Den gheheelen Bybel, Inhoudende het oude ende nieuwe Testament (Leuvense bijbel 1548)

Het .xl. Capittel.

1

⁺VVort getroost, wort getroost mijn volck seyt v Godt,

+ A

2

Spreect tot Ierusalems herte, ende roeptse aen, want haer quaetheyt is voleyndt haer boosheyt is vergheuen, sij heeft van des Heeren handt dobbele ontfanghen voer allen haer sonden.

3

Daer is een stemme vanden roepende

[p. *576]

in die woestijne. Bereydt den wech des Heeren, maect recht in die woestijne ons Godts paden.

4

Alle valleye sal verheuen worden, ende alle berch ende hueuele sal vernedert worden, ende die cromme weghen sullen recht wesen, ende die scerpe plaetsen tot effen weghen.

5

Ende die glorie des Heeren sal gheopenbaert worden, ende alle vleesch sal tsamen sien dat des Heeren mont ghesproken heeft.

6

Een stemme van hem die segghende is, Roept. Ende ic heb gheseyt, ⁺Wat sal ick roepen? Alle vleesch is hoy, ende alle zijn glorie is als die bloeme des velts.

+ B

7

Het hoy is verdroocht, ende die bloeme is gheuallen, want den adem des Heeren heeft daer op gheblasen. Warachtelijck het volck is hoy,

8

het hoy is verdroocht ende die bloeme es gheuallen, maer dwoert ons Heeren blijft inder eewicheyt.

9

Opden hooghen berch climt ghy die Sion een blijde bootscap vercondicht, verheft met stercheyt v stemme die Ierusalem een blijde bootscap vercondicht, verheftse, en wilt niet vreesen. Segt den stede van Iuda. Siet v lieder Godt,

10

Siet die Heere die Godt sal met stercheyt comen, ende sijnen arm sal heerscappie hebben, ⁺siet sijnen loon is met hem, ende zijn werck voer hem.

+ C

11

Als een herder sal hy zijn cudde voeden, in zijnen arm sal hy die lammeren vergaderen, ende in zijnen scoodt sal hyse opheffen, die bevruchte sal hy selue draghen.

12

Wie heeft die wateren met een hant ghemeten, ende wie heeft den hemel met die palme gheweghen? Wie heefter met drie vingheren gheweghen die groote swaerheyt der aerden, ende wie heeft metten ghewichte die berghen gheweghen? ende die houelen in een waghe?

13

Wie heeft den gheest des Heeren gheholpen? oft wie heeft sijn raetsman gheweest, ende heuet hem ghetoont?

14

Met wien heeft hy raet ghehouden, ende wie heeft hem onderwesen? ende wie heeft hem geleert den padt der rechtuerdicheyt? ⁺ende hem gheleert die wetenheyt, ende heeft hem ghetoont den wech der voersienicheyt?

+ D

15

Siet, die Heydenen zijn gheacht als die druppel eens eemers, ende als dat minste der waghen, siet die eylanden sijn als cleyn stoff.

16

Ende Libanus en sal niet ghenoech wesen om te ontsteken, ende zijn beesten en sullen niet ghenoech wesen tot den brantoffer.

17

Alle die Heydenen als oft sij niet en waren, alsoo sijn sij voer hem, ende als niet ende ydelheyt, alsoo zijn sij van hem gheacht.

18

Wien hebdi dan Godt ghelijck ghemaect? oft wat beelt suldi hem stellen?

19

Heeft die beelt snijder dat ghesneden beelt ghemaect? oft heeft die goutsmit met gout dat ghefigureert, ende van silueren platen die silversmit?

20

⁺Een sterck ende onuerrottelijck hout heeft die wijse constenaer ghesocht, hy soect hoe dat hy dbeelt mocht stellen dat niet beroert en worde.

+ E

21

En weet ghijt niet, en hebdijt niet ghehoort? ende eest v niet vercondicht vant beghinsel? en hebdi niet verstaen die fundamenten der aerden?

22

Die opden omganck der eerden sidt, ende zijn bewoonders sijn als sprinchanen, die de hemelen wtrect als niet, ende spantse wt als een tente om daer in te woonen.

23

Die der secreten ondersoeckers gheeft als oft sij niet en waren, die rechters der aerden heeft hy als een ydel dinck ghemaect.

24

⁺Ende want haren tronck noch gheplant, noch ghesaeyt, noch ghewortelt en is gheweest in die aerde, sooheeft hy onuersienlijck op hen gheblasen, ende sij zijn verdroocht, ende den storenmden wint salse als een stroo wech voeren.

+ F

25

Ende by wien hebdi my gheleken, ende ghelijck ghemaect? seyt die heylighe.

26

Heft om hooghe uwe ooghen, ende besiet wie dese dinghen ghescapen heeft, die in ghetale hen heyrscare wtleydt, ende roeptse alle bij namen, van die menichte sijnder stercheyt ende machticheyt, ende sijnder cracht, soo en esser niet een ouerghebleuen.

27

Waer om segdi o Iacob, ende spreect ghy o Israel. Mijnen wech is verborghen voer den Heere, ende van mijnen Godt is het ordeel wech ghegaen?

28

⁺En weeti niet, oft en hebdijt niet ghehoort? Godt die eewighe Heere die ghescapen heeft die eynden der eerden, en sal niet crachteloos worden, noch arbeyden, ende daer en is gheen ondersoeckinghe van zijnder wijsheyt?

+ G

29

Die den vermoeydden cracht gheeft, ende den ghenen die niet en zijn, stercheyt, ende die cracht vermenichfuldicht.

30

Die kinderen sullen moede worden ende arbeyden, ende die ionghelinghen sullen in crancheyt vallen.

31

Maer die inden Heere hopen, sullen hen stercheyt veranderen, sij sullen vederen aennemen als des arents, sij sullen loopen, ende niet arbeyden, sij sullen wandelen ende niet almachtich worden.