Den gheheelen Bybel, Inhoudende het oude ende nieuwe Testament (Leuvense bijbel 1548)

Het .xxxi. Capittel.

1

⁺VVee den ghenen die neder dalen in Egipten ter helpen in die peerden hopende, ende betrouwen hebbende op die waghenen om dattervele is, ende op die ruyters te peerde, om dat sij bouen maten seer machtich sijn, ende sij en hebben gheen betrouwen ghehadt opden heylighen van Israel, ende den Heere en hebben si niet versocht.

+ A

2

Maer die selue wijse heuet quaet aenghebracht, ende sijn woorden en heeft hy niet wechghenomen, ende hy sal opstaen teghen thuys der alderquaetsten, ende teghen die helpe der gheender die boosheyt doen,

3

die ⁺Egiptenaer is een mensch, ende niet God ende hen peerden sijn vleesch, ende niet eenen gheest, ende die Heere sal zijn hant buyghen, ende die helper sal ter nedervallen, ende hy sal vallen dien de helpe ghedaen wort, ende sij sullen alle te samen vernielt worden.

+ B

4

Want dit seyt die Heere tot my, ghelijck oft eenen leeuw brieschede ende eens leeuws welpen ouer sijnen roof, als hem te ghemoete coemt een menichte der herderen, ⁺niet en sal van hen stemme veruaert sijn, ende van hen menichte niet en sal verschrict zijn, alsoo sal die Heere der heyrscharen neder dalen om te strijden opden berch Sion, ende op sijnen hueuele.

+ C

5

Ghelijck vlieghende voghelen alsoo sal die Heere der heyrscaren Ierusalem bescermen bescermende ende verlossende, doorgaende ende behoudende.

6

Bekeert v wederom ghelijck ghy in die diepte wechghegaen waert ghy kinderen van Israel,

7

want in dien dach sal een man wech worpen die affgodts beelden van sijnen siluere, ende die affgodts beelden van sijnen goude, ⁺die v handen v lieden ghemaect hebben tot sonden.

+ D

8

Ende Assur sal vallen doort tsweert, niet des mans, ende tswaert niet des menschen sal hem verslinden, ende hy sal vlieden niet van daensicht des sweerts, ende sijn ionghelinghen sullen tribuyt gheuen,

9

ende sijn sterckheyt sal van veruaertheyt wech gaen. Ende sijn princen vliedende sullen beuen, heeft die Heere gheseyt, wiens vier is in Sion, ende wiens ouen is in Ierusalem.