Den gheheelen Bybel, Inhoudende het oude ende nieuwe Testament (Leuvense bijbel 1548)

Het .xxxij. Capittel.

1

⁺SIet die coninck sal in rechtuerdicheyt regneren, ende die princen sullen int ordeel douerste sijn.

+ A

2

Ende die man sal wesen als die verborghen wordt vanden wint, ende die hem verborght van dat onweder, ghelijc die riuieren der wateren in den dorst, ende die schaduw van een hooch wtstekende steenrootse in een woest lant.

3

Die ooghen der sienders en sullen niet verduysteren, ende die ooren der hoorders sullen naerstelijck toehooren.

4

Ende therte der dwaser sal die wetenheyt verstaen, ende die tonghe der stamelaers sal rasschelijck ende bescheydelijck spreken.

5

Die ghene die onwijs is en sal voortaen niet meer prince ghenoemt worden, noch die bedrieghelijcke en sal niet meer ouerste heeten,

6

⁺Want die dwaes sal sotternien spreken, ende sijn herte sal boosheyt doen, op dattet volbrenghen mach die gheueynstheyt, ende spreke tot den Heere bedrieghelijck, ende dat hy ydelmake die ziele vanden hongherighen, ende dat hy den dranck den dorstighen ontrecke.

+ B

7

Die ghereetscappen vanden bedrieghelijcken sijn die alderquaetste, want hy heeft ghedachten by een gheraemt om die saechtmoedighe te verderuen door die loghentale, als die arme ordeel sprack.

8

Maer die prince sal dencken sulcke dinghen die eenen prince betamen, ende hy sal ouer die vorsten staen.

9

Ghy rijcke vrouwen staet op, ende hoort mijn stemme, ghy betrouwende dochteren vaet metten ooren mijn wtsprake,

10

⁺want nae de daghen ende dat iaer sulde ghy betrouwende heel ontstelt worden, want die wijnsnijdinghe is volbracht, die verghaderinghe en sal voortaen niet meer comen.

+ C

11

Verwondert v ghy rijcke vrouwen, wert heel verbaest ghy betrouwende, ontcleedt v ende wort bescaemt, omgort v lendenen.

12

Ouer die borsten maect rouwe, ouer dat lustich

[p. *572]

lantscap, ouer den vruchtbaren wijngaert.

13

Op mijns volcs aerde sullen dornen ende bramen opcomen, hoe veel te meer op alle die huysen der blijscap van die verhueghende stadt?

14

Want het huys is verlaten, die menichte der stadt is ghelaten, duysternissen ende tastinghen sijnder gheworden ouer die speluncken tot inder eewicheyt. ⁺Die blijscap der wilder esels is die weyde der cudden,

+ D

15

tot dat op ons ghestort worde den gheest wten hooghen, ende die woestijne sal wesen in Charmel, ende Charmel sal voor een wout gherekent worden.

16

Ende het ordeel sal in die woestijne woonen ende die rechtuerdicheyt sal in Charmel sitten.

17

Ende dwerc der rechtverdicheyt sal vrede wesen, ende die oeffeninghe der rechtuerdicheyt stille swijghen, ende vrijcheyt tot inder eewicheyt.

18

Ende mijn volc sal sitten in die schoonheyt des vreedts, ende in die tabernakelen des betrouwens, ende in een rijckelijcke ruste,

19

Maer den haghel int neder vallen des wouts, ende met een vernederinghe sal die stadt vernedert worden.

20

Salich sijdi die daer saeyt op alle wateren, daer in sendende den voet vanden osse ende vanden esele.