Den gheheelen Bybel, Inhoudende het oude ende nieuwe Testament (Leuvense bijbel 1548)

Het .xxxvij. Capittel.

1

⁺ENde tis ghesciet doent Ezechias die coninc ghehoort heeft, dat hy sijn cleederen ghescoort heeft, ende hy is omwonden gheweest met eenen sack, ende hy is gheghaen in des Heeren huys.

+ A

2

Ende hy heeft ghesonden Eliacim die hoofmeester was, ende Sobnam den scrijuer ende die ouders vanden priesteren, bedect met sacken tot Isaiam Amos sone den propheet,

3

ende sij hebben tot hem gheseydt. Dit seydt Ezechias. Eenen dach des verdriets ende der straffinghen ende der blasphemien is desen dach, want die kinderen sijn ghecomen tot barens toe, ende daer en is gheen macht om te baren.

4

Oft die Heere uwe Godt in eenigher manieren hoorde Rabsacis woorden den welcken die coninc van Assirien sijn Heere ghesonden heeft om te blasphemeren den leuenden Godt, ende om te bescimpen metten woorden die welcke die Heere v God ghehoort heeft, daerom heft op een ghebedt voor die bleuelinghen die daer gheuonden sijn.

5

Ende des conincs Ezechie dienaers sijn ghecomen tot Isaiam,

6

ende ⁺Isaias heeft tot hen gheseyt. Dit suldy uwen heere segghen. Dit seydt die Heere. En vreest niet van daensicht der woorden die ghy ghehoort hebt, met die welcke des conincs van Assirien knechten my gheblasphemeert hebben.

+ B

7

Siet ick sal hem eenen gheest gheuen, ende hy sal een bootscap hooren, ende hi sal wederkeeren nae sijn lant, ende ick sal hem doen nederuallen metten sweerde in zijn lant.

8

Maer Rabsaces is weder ghekeert, ende hy heeft den coninc van Assirien gheuonden strijdende teghen Lobnam, want hy hadde ghehoort dat hy vertrocken was van Lachis,

9

ende hi heefter ghehoort van Tharaca den coninc vander Morianen lant die seyden. Hi is wtghetrocken om teghen v te strijden. Dwelc als hy ghehoort hadde, soo heeft hy boden ghesonden tot Ezechiam segghende.

10

Dit suldi segghen Ezechie den coninck van Iuda sprekende. ⁺V God en bedrieghe v niet, daer ghy v in betrouwet segghende. Ierusalem en sal niet ghegheuen worden in die hant des conincs van Assirien.

+ C

11

Siet ghy hebt ghehoort alle dat die coninghen van Assirien ghedaen hebben alle den landen die sij omgheworpen hebben, ende suldi ghy moghen verlost worden?

12

Hebben die goden der Heydenen hen verlost, die mijn vaderen omgheworpen hebben Gozam, ende Haran, ende Reseph, ende die kinderen van Eden die in Thalassar waren?

13

Waer is die coninck van Emath ende van Arphad, ende die coninc der stadt Sepharuaim, Ana ende Aua?

14

Ende Ezechias heeft die brieuen ghenomen vander boden hant, ende hy heeft die ghelesen, ende is opghegaen in des Heeren huys, ende Ezechias heeft die wijdt open ghedaen voor den Heere.

15

Ende Ezechias heeft ghebeden totten Heere segghende.

16

Heere der heyrscaren Israels Godt, die bouen Cherubim sidt, ghi sijt alleen God van alle die rijcken des eertrijcs, ghi hebt ghemaect den hemel ende die eerde.

17

⁺Reycht Heere v oore ende hoort, opent Heere v ooghen ende siet, ende hoort alle Sennacheribs woorden die hy ghesonden heeft om te blasphemeren den leuenden Godt,

+ D

18

want warachtelijck Heere die coninghen van Assiri en hebben hen landen woest ghemaect ende hen lantscappen.

19

Ende sij hebben hen goden den viere ghegheuen, want ten waren gheen goden, maer wercken vander menschen handen, hout ende steen, ende sij hebben die heel in stucken ghebroken.

20

Ende nv Heere onse Godt behoudt ons van sijnder hant, ende laet alle die rijcken der eerden bekennen, dat ghy alleen die Heere sijt.

21

Ende Isaias die sone van Amos heeft ghesonden tot Ezechiam segghende. Dit seyt die Heere Israels Godt. Daer ghi my om ghebeden hebt van Sennacherib den coninck van Assirien.

22

Dit is dwoort dat die Heere ghesproken heeft ouer hem. V heeft versmaet ende v heeft bespot die maghet die dochter van Sion, achter v heeft haer hooft ghescudt die dochter van Ierusalem.

23

Wien hebt ghy bescimpt, ende wien hebt ghy gheblasphemeert, ende op wien hebdi v stemme verheuen, ende die hoocheyt uwer ooghen opgheheuen? ⁺Tot den heylighen van Israel.

+ E

24

Door die hant van uwen knechten hebdy den Heere beschimt, ende ghy hebt gheseyt. In die menichte van mijnen waghenen ben ick opgheclommen die hoocheyt der berghen, die hoochden van Libanus, ende ick sal affhouwen die hoochde sijnder cederboomen, ende zijn wtghecoren abeelboomen, ende ick sal ghaen op die hoocheyt van sijnen alderhoochsten top, dwout van sijnen Carmelus.

25

Ick heb ghegrauen ende water ghedroncken, ende ick heb metten voetstappe mijns voets wt ghedroocht alle die riuieren der dijcken.

26

En hebdy niet ghehoort wat ick in voortijden hem ghedaen hebbe? Van die oude daghen heb ick dat gheschapen, ende nv heb ict aenghebracht ende tis gheworden tot een wtwortelinghe der tsamen strijdender hueuelen, ende der vaster beslotender steden.

27

Haer bewoonders hebbende die handt ghecort hebben ghebeeft, ende sijn bescaemt gheweest, ende sij sijn gheworden alst hoy des velts, ende gras der weydden, ende tcruyt der daken, ⁺dwelck verdroocht is eert rijp worde.

+ F

28

V wooninghe ende uwen wtganck ende uwen inganc heb ick ghekent, ende v rasernie teghen my.

29

Als ghi raesdet teghen my, soo is v hoouerdie opgheclommen in mijn ooren, daerom sal ick eenen rinck in v nuesghaten stellen, ende eenen breydel in v lippen, ende ick sal v wederom leyden inden wech waer door ghy comen sijt.

30

Maer v sal dit een teeken wesen. Etet in dit iaer tghene datter van self wasset, ende int tweede iaer, eedt den oest, maer int derde iaer saeyt, ende maeyt, ende plant wijngaerden, ende eedt hen vruchten.

31

Ende tghene datter behouden sal wesen van thuys van Iuda ende datter ouerghebleuen is sal een wortel schieten nederwaerts, ende sal vrucht voortbrenghen opwaerts,

32

want van Ierusalem sullen bleuelinghen wtgaen, ende die behoudenisse vanden berch Sion, die ialoursie vanden Heere der heyrscaren sal dit doen.

[p. *575]

33

Daerom seyt dit dit Heere vanden coninck van Assyrien. Hy en sal in dese stadt niet comen ende hi en sal daer gheenen pijl op scieten, ende gheenen schilt en sal plaetse in haer crijghen, ⁺ende hy en sal in haren omganck gheenen wal maken.

+ G

34

Inden wech waer door hy comen is, daer door sal hy wederkeeren, ende in dese stadt en sal hy niet comen seyt die Heere.

35

Ende ick sal dese stadt beschermen, om die te behouden om mijnen wille, ende om Dauids mijns knechts wille

36

Ende die enghel des Heeren is wtghegaen, ende hy heefter gheslaghen in die heyrlegheren vanden Assiriers hondert ende vijfentachtentich duysent. Ende sij zijn des morghens opghestaen, ende siet het waren alle doode lichamen.

37

Ende hi is wtghegaen ende wechghereyst, ende Sennacherib die coninck van Assirien is wederghekeert, ende hy heeft ghewoont in Niniue.

38

Ende tis ghesciet, als hy inden tempel aenbadt Nesroch sijnen Godt dat Adramelech ende Sarasar zijn sonen hem metten swaerde gheslaghen hebben, ende zijn gheuloden int lant van Ararat, ende Asarhaddon zijn sone heeft in zijn stede gheregneert.