Den gheheelen Bybel, Inhoudende het oude ende nieuwe Testament (Leuvense bijbel 1548)

Het .xlij. Capittel.

1

⁺SIet, mijn knecht ende ick sal hem ontfanghen, mijn wtuercoren, in hem heeft mijn ziele haer seluen behaecht. Ick heb mijnen gheest ghegheuen op hem, hy sal doordel den Heydenen wtspreken.

+ A

2

Hy en sal niet roepen, noch gheenen persoon wtnemen, noch zijn stemme en sal buyten niet ghehoort worden.

3

Dat ghecrooct riet en sal hy niet heel in stucken breken, ende het rookende vlas en sal hy niet wtblusschen, inder waerheyt sal hy doordel wtbrenghen,

4

hy en sal niet droeue zijn, noch verstoorachtich tot dat hy doordeel op deertrijck stelle, ende zijn wet sullen die eylanden verwachten.

5

Dit seyt die Heere Godt sceppende die hemelen ende die wtreckende vast makende die eerde, ende tghene dat wt haer spruyt, gheuende adem den volcke dat op haer is, ende den gheest den ghenen die haer betreden.

6

Ick die Heere heb v gheroepen in die rechtuerdicheyt, ⁺ende ick heb v hant ghegrepen, ende ick heb v bewaert. Ende ick heb v ghegheuen tot een verbont des volcs, tot een licht der Heydenen.

+ B

7

Dat ghy opendoen soudt die ooghen der blenden, ende dat ghy wtleyden soudt wt die besloten gheuanghenisse den ghebonden, van den huyse des kerckers die daer sitten in duysternissen.

8

Ick die Heere dit is mijnen naem, Mijn glorie en sal ick niemant anders gheuen, ende mijnen loff den ghesneden affgods beelden.

9

Die dinghen dit dierste gheweest hebben siet die zijn ghecomen, nieuwe dinghen vercondighe ick oock, eer sij opstaen sullen soo sal ick v die doen hooren.

10

Singt den Heere een nieuwe liedt, sijnen loff van duyterste der eerden ghy die nederdaelt in die zee, ende haer volheyt, ghy eylanden ende haer bewoonders.

11

Laet opghehauen worden die woestijne, ende haer steden. Cedar sal in huysen woonen, loeft ghy bewoonders der steenroetsen, van den top der berghen sullen sij roepen.

12

Sij sullen den Heere glorie stellen, ende zijnen loff sullen sij in die eylanden vercondighen.

13

Die Heere sal als een stercke wtgaen, als een oorloochs man sal hy die toornicheyt verwecken, ⁺hy sal crysschen ende roepen, op zijn vianden sal hy versterct worden.

+ C

14

Ick heb altijt ghesweghen, ick heb stil gheweest, ic heb verduldich geweest, als een vrouwe die in barens noode is sal ic spreken. Ick sal verstroyen, ende opslinden te samen.

15

Ick sal woest maken die berghen ende die hueuelen, ende alle hen gras sal ic verdrooghen, ende ick sal die vloeden stellen tot eylanden, ende die staende wateren sal ic verdrooghen.

16

Ende ick sal die blende leyden inden wech die sij niet en kennen, ende in die paden die sij niet gheweten en hebben sal icse doen wandelen. Ick sal die duysternissen voer hen stellen tot een licht, ende die cromme plaetsen tot rechte, dese woerden heb ick hen ghedaen, ende ick en hebse niet verlaten.

17

Sij zijn achterwaerts ghekeert, laetse bescaemt worden met bescaemtheyt die betrouwen hebben in een ghesneden beelt, die den gheghoten beelde segghen, Ghy sijt onse goden.

18

Ghy dooue hoort, ende ghy blende siet op om te sien.

19

Wie isser blent, dan mijn knecht? ende wie isser doof, dan die totten welcken ick mijn boden ghesonden hebbe? Wie isser blent, dan die ghene die vercocht is? ⁺ende wie isser blent, dan des Heeren knecht?

+ D

20

Die veel dinghen siet, en suldy niet gedeslaen? die open ooren hebt, en suldi niet hooren?

21

Ende die Heere heeft ghewilt dat hy hem heylich maken soude, ende dat hy die wet groot achten soude ende verheffen.

22

Maer dat selue volck is berooft ende verwoest, eenen strick der ionghelinghen sij allegader, ende in die kerkers huysen zijn sij verborghen, sij zijn gheworden tot eenen roof, ende daer en is niemant diese verlosse, tot een beroouinghe ende daer en is niemant die segghe. Gheeft weder om,

23

Wie isser onder v lieden die dat hoore, aenmercke, ende luystere nae toecomende dinghen?

24

Wie heeft Iacob ghegheuen tot een beroouinge, ende Israel den verderuers? En is dat niet die Heere selue, wien wy ghesondicht hebben? Ende sij en heb-

[p. *578]

ben in zijn weghen niet willen wandelen, ende sij hebben zijn wet niet ghehoort.

25

Ende hy heeft op hem wtghestort die rasende gramscap van sijnder verbolgentheyt, ende een stercke orloghe, ende hy heeft hem verbrant int ronde, ende hy en heues niet gheweten, ende hy heeft hem ontsteken, ende hy en heues niet verstaen.