Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxv. Capittel.

1

⁺HEere ghy sijt mijn Godt, ick sal v verheffen ende uwen naem belijden, want ghy hebt wonderlijcke dinghen ghedaen, oude ghetrouwe ghedachten amen.

+ A

2

Want ghy hebt die stadt ghestelt tot eenen hoop, ende die stercke stadt tot een veruallinghe, tot een huys der vreemder alsoo dat gheen stadt en si, ende dat die inder eewicheyt niet opghetimmert en worde.

3

Daer ouer sal v louen dat sterc volc, die stadt der machtigher luyden sal v vreesen,

4

want ghy zijt gheworden den arme stercheyt, stercheyt den

[p. *568]

behoeftighen in sijn tribulatie, ⁺een hope vanden storm een lommer makende decsel van die hitte, want den gheest der machtigher is als eenen stormenden wint den wandt bestootende.

+ B

5

Ghelijc die hitte inden dorst alsoo suldi die oproeringhe der vreemder vernederen ende als met een hitte onder een drooghende wolcke, soo suldi dat gheslachte der stercker doen verdwijnen

6

Ende die Heere der heyrscaren sal alle den volcken maken op desen berch eenen maeltijt der vetter, eenen maeltijt van die wijnsnijdinghe, eenen maeltijd der vetten die vol merchs sijn, ⁺der gheclaerder wijnsnijdinghen.

+ C

7

Ende hi sal nederworpen op desen berch het aensicht vanden tsamen ghebonden bant, op alle die volcken, ende die webbe die hy begonst heeft op alle natien.

8

Hy sal die doot ter nederworpen in die eewicheyt, ende die Heere God sal die tranen afnemen van allen aensicht, ende tverwijt van sijnen volcke sal hy wechnemen van tgheheel eertrijc, want die Heere heuet ghesproken.

9

Ende hi sal seggen in dien daghe. Siet dits onse God, wij hebben hem verwacht, ende hy sal ons salich maken. ⁺Dits die Heere, wij hebben hem verbeyt wij sullen ons verhueghen ende verblijden in sijne salicheyt,

+ D

10

want die hant des Heeren sal rusten op desen berch, ende Moab sal ghedorsschen worden daer onder ghelijck dat stroo ghewreuen wort metten dorschwaghen.

11

Ende hy sal zijn handen onder hem wtstrecken ghelijck een swemmere die wtstrect om te swemmen, ende hy sal sijn glorie vernederen, met tsamen staen van sijnen handen.

12

Ende die vasticheden van uwen hooghen mueren sullen neder vallen, ende si sullen vernedert worden, ende sullen neder ghetrocken worden ter eerden totten ghestubbe.