Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xliij. Capittel.

1

⁺ENde nu dit seyt die Heere sceppende v Iacob, ende makende v Israel. En wilt niet vreesen, want ick heb v verlost, ende ic heb v gheroepen met uwen naem, ghy sijt mijne.

+ A

2

Als ghy doer die wateren gaet, soo sal ick met v zijn, ende die vloeden en sullen v niet ouerdecken, als ghy int vier sult wandelen soo en suldi niet verbernen, ende die vlamme en sal in v niet bernen.

3

Want ick die Heere uwe Godt die heylighe van Israel v behouder hebbe tot uwe versoeninge gegeuen Egypten ende der Morianen lant, ende Saba voor v.

4

Om dat ghi eerlijc sijt geworden in mijn ooghen, ende glorioos, soo heb ic v lief ghehadt, ende ick sal die menschen gheuen voer v, ende die volcken voer v ziele.

5

En wilt niet vreesen, want ick ben met v, vanden oosten sal ick v saet aenbrenghen, ende vanden westen sal ic v vergaderen.

6

Ick sal den noorden segghen, Gheeft, ende den suyden. En willet niet beletten, brengt aen mijn sonen van verre, ende mijn dochteren van duyterste der aerden.

7

Ende alle den ghenen die mijnen naem aenroept dien heb ick tot mijnder glorien ghescapen, ic heb hem gheformeert, ende ghemaect.

8

Leydt buyten wt het blent volck ende dat ooghen heeft, het doof volck ende dat ooren heeft.

9

⁺Alle die volcken sijn vergadert te samen, ende die gheslachten zijn versaemt, wie onder v lieden mocht dit vercondighen, oft wie sal ons doen hooren die dinghen die dierste zijn? Laetse dier ghetuyghen gheuen, ende laetse gherechtuerdicht worden, ende laetse hooren ende segghen.

+ B

10

Warachtelijck, Ghy sijt mijn ghetuyghen, seyt die Heere, ende mijn knecht den welcken ik vercoren hebbe, op dat ghijt weten ende my gheloouen moecht, ende dat ghijt verstaen moecht, dat ict selue ben.

11

Voer my en is gheen Godt ghemaect ende nae my en salder gheen sijn. Ick ben, ick ben die Heere, ende daer en is sonder my gheen behouder.

12

Ick hebt vercondicht, ende behouden, ick hebt doen hooren, ende onder v lieden en heeft gheen vreemde gheweest. Ghy sijt mijn ghetuyghen, seyt die Heere, ende ick Godt.

13

Ende van tbeghinsel ben ik die selue, ende daer en is niemant die van mijnder hant verlosse, ick sal wercken, ende wie sal dat affkeeren?

14

⁺Dit seyt die Heere v verlosser, die heylighe van Israel. Om uwen wille heb ik in Babilonien ghesonden, ende ick heb alle die grendelen affgetrocken, ende die Chaldeen die in hen scepen glorieeren.

+ C

15

Ick ben die Heere uwe heylighe, sceppende Israel uwe coninck.

16

Dit seyt die Heere, die in die zee ghegheuen heeft eenen wech, ende in die wateren der beken eenen padt.

17

Die den waghen ende tpeert heeft wtgheleyt, die heyrscare ende den stercken, sij zijn te samen ontslapen, ende sij en sullen niet opstaen, sij zijn heel ghebroken als vlas, ende sij zijn wtgheblusscht.

18

En wilt niet ghedachtich wesen der voerleder dinghen, ende die oude dinghen en wilt niet aenmercken.

19

Siet ick make nieuwe dingen, ende die sullen nu opstaen, ghy sultse voerwaer kennen, ick sal in die woestijne eenen wech stellen, ende in die onbewandelde plaetse riuieren.

20

Die beeste des velts sal my glorificeren die draken ende struysen, om dat ick in die woestijne wateren ghegheuen hebbe, ende riuieren in die plaetse sonder wech, om dat ik soude te drincken gheuen mijnen volcke, mijnen wtuercorenen.

21

Dit volck heb ic voer my ghemaect, het sal mijnen loff vertellen.

22

Ghy en hebt my niet aengheroepen Iacob, noch ghy en hebt in my niet ghearbeyt Israel.

23

⁺Ghy en hebt my niet gheoffert den ram van uwen brantoffer, ende met uwen slachofferanden en hebdi my niet gheglorificeert, ick en heb v niet doen dienen in die offerande, noch ick en heb v gheenen arbeyt ghegheuen int wieroock.

+ D

24

Ghy en hebt my met ghelde gheenen calamus ghecocht, ende metten vette van uwen slachofferanden en hebdi my niet droncken ghemaect. Maer nochtans hebdi my doen dienen in v sonden, ghy hebt my arbeyt ghegheuen in v boosheden.

25

Ick bent, ick bent selue, die v boosheden wtwissche om mijnen wille, ende uwer sonden en sal ick niet ghedachtich wesen.

26

Brengt my wederom in tghedincken, ende laet ons te samen gheordeelt worden, vertellet eest dat ghy iet hebt, op dat ghy moecht gherechtuerdicht worden.

27

V vader heeft ierstmael ghesondicht, ende v beduyders hebben ouertreden teghen my.

28

Ende ick heb die heylighe princen beulect. Ic heb Iacob ghegheuen ter doodinghen, ende Israel ter blasphemien.