Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvi. Capittel.

1

⁺IN dien dach sal dit liedeken ghesonghen worden int lant van Iuda. Die stadt onser stercheyt Sion die salichmaker sal in haer gestelt worden tot eenen muer, ende tot een voorborcht.

+ A

2

Doet open die poorten, ende laet incomen dat rechtuerdich volck bewarende die waerheyt.

3

Die oude dolinghe is wech ghegaen, ghy sult den vrede houden, den vrede want wij hebben in v ghehoept.

4

Ghy hebt ghehoept inden Heere, in die eewige tijden. Inden Heere den stercken Godt inder eewicheyt.

5

Want hi salse nedercrommen die daer woonen in die hoochde, die hooghe stadt sal hy vernederen, hy salse vernederen totter eerden toe, hy salse ter neder trecken totten ghestubbe toe.

6

Den voet salse vertreden, die voeten vanden armen, die ganghen der allendigher.

7

⁺Den padt vanden rechtuerdighen is recht, recht is den toepadt vanden rechtuerdighen om te wandelen.

+ B

8

Ende inden padt uwer ordeelen Heere hebben wi v verbeydt, uwen naem, ende v ghedenckenisse indie begheerte der zielen.

9

Mijn ziele heeft v begheert des nachts, maer oock in mijnen gheest in mijn binnenste sal ick des morghens tot v waken, als ghy v ordeelen sult ghedaen hebben op deerde, soo sullen die bewoonders der eerden rechtverdicheyt leeren.

10

Laet ons bermhertich wesen den ongoddelijcken, ende hy en sal gheen rechtuerdicheyt leeren int lant der heylighen heeft hy boose dinghen ghedaen, ende hi en sal die glorie des Heeren niet sien.

11

Heere laet v hant verheuen worden, ende dat sijt niet en sien, laetse sien ende laetse bescaemt worden die benijdende volcken, ⁺ende laet het vier uwe vianden verslinden.

+ C

12

Heere ghi sult ons vrede gheuen, want allen onse wercken hebdi ons ghewracht.

13

Heere onse Godt, ons hebben Heeren beseten sonder v, alleenlijc laet ons in v ghedachtich wesen ws naems.

14

Die steruende en laet niet leuen, die ruesen en laet niet verrijsen, daerom hebdise besocht ende vernielt, ende hebt te niet ghedaen alle hen gedenckenisse.

15

Ghy hebt den volcke toeghegheuen Heere, ghy hebt den volcke toe ghegheuen, sijdi oock gheglorificeert? ghy hebt verlengt alle die eynden der aerden

16

Heere in die benautheyt hebben sij v ghesocht, in die tribulatie der murmuratien is hen uwe leeringhe.

17

Ghelijck een die ontfanct, als sij ghenaect is by der baeringhen, soo roept sij pijn lijdende in haer pijnen, alsoo zijn wij gheworden van v aensincht Heere.

18

⁺Wij hebben ontfanghen ende als barende gheweest, ende wij hebben ghebaert den gheest, wij en hebben gheen salicheden ghedaen op daerde, daerom en sijn die bewoonders der eerden niet gheuallen.

+ D

19

V dooden sullen leuen, mijn verslaghene sullen verrijsen, ontwaect, ende loeft ghi die int ghestubbe woont want den dauwe des lichts is uwen dauwe, ende dlant der ruesen suldi neder trecken ten valle.

20

Gaet henen mijn volck gaet binnen in v slaepcameren, sluyt v doeren op v, verbercht v een weynich tot eenen ooghenblick, tot dat mijn verbolgentheyt voorby gae.

21

Want siet die Heere sal wtgaen wt zijn plaetse, dat hy besoecke die ongherechticheyt vanden bewoonder der eerden teghen hem, ende deerde sal haer bloet ontdecken, ende si en sal niet meer haer verslaghene bedecken.