Den gheheelen Bybel, Inhoudende het oude ende nieuwe Testament (Leuvense bijbel 1548)

Het .xxix. Capittel.

1

⁺VVee Ariel die stadt die Dauid verwonnen heeft, dat iaer is totten iare ghedaen, die hoochtijden zijn gheheel voorleden.

+ A

2

Ende ick sal Ariel rontsomme met wallen belegghen, ende û sal droeuich zijn ende truerende, ende tsal my zijn als Ariel.

3

Ende ick salt omringhen als eenen ronden rinck in uwen omganck, ende ic sal teghen v eenen wal legghen ende ick sal stercke bolwercken legghen om v te belegheren.

4

Ghy sult vernedert worden, vander aerden suldi spreken, ende vander aerde sal v sprake ghehoort worden, ende v stemme sal wesen als eens waersegghers vander eerden, ende v wtsprake sal vander eerden heymelijck veselen.

5

⁺Ende die menichte der gheender die v verwaeyen sal zijn als dunne ghestubbe ende als een doorgaende voncke, die menichte der gheender die teghen v douerhant ghehadt hebben,

+ B

6

ende tsal wesen onuersienlijc ter stont. Vanden Heere der heyrscaren sal sij gheuisenteert worden, inden dondere, ende beuinghe der aerden, ende in een luyde stemme des storm wints ende tempeests, ende der vlammen des verslindende viers.

7

Ende als eenen droom van des nachts visioen sal wesen die menichte van allen die Heydenen die ghestreden hebben teghen Ariel, ende alle die ghestreden hebben, ende beleydt hebben, ende teghen haer douerhant ghecreghen hebben.

8

⁺Ende ghelijc een

+ C

[p. *570]

hongherich mensch droomt dat hy eedt, maer als hi ontspronghen is, soo is zijn ziele ydel, ende ghelijck die dorstighe droomt dat hy drinct, ende als hy ontspronghen is, soo heeft hy mat sijnde noch dorst, ende sijn ziele is ydel, alsoo sal die menichte alle der Heydenen sijn, die ghestreden hebben teghen den berch Sion.

9

Weest verbaest, ende verwondert v. Weest twantelende ende wanckelbaer, wert droncken, ende niet van wijne, ⁺wert beroert, ende niet van dronckenheyt,

+ D

10

want die Heere heeft v lieden ghemenght den gheest des slapens, hy sal v ooghen sluyten, v propheten ende princen die visioenen sien, sal hy bedecken.

11

Ende het visioen van allegader sal v wesen als woorden van eenen gheslotenen boeck, den welcken alsmen gheuen sal den ghenen die letteren kent, soo sullen sij segghen. Leest desen, ende hy sal antwoorden. Ick en mach, want hy is ghesloten.

12

Ende den boeck sal ghegheuen worden eenen die gheen letteren en kent, ende men sal hem segghen. Leest, ende hy sal antwoorden, ic en ken gheen letteren.

13

Ende die Heere heeft gheseyt. Om dat dit volc by naket met sijnen monde ende met sijnen lippen my gheglorificeert, ⁺maer sijn herte is verre van my, ende sij hebben my gheureest met der menschen ghebodt, ende leeringhen.

+ E

14

Daerom siet ic sal daer toe doen, dat ick verwonderinghe maken sal desen volcke met een groot ende veruaerlijck myrakel, want die wijsheyt sal vergaen van sijnen wijsen, ende tverstant van sijnen verstandighen sal verberghen worden.

15

Wee v die diep van herten sijt, dat ghy voor den Heere den raet verbercht, der welcker wercken sijn in duysternissen ende sij segghen. Wie siet ons, ende wie kent ons?

16

Verkeert is dit v lieder ghedachte, Recht oft die potaerde tseghen den potbacker dachte, ende dat een werck seyde tot sijnen makere. ⁺Ghi en hebt my niet gemaect, ende dat het eerdewerc seyde tot sijnen makere. Ghy en verstaet niet.

+ F

17

En sal Libanus noch corts ende binnen eenen cleynen tijt niet verkeert worden in Charmel, ende en sal Charmel niet tot een wout gheacht worden?

18

Ende op dien dach sullen die doouen die woorden vanden boec hooren, ende van donckerheyt ende neuel sullen die ooghen der blenden sien.

19

Ende die saechtmoedighe sullen blijschap daer toe doen inden Heere, ende die arme menschen sullen inden heylighen van Israhel hen verhueghen.

20

Want hy is machteloos gheworden die te voeren douerhant hadde, die bespotter is voleynt, ende sij sijn alle affghehouwen die daer waecten op die ongherechticheyt,

21

⁺die de menschen deden sondighen metten woorde, ende vertreedden den ghenen die in die poorte strafte, ende sij hebben te vergheefs gheweken vanden gherechten.

+ G

22

Daerom dit seyt die Heere totten huyse van Iacob die Abraham verlost heeft. Nv en sal Iacob niet bescaemt worden ende nv en sal sijn aensicht niet root van schaemten worden,

23

maer als hy sijn kinderen sien sal, die wercken mijnder handen, int midden van hen sijnen naem heylichmakende, ende sij sullen heylich maken den heylighen van Iacob, ende Israels Godt sullen sij vercondighen,

24

ende die ghene die metten gheest dolen sullen tverstant weten, ende die oorblasers sullen die wet leeren.