Den gheheelen Bybel, Inhoudende het oude ende nieuwe Testament (Leuvense bijbel 1548)

Het .xxxiiij. Capittel.

1

⁺COemt aen ghy Heydenen, ende hoort, ende ghy volcken aenmerct, laetet die eerde hooren ende haer volheyt, dat eertrijck ende alle haer spruytsel,

+ A

2

Want die verbolgentheyt des Heeren is ouer alle die Heydenen, ende zijn rasende gramschap op alle haer heyr, hy heeftse ghedoodt ende hy heeftse gheleuert ter doodinghen.

3

Hen ghedoodde sullen verworpen worden, ende van haren dooden lichamen sal eenen stanck opgaen, die berghen sullen verrotten van haren bloede.

4

Ende alle die heyrschare der hemelen sal verdwijnen, ende die hemelen sullen tsamen gheuouwen worden als eenen boeck, ende alle hen heyrschare sal affuallen, ghelijck het loof aff valt vanden wijngaert ende vanden vijgheboom,

5

want mijn sweert is inden hemel droncken gheworden, siet het sal op Edom neder dalen, ende opt volck van mijnder doodinghen ten ordeele.

6

Tsweert des Heeren is veruult met bloede, ⁺tis vet gheworden vanden vette des inghewandts, vanden bloede der lammeren ende der bocken, van den bloede der ghemerchder rammen, want die slachofferande des Heeren is in Bosra, ende eenen grooten dootslach in dlant van Edom.

+ B

7

Ende die eenhorens sullen neder dalen met hen, ende die stieren metten machtighen, hen landt sal heel droncken worden vanden bloede, ende hen eerde van dat roet der vetten,

8

want dits den dach van des Heeren wrake, het iaer van die vergheldinghen des ordeels van Sion.

9

Ende haer beken sullen verkeert worden in peck, ende haer eerde in solfer,

[p. *573]

ende hen lant sal wesen tot berrende peck.

10

Nacht ende dach en salt niet wtghebluscht worden, inder eewicheyt sal haren roock opgaen, van gheslachte tot gheslachte salt verwoest worden, ⁺in die eewe der eewen en salder niemant door haer gaende wesen.

+ C

11

Ende haer sullen besitten den ezelscreyer, ende den egele, ende den ibis ende die raue sullen daer in woonen ende ouer haer sal een mate ghetrocken worde datse te niet ghebracht worde, ende een meet coordeken ter verwoestinghen,

12

haer edele en sullen daer niet sijn den coninck sullen si meer aenroepen, ende allen haer princen sullen te niete zijn.

13

Ende in haer huysen sullen wtcomen dornen ende netelen, ende stekeldoornen in haer vesten, ende tsal wesen tot een rustplaetse der draken, ende een weyde der struysen.

14

Ende die duyuelen sullen daer te ghemoete comen, ⁺den ezelstier ende den wilden ghehaerden man sal daer roepen deen tseghen den anderen, daer heeft die nachtvrouwe oock gheleghen, ende heeft voor haer ruste gheuonden.

+ D

15

Daer heeft den eghel een hol vonden, ende heeft daer sijn ionghen opgheuoedt, ende heeft daer rontsomme ghegrauen ende ghebroedt in haer scaduwe, daer sijn die wouwen vergadert deen totten anderen.

16

Ondersoecket neerstelijck inden boeck des Heeren, ende leest, daer en heeft niet een van dien ghebroken, deen en heeft den anderen niet ghesocht, Want dat wt mijnen mont coemt, dat heeft hy beuolen, ende sijnen gheest die heeftse vergadert

17

ende hy heeft hen dlot gheworpen, ende sijn handt heeftse hen ghedeelt by maten, tot inder eewicheyt sullen sij die besitten, van gheslachte tot gheslachte sullen sij in haer woonen.