Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvij. Capittel.

1

⁺IN dien dach sal die Heere besoecken met sijnen harden ende grooten ende stercken swaerde, ouer Leuiathan dat serpent, lanck als eenen hantboom, ende ouer Leuiathan dat cromme serpent, ende hy sal dooden den waluisch die in die zee is.

+ A

2

In dien dach sal den wijngaert vanden pueren wijn hem singhen.

3

Ic ben die Heere die dien bewaere, haestelijck sal ick hem scincken, op datmen by auontueren teghen hem niet en versoecke, nacht ende dach bewaere ick hem.

4

My en is gheen verbolghentheyt. Wie sal my gheuen tot een brame ende dorne inden strijdt, dat ic ouer hem ghinc, ick sal hen tsamen verbranden?

5

⁺Oft sal hy lieuer mijn sterckheyt houden, sal hy my vrede maken, vrede sal hy my maken?

+ B

6

Die met een weldich ghedruysch inghaen tot Iacob, Israhel sal bloeyen ende groeyen, ende si sullen daensicht der werelt veruullen met sade.

7

Heeft hy hem gheslaghen na die wonde des gheens die hem sloech? oft is hi ghedoot ghelijc hy zijn ghedoodde doot gheslaghen heeft?

8

In die mate teghen die mate suldi haer (als si verworpen is) ordeelen. Sij heuet ouerdacht in haren harden gheest door den dach der hitten.

9

⁺Daerom sal hier ouer vergheuen worden die ongherechticheyt den huyse van Iacob, ende dits alle die vrucht dat zijn soude afghenomen worde, als hy alle die steenen des outaers sal ghesteldt hebben als ghestooten asschen steenen, die bosschelkens ende die affgoden tempelen en sullen niet staen,

+ C

10

Want die vaste stadt sal verwoest sijn, die schoone sal ouerblijuen ende verlaten worden als die woestijne, daer sal dat calf weyden, ende daer salt rusten ende verteeren sijn opperste taxkens.

11

In die droochte sullen hen oochsten heel verdoruen worden, soo die vrouwen comen, ende hen leeren, want ten is gheen wijs volck, ⁺daerom en sal hy sijns niet ontfermen die hem ghemaect heeft, ende diet ghescapen heeft en sal hem niet sparen.

+ D

12

Ende tsal wesen in dien dach, dat die Heere slaen sal vanden gront des vloets tot die

[p. *569]

beke van Egipten, ende ghy sult vergadert worden een, ende een ghy kinderen van Israel.

13

Ende tsal zijn in dien dach datmen blasen sal met een groot trompet, ende sij sullen comen die verloren waren van dlant der Assirianen, ende die verdreuen waren wten lande van Egipten, ende sij sullen den Heere aenbidden inden heylighen berch in Ierusalem.