Den gheheelen Bybel, Inhoudende het oude ende nieuwe Testament (Leuvense bijbel 1548)

Het .xxxviij. Capittel.

1

⁺IN dien daghen is Ezechias sieck gheweest totter doot toe. Ende tot hem is inghecomen Isaias Amos sone die propheet, ende hy heeft hem gheseyt. Dit seyt die Heere. Beschict v huys, want ghy sult steruen, ende niet leuen.

+ A

2

Ende Ezechias heeft zijn aensicht ommeghekeert teghen den wandt, ende heeft ghebeden totten Heere,

3

ende gheseydt. Ick bidde v hertelijck Heere weest doch ghedachtich hoe dat ick voor v ghewandelt hebbe inder waerheyt, ende in een volcomen herte, ende dat ick, tghene dat in v ooghen goet is, ghedaen hebbe. Ende Ezechias heeft gheweent met een groote weeninghe.

4

Ende dwoort des Heeren is ghesciet tot Isaiam, segghende.

5

Gaet ende segt Ezechie. Dit seyt die Heere Dauids ws vaders Godt. Ick heb v ghebedt ghehoort, ende v tranen ghesien, Siet ick sal tot uwen daghen toelegghen vijfthien iaren,

6

ende van die hant des conincs van Assyrien sal ick v verlossen, ⁺ende dese stadt ende ick sal die beschermen.

+ B

7

Maer dit sal v een teeken wesen vanden Heere, dat die Heere dit woort doen sal dat hy ghesproken heeft.

8

Siet ick sal doen weder om keeren die scaduwe der linien, waer door si neder ghedaelt was in Achaz vrewijser in die sonne achterwaerts thien linien. Ende die sonne is wederomme ghekeert thien linien door die graden waer door sij nederghedaelt was.

9

Dat ghescrift Ezechie des conincs van Iuda doen hi siec hadde gheweest, ende ghesont was gheworden van sijnder siecten.

10

Ick heb gheseyt, in die helicht mijnder daghen sal ic gaen tot die poorten der hellen, ick heb ghesocht het ouerblijfsel van mijnen iaren.

11

Ic heb gheseyt. Ic en sal den Heere mijnen God niet sien int lant der leuender, ic en sal gheenen mensch voorts meer sien, ende gheenen inwoonder der rusten.

12

⁺Mijn generatie is wechghenomen ende opghevouden van my als een hutte der herders mijn leuen is affghesneden als van eenen die weeft, doen ic noch begonste heeft hy my afghesneden, vanden morghenstont totten auont suldi my voleynden.

+ C

13

Ick hoepte totten morghenstont, als eenen leew soo heeft hy alle mijn ghebeente in stucken ghebroken, vanden morghenstont totten auont suldi my voleynden.

14

Als eender swaluwen ionck soo sal ick roepen, ick sal bedincken als een duyue, mijn ooghen zijn ghecrinct opwaerts siende nae die hoochden, Heere ick lijde gewelt, antwoort voor my.

15

Wat sal ick seggen, oft wat sal hi my antwoorden, als hijt selue ghedaen heeft? ick sal alle mijn iaren ouerdencken in die bitterheyt mijnder zielen.

16

⁺Heere ist datmen alsoo leeft, ende is in alsulcke dinghen dleuen mijns gheest, soo suldi my straffen, ende my leuende maken.

+ D

17

Siet inden vrede is mijn bitterheyt dalder bitterste, maer ghi hebt mijn ziele verlost dat sij niet vergaen en soude, ghy hebt achter uwen rugghe gheworpen alle mijn sonden.

18

Want die helle en sal v niet belijden, noch die doot en sal v niet louen, sij en sullen v waerheyt niet verwachten die inden poel nederdalen.

19

Die leuende, die leuende die sal v belijden, als ick heden ooc doe, die vader sal den kinderen te kennen gheuen uwe waerheyt.

20

Heere behoudt my, ende wij sullen onse psalter louen singhen, alle die daghen ons leuens in des Heeren huys.

21

Ende Isaias heeft gheboden dat si nemen souden eenen clont vijghen, ende dat die souden plaesteren op die wonde, ende dat die ghenesen soude worden.

22

Ende Ezechias heeft gheseyt. Wat sal het teeken sijn dat ic opgaen sal in des Heeren huys.