepe ende vercondighe, ende beduyde my het veruolghen, van dat ick het oude volck ghestelt hebbe, laet die hen vercondighen die toecomende dingen, ende die wesen sullen.

8

⁺En wilt niet vreesen, noch en wert niet verslaghen, van doen heb ict v doen hooren, ende ick hebt vercondicht, ghy sijt mijn ghetuyghen. Isser een Godt sonder mij, ende een scepper den welcken ick niet en kenne?

+ B

9

Die makers des affgodts en sijn alle gader niet, ende hen alderliefste en sullen hen niet baten, sij sijn ghetuyghen van dien dat sij niet en sien oft en verstaen, dat sij bescaemt moeten worden.

10

Wie heeft eenighen Godt ghemaect, ende eenich ghesneden beelt ghegoten nergens toe nuttelijck?

11

Siet alle die mededeylders van dien sullen bescaemt worden. Want het zijn werckmeesters wt die menschen, sij sullen alle versamen, sij sullen staen ende beuen van vreesen, ende sij sullen te samen bescaemt worden.

12

Die yser smidt heuet metter vijlen ghewracht, in die colen ende metteu

[p. *579]

hameren heeft hy dat ghefigureert, ende hy heuet ghewracht met den arm sijnder stercheyt, hy sal hongher hebben ende flau worden, hy en sal gheen water drincken ende sal moede worden.

13

Die constenaer des houtwercs heeft die richtcoorde wtgehstrect, hy heeft dat ghefigureert met een saghe, hy heeft dat ghemaect met winckelhaken, ende met eenen passer heeft hy dat ront ghemaect, ende hy heeft eens mans beelt ghemaect als eenen schoonen mensch woonende in een huys.

14

Hij heeft die ceder boomen affghehouwen, hi heeft eenen pecboom ghehaelt, ende eenen eycken boom, die ghestaen hadde onder die boomen des wouts, hy heeft eenen pijnboom gheplant den welcken den reghen gheuoedt heeft.

15

Ende dien is den menschen gheworden tot een vier des heerts, hy heefter aff ghenomen, endehy is werm gheworden, ende hy heuet ontsteken, ende heeft brooden ghebacken, maer van tgheen datter ouerde heeft hy eenen Godt ghewracht, ende hy heeften aenghebeden, hy heeft een ghesneden beelt ghemaect, ende hy heeft hem daer voer ghebuycht.

16

⁺Die heylicht van dien heeft hy metten vier verbrant, ende van sijn helicht heeft hy vleesch gheten, hy heeft een potagie ghecoect, ende hy is versaet gheweest, ende is verwermt, ende hy heeft gheseyt, Wel aen, ick ben werm gheworden, ick heb dat vier ghesien,

+ C

17

maer vant ouerblijfsel van dien heeft hy eenen Godt, ende een ghesneden beelt voer sij seluen ghemaect, hy wort daer voer ghebuycht, ende hy aenbiddet dat ende biddet segghende. Verlost my, want ghy sijt mijn Godt.

18

Sij en hebbens niet gheweten noch verstaen, want sij hebbent vergheten, dat hen ooghen niet sien en souden, ende dat sijt met hen herte niet verstaen en souden.

19

Sy en herdenckens in hen ghedachte niet, noch en bekennens niet noch sij en ghevuelens niet, dat sij segghen souden. Die helicht daer af heb ik metten viere verbrant, ende ick heb op sijn colen brooden ghebacken, ick heb vleesch ghecoect ende gheten, ende sal ik van datter ouert eenen affgodt maken? sal ick voer den block van eenen houte nederuallen?

20

Sijn een stuck is asschen, een onwijs herte heeft dat aenghebeden, ende hy en sal zijn ziele niet verlossen, noch hy en sal niet seggen. Bijauontueren isser een loghene in mijn rechte hant.

21

⁺Weest deser dinghen ghedactich Iacob ende Israel, want ghy sijt mijn dienaer, ick heb v ghemaect, mijn knecht sijdi Israel, en vergheet mijns niet.

+ D

22

Ic heb als een wolcke v boosheden wtghewischt, ende als eenen neuel v sonden. Keert wederom tot my, want ick heb v verlost.

23

Loeft ghy hemelen want die Heere heeft bermherticheyt ghedaen, maect iolijt ghy wterste van eertrijck, ghi berghen gheeft een wedergheluyt des loefs die bosscagie, ende alle sijn boomen, want die Heere heeft Iacob verlost, ende Israel sal glorieren.

24

Dit seyt die Heere v verlosser, ende v maker wten buyck. Ick ben die Heere alle dinghen doende, die hemelen wtspannende alleen, vast makende die eerde, ende niemand met my.

25

Van onweerden makende der waersegghers teekenen, ende die toouenaers in rasernie verkeerende. Keerende die wijse achterwaerts omme, ende hen wijsheyt dwaes makende.

26

Verweckende dwoert sijns knechts, ende den raet sijnder boden volbrenghende. Die tot Ierusalem segghe, Ghy sult bewoont worden, ende den steden van Iuda. Ghy sult opghetimmert worden, ende hen verwoeste plaetsen sal ick opwecken.

27

Die der diepten segghe, weest verlaten ende v vloeden sal ick drooghe maken.

28

Die Cyro segghe, Ghy sijt mijn herder, ende alle mijnen wille suldi volbrenghen. Die tot Ierusalem segghe ghy sult opghetimmert worden, ende den tempel. Ghy sult ghefundeert worden.