Den gheheelen Bybel, Inhoudende het oude ende nieuwe Testament (Leuvense bijbel 1548)

Het .xxxiij. Capittel.

1

⁺VVee v die rooft, en suldi oock niet berooft worden? ende die versmaedt, en suldi oock niet versmaedt worden? als ghy die beroouinghe voleyndt hebt, dan suldi berooft worden, als ghy vermoeydt sijnde ophouden sult van versmaden dan suldi versmaedt worden.

+ A

2

Heere ontfermt v onser, want v hebben wij verwacht, weest onsen arm des morghens, ende onse salicheyt inden tijt der tribulatien.

3

Van die stemme des enghels sijn die volcken gheuloden, ende van v verheffinge zijn die Heydenen verstroyet.

4

Ende v roouen sullen verghadert worden ghelijc die cruytwormen vergadert worden ghelijck als die grachten daer aff vol zijn.

5

Die Heere is groot gheworden want hy heeft ghewoont in die hoochde, hy heeft Sion veruult met ordeel ende met rechtuerdicheyt.

6

Ende tghelooue sal in v tijden wesen, die rijckdommen der salichheyt, die wijsheyt ende wetenheyt, die vreese des Heeren die is sijnen scadt

7

Siet die siende sullen buyten roepen, die enghelen des vreedts sullen bitterlijck weenen.

8

⁺Die weghen sijn verstroeyt, die wandelaer ouer den wech heeft gherust, tverbont is van onweerden ghemaect, hy heeft die steden verworpen, die menschen en heeft hi niet gheacht.

+ B

9

Die eerde heeft truerich gheweest ende is wtghequolen, Libanus is bescaemt gheweest, ende is heel doof gheworden, ende Saron is geworden ghelijc die woestijne ende Basan ende Carmelus sijn te samen ghescudt.

10

Nv sal ick opstaen seyt die Heere nv sal ick verheuen worden, nv sal ick opgheuoert worden.

11

Ghy sult hitte ontfanghen ende stroo baren, uwen gheest sal v als een vier verslinden.

12

Ende die volcken sullen zijn als asschen vanden brande, die vergaderde doornen sullen metten viere verbrant worden.

13

Hoort ghi lieden die verre sijt, wat dinghen ick ghedaen hebbe, ende bekent ghy naghebueren mijn stercheyt.

14

Die sondaers sijn in Sion veruaert gheweest, die beuinghe heeft die hypocriten beseten.

⁺Wie van v lieden sal moghen woonen met dat verslindende vier? wie van v lieden sal daer woonen met die eewighe hitten?

+ C

15

Die daer wandelt in rechtuerdicheden, ende spreect die waerheyt, die de ghiericheyt wech worpt wt valsche besculdinghe comende, ende sijn handen wtscudt van alle ghiften, die sijn ooren stopt dat hy gheen bloet en hoore, ende sijn ooghen sluyt dat hy gheen quaet en sie.

16

Dese sal in die hoochde woonen, die beheymde plaetsen der steenrootsen sijn zijn hoocheyt, dbroot is hem ghegheuen, sijn watere sijn ghetrouwe.

17

Sijn ooghen sullen den coninck in zijn cieraet sien, sij sullen deerde van verre sien.

18

V herte sal vreese bedencken. Waer is die gheleerde? waer is die wegher van die woorden der wet? waer is die leeraer der cleynder kinderen?

19

Dat onwijs volck en suldy niet sien, het volc van hoogher talen, alsoo dat ghy niet en sult moghen verstaen die constelijcke behendicheyt van sijn tonghe, ⁺daer gheen wijsheyt in en is.

+ D

20

Aensiet Sion die stadt van onser hoochtijt, v ooghen sullen Ierusalem sien die rijckelijcke wooninghe, het tabernakel dat gheensins en sal moghen veruoert worden, noch sijn nagelen en sullen niet wechghenomen worden inder eewicheyt, ende alle sijn coordekens en sullen niet ghebroken worden,

21

want aldaer is alleen heerlijck onse Heere, als een plaetse der vloeden, die alderbreetste ende openbaer riuiere, door haer en sal gheen barge der roeren dooruaren, noch gheen groote galeye en sal daer ouer varen.

22

Want die Heere is ons rechter, die Heere is onse wetgheuer, die Heere is ons coninck, hy sal ons salich maken.

23

V zeelkens zijn ontspannen, maer sij en sullen niet sterck ghenoech wesen uwen mastboom sal alsoo wesen, dat ghy v teeken niet en sult moghen verbreyden.

Dan sullen die bueten van veel roouen ghedeylt worden, die cruepelen sullen den roof wechroouen.

24

Noch die gebuer en sal niet segghen. Ick ben onmachtich gheworden, des volcs dat daer in woont sal zijn ongherechticheyt van hem ghenomen worden.