Den gheheelen Bybel, Inhoudende het oude ende nieuwe Testament (Leuvense bijbel 1548)

Het .xxviij. Capittel.

1

⁺VVee der croonen der hoouerdien, den dronckenen van Ephraim, ende der aff vallender bloemen der glorien van haren verhueghen, die daer waren opden tsop der alder vetster valleyen dwalende van den wijne.

+ A

2

Siet die machtighe ende stercke Heere, ghelijck dat ghedruysch des haghels eenen brekenden storm wint, ghelijc het ghewelt van veel wateren oueruloedende, ende wt ghelaten ouer een wijdt lant.

3

Metten voeten sal vertreden worden die croone der hoouerdien van die dronckene van Ephraim.

4

Ende die bloeme van die glorie sijns verhueghens sal affuallende zijn, die daer is opden top van die vette valley, als die vroechtijdighe vrucht voor die rijpicheyt des herfts, dwelck als die siender aensien sal soo sal hy dat verslinden ter stont als hijt metter hant houden sal.

5

⁺In dien dach sal die Heere der heyrscharen wesen een croone der glorien, ende eenen crans des verhueghens, den ouer blijfsel van sijnen volcke,

+ B

6

ende eenen gheest des ordeels den ghenen die sidt op den rechterstoel, ende een stercheyt den ghenen die wederkeeren vander oorloghen ter poorten.

7

Maer dese en hebbens oock om des wijns wille niet gheweten, ende van dronckenheyt hebben sij ghedoelt, die priester ende die propheet en hebbens van dronckenheyt niet gheweten, sij zijn opghesopen van wijne, sij hebben ghedwaelt in die dronckenheyt, sij en hebben niet ghekent den siender, sij en hebben het ordeel niet gheweten,

8

⁺Want alle die tafelen zijn vol wtbrakinghe ende vuylicheden, alsoo datter voorts gheen plaetse meer en was.

+ C

9

Wien sal hy wetenheyt leeren? ende wien sal hy tghehoor doen verstaen? die ghespeende vanden melcke, die affghetrockenen van die borsten,

10

want ghebiet herbiedt, ghebiet herbiedt, ontbeyt herontbeyt, ontbeyt herontbeyt, een luttel daer, een luttel daer,

11

want met die spake der lippen, ende met een ander tonghe sal hy spreken tot desen volcke,

12

den welcken hy gheseyt heeft. Dit is mijn ruste, vermaect den vermoeyden, ende dat is mijn vercoelinghe, ende sij en hebbens niet willen hooren.

13

Ende dwoort des Heeren sal hen wesen. Ghebiedt herbiedt, ghebiedt herbiedt, ontbeyt herontbeyt, ontbeyt herontbeyt, ⁺een luttel daer een luttel daer, op dat sij gaen ende vallen achterwaerts ende dat sij heel ghebroken worden ende ghestrict, ende gheuanghen worden.

+ D

14

Daerom hoort het woort des Heeren ghy spottende mannen die heerscappie hebt ouer mijn volck dat in Ierusalem is,

15

Want ghy hebt gheseydt. Wij hebben een verbondt gheslaghen metter doot, ende metter hellen hebben wij een voorwaerde ghemaect. Die oueruloedende gheessele wanneer sij doorgaen sal, soo en sal die op ons niet comen, want wi hebben die loghene onse hope ghestelt, ende metter loghenen sijn wij bescermt gheweest.

16

Daerom dit seyt die Heere Godt. Siet ick sal in die fundamenten van Sion eenen steen legghen, eenen gheproefden costelijcken hoecsteen, int fundament gefundeert, ⁺diet gelooft die en sij niet haestich.

+ E

17

Ende ick sal doordeel int ghewicht stellen, ende die rechtuerdicheyt in die mate ende den haghel sal omworpen die hope der loghenen ende die wateren sullen die bescerminghe oueruloeden.

18

Ende v verbont metter doot sal te niet ghedaen worden, ende v voorwaerde metter hellen en sal niet staende blijuen als die oueruloedende gheessele doorgaen sal, soo suldy dien tot een vertredinghe wesen.

19

Soo wanneer dat die gheessel door ghegaen sal wesen, soo sal sij v wechnemen, Want des morghens vroech inden dagheraet sal sij doorgaen inden dach ende inden nacht, ende alleenlijck die quellinghe sal alleen den ghehoore verstant gheuen,

20

⁺Want dat bedde is benauwet, alsoo dat die eene moet afuallen, ende den corten mantel en machse beyde niet bedecken,

+ F

21

want de Heere sal staen ghelijck opden berch der deylinghen, ghelijc hy in die valleye die in Gabaon is gram sal wesen om dat hy sijn werck maken soude, sijn werc is vreemt, op dat hy sijn werc wercken soude, sijn werck is vreemt van hem.

22

Ende nv en wilt niet bespotten dat by auontueren v banden niet toegestrict en worden, want een voleyndighe ende een vercortinghe heb ick ghehoort vanden Heere der heyrscaren op alle daertrijck.

23

Vaet metten ooren, ende hoort mijn stemme, luystert toe, ende hoort mijn wtsprake.

24

Sal die ploeghende alle den dach ackeren om te saeyen, ende sijn eerde doorsnijden ende grauen?

25

En sal hy (als hy haer ouerste effen gemaect heeft) daer niet gith saeyen ende comijn spraeyen, ⁺ende tarwe stellen by ordene, ende gherste ende milie saet, ende vitsen aen zijn eynden?

+ G

26

Ende hy sal hem onderwijsen int ordeel, zijn Godt sal hem leeren,

27

want dat gith en sal met gheenen saghen wtghedorsschen worden, noch dat radt vanden dorschwaghen ende sal ouer dat comijn niet omgaen, maer met een roede sal dat gith wtghedorsschen worden, ende het comijn met eenen stocke,

28

Maer het broot sal heel in stucken ghebrijselt worden, maer die dorsscher en sal dat inder eewicheyt niet dorsschen, noch dat radt van den dorschwaghen en sal dat niet quellen, noch met sijnen clauwen en sal hy dat niet heel in stucken breken.

29

Ende dat is vanden Heere der heyrscaren wtghegaen, om dat hy den raet soude wonderlijck maken, ende groot maken die rechtuerdicheyt.