Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiiij. Capittel.

1

⁺SIet die Heere sal die eerde verstroyen, ende hy sal die blooten, ende hy sal haer aensicht quellen, ende hy sal haer bewoonders verstroyen.

+ A

2

Ende tsal zijn ghelijck tvolc alsoo oock die priester ende ghelijck die knecht alsoo oock zijn heere, ghelijck die dienstvrouwe alsoo ooc haer meestersse, ghelijck die coopere alsoo ooc die vercoopt, ghelijc die woekeraer alsoo oock die ontleender, ghelijck die schult wedereyscht so ooc die sculdich is.

3

Met verstroeyinghe die eerde verstroyt worden, ende met beroouinghe salse berooft worden, want die Heere heeft dit woort ghesproken.

4

Die eerde heeft ghetruert ende is veruloten, ende si is cranc gheworden, die werelt is veruloten, cranck is gheworden die hoocheyt van dat volc der eerden.

5

Ende die eerde is besmedt gheworden van haren bewoonders, want si hebben die wetten ouertreden, ⁺sij hebben trecht verandert, sij hebben verstroyt dat eewich verbont,

+ B

6

Daerom sal die vermalendijdinghe die eerde verslinden ende haer bewoonders sullen sondighen, ende daerom sullen haer inwoonders rasen, ende daer sullen luttel menschen ghelaten worden.

7

Die wijnsnijdinghe heeft rouwich geweest, den wijnstruyck is cranck gheworden, si hebben alle ghesucht die blijde van herten waren,

8

Die blijscap der trommelen heeft opghehouden, dat gheluyt der gheender die blijde waren is neder gheleghen die soeticheyt der herpen heeft stil ghesweghen.

9

Sij en sullen metten liedeken den wijn niet drincken, bitter sal den dranck wesen den ghenen die hem drincken.

10

Die stadt der ydelheyt is ontstucken ghebroken alle die huysen zijn ghesloten niemant daer in gaende.

11

⁺Den roep sal opden wijn wesen in die straten alle blijscap is verlaten. Die blijscap der eerden is wechgheuoert.

+ C

12

Woestheyt is in die stadt ghelaten, ende dat iammer sal die poorten verdrucken,

13

Want dese dinghen sullen wesen int midden der aerden int midden der volcken, ghelijc oft een luttel oliuen, die ouerbleuen waren, afgheslaghen worden vanden olijfboom ende die crapdruyuen als die wijnsnijdinghe voleyndt is.

14

Dese sullen hen stemme opheffen ende louen, als die Heere sal gheglorificeert wesen, dan sullen sij iolijdt maken vander zee.

15

Daerom glorificeert den Heere in leeringhen, in deylanden der zee den naem des Heeren des Gods van Israel.

16

Van deynden der eerden hebben wij louen ghehoort, die glorie vanden rechtuerdighen. Ende ic heb gheseyt. Mijn secreet my, mijn secreet my, Wee my, die ouertreders hebben ouer treden, ende met die ouertredinge der ouertreders hebben si ouertreden.

17

Vreese, ende grachte, ende stric, ouer v die een bewoonder der eerden sijt.

18

Ende tsal sijn dat soo wie vliet van die stemme der vreesen, die sal in die grachte vallen, ende wie hem seluen sal gheholpen hebben wter gracht, ⁺die sal ghehouden worden vanden stricke, want die water sluysen van die hoochden sijn openghedaen, ende die fundamenten der eerden sullen tsamen ghestooten worden.

+ D

19

Met een brekinghe sal deerde ghebroken worden, met ontwee wrijuinghe sal die eerde ontwee ghewreuen worden,

20

met een beroeringhe sal die eerde beroert worden, met een scuddinghe sal die eerde ghescudt worden als een droncken mensch, ende si sal wechghenomen worden, als een tabernakel van eender nacht, ende haer boosheyt sal haer beswaren, ende si sal vallen, ende en sal niet daer toe doen om op te staen.

21

Ende tsal sijn in dien dach dat die Heere sal versoeck doen ouer dat heyr des hemels in die hoochde, ende ouer die coninghen der eerden, die op deerde sijn.

22

Ende si sullen verghadert worden in die vergaderinghe van eenen bondel inden poel, ende si sullen daer ghestoten worden inden kerker, ende nae veel daghen sullen sij besocht worden.

23

Ende die mane sal haer scamen, ende die sonne sal bescaemt worden als die Heere der heyrscaren regneren sal opden berch Sion, ende in Ierusalem, ende als hi in daensicht van sijnen ouderen sal gheglorificeert zijn.