Den gheheelen Bybel, Inhoudende het oude ende nieuwe Testament (Leuvense bijbel 1548)

Het .xxxix. Capittel.

1

⁺IN dien tijt heeft Merodach Baladan Baladans sone die coninc van Babylonien ghesonden brieuen ende ghiften tot Ezechiam. Want hy hadde gehoort dat hy sieck hadde gheweest ende ghenesen was.

+ A

2

Ende Ezechias is daer aff verblijdt gheweest, ende hy heeft hen ghethoont die apoteken der costelijcker specerien ende des siluers ende gouts, ende der welriekende cruyden, ende der alderbeste saluen, ende alle die scatcameren van sijne huysrade, ende alle datter gheuonden is in sijn scatten. ⁺Daer en was gheen dinc dat Ezechias hen niet en thoonde in sijn huys, ende in alle sijn macht.

+ B

3

Maer Isaias die propheet is inghegaen tot Ezechiam den coninck, ende hy heeft hem gheseyt. Wat hebben dese mannen gheseyt, ende van waer sijn die tot v ghecomen? Ende Ezechias heeft gheseyt. Van verren lande sijn sij ghecomen tot my, van Babilonien.

4

Ende hy heeft gheseyt. Wat hebben sij in v huys ghesien? Ende Ezechias heeft gheseyt. Alle dat in mijn huys is hebben sij ghesien, ⁺daer en is gheen dinck gheweest in mijn tresooren dat ic hen niet ghetoont en hebbe.

+ C

5

Ende Isaias heeft tot Ezechiam gheseyt. Hoort dat woort des Heeren der heyrscaren.

6

Siet die daghen sullen comen, ende alle dinghen die in v huys sijn sullen wechghenomen worden in Babilonien, ende dat v vaders tot scatten vergadert hebben tot op desen dach toe, daer en sal niet ghelaten worden seyt die Heere.

7

Ende van uwen sonen die van v comen sullen, ⁺die ghy sult ghewonnen hebben sullen si wech nemen, ende die sullen ghesneden camerlinghen sijn in des conincs van Babilonien pallays.

+ D

8

Ende Ezechias heeft gheseydt tot Isaiam. Dwoort des Heeren is goet dat hy ghesproken heeft. Ende hy heeft gheseyt. Latet alleen vrede ende warachticheyt worden in mijnen daghen.