Den gheheelen Bybel, Inhoudende het oude ende nieuwe Testament (Leuvense bijbel 1548)

Het .xxxvi. Capittel.

1

⁺ENde tis gheschiet int veerthienste iaer des conincs Ezechie, dat opghecomen is Sennacherib die coninck van Assirien op alle die vaste steden van Iuda, ende heeft die inghenomen.

+ A

2

Ende die coninc van Assirien heeft Rabsacen van Lachis ghesonden tot Ierusalem aenden coninc Ezechiam met een swaer hant, ende hy heeft ghestaen inden waterloop vander ouersten piscijnen inden wech van des volders acker.

3

Ende tot hem is wtghegaen Eliacim die sone Helcie, die hoofmeester was, ende Sobna die scrijuer, ende Ioahe die sone Asaph die greffier

4

Ende Rabsaces heeft tot hen gheseyt. Seght Ezechie. Dit seydt die groote coninck, die coninck van Assirien. Wat betrouwen is dit daer ghy v op betrouwet?

5

by wat raet oft stercheyt schicte ghy v om wederspannich te zijn? op wien hebdy betrouwen, dat ghy van my ghescheyden sijt?

6

Siet ghy betrouwt v op desen ghebrokenen rietstock, op Egipten, opden welcken ist dat een mensch stuent, soo salt in zijn hant ghaen ende die doorsteken, alsoo is Pharao die coninck van Egipten alle den ghenen die op hem betrouwen.

7

⁺Maer eest dat ghy my antwoort, inden Heere onsen Godt hebben wij betrouwen, en is hy niet die ghene wiens hoochden ende outaren Ezechias affgheworpen heeft, ende heeft tot Iuda ende Ierusalem gheseyt. Voor desen outaer suldi aenbidden?

+ B

8

Ende nv gheeft v seluen ouer mijnen heere den coninck van Assirien, ende ick sal v gheuen twee duysent peerden, ende ghy en sult wt v die opsitters van die niet connen gheleueren.

9

Ende hoe suldi connen verdraghen daensicht des richters van eender plaetsen, van mijns heeren minste dienaers? Maer eest dat ghy v betrouwt op Egipten, op die waghenen ende int rosuolck,

10

ende nv ben ick sonder den Heere opghecomen tot dit lant dat ict verderuen soude? Die Heere heeft tot my gheseydt. Trect opwaerts op dit lant, ende verderft dat.

11

Ende Eliacim heeft gheseyt, ende Sobna ende Iohahe tot Rabsacen. Spreect tot uwen dienaers in Siriersche tale, want wij verstaen die, ⁺en spreect tot ons niet in Ioetscher talen in die ooren des volcks dat opden muer is.

+ C

12

Ende Rabsaces heeft tot hen gheseyt. Heeft mijn heere my ghesonden tot uwen heere ende tot v lieden dat ick alle dese woorden spreken soude, ende niet veel meer tot die mannen die opden muer sitten dat sij haren dreck eten souden, ende die pisse haerder voeten drincken met v lieden?

13

Ende Rabsaces heeft ghestaen, ende gheroepen met luyder stemmen in Ioetscher talen ende gheseyt. Hoort die woorden des grooten conincs des conincks van Assirien.

14

Dit heeft die coninck gheseydt. En laet Ezechias v niet verleyden want hy en sal v lieden niet connen verlossen

15

Ende Ezechias en gheue v gheen betrouwen opden Heere seggende. Verlossende sal ons die Heere verlossen, dese stadt en sal niet ghegheuen worden in die hant des conincs van Assirien.

16

En wilt Ezechieam niet hooren want dit seyt die coninc van Assirien. Doet met my een ghebenedijdinge, ⁺ende coemt wt tot my ende etet een ieghelijck sijnen wijngaert, ende een ieghelijck sijnen vijgheboom, ende drinct een ieghelijck dwater van sijnen put,

+ D

17

tot dat ick come ende v lieden hale tot een lant dwelc is ghelijck v lant, een tarwe lant

[p. *574]

ende wijn lant, een lant des broots, ende der wijngaerden

18

noch Ezechias en verstoore v lieden niet segghende. Die Heere sal ons verlossen. Hebben der Heydenen goden een iegelijc hen lant verlost wt die hant des conincs van Assirien?

19

Waer is die godt van Emath ende Arphad? waer is die godt van Sepharuaim? hebben si Samarien verlost wt mijn hant?

20

Wie isser van alle deser landen Goden die sijn lant verlost heeft wt mijn hant, dat die Heere Ierusalem soude moghen verlossen wt mijn hant?

21

Ende sij hebben ghesweghen, ende sij en hebben hem niet een woort gheantwoort, want die coninck hadde beuolen seggende. En antwoort hem niet.

22

Ende Eliacim die sone Helcie die hoofmeester was, is inghegaen, ende Sobna die scrijuer, ende Ioahe Asaphs sone die greffier, tot Ezechiam met ghescoorde cleederen ende sij hebben hem vercondicht Rabsacis woorden.