Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiij. Capittel.

1

⁺DEn last van Tyrus. Huylt ghy scepen der zee, want het huys is verwoest van daer sij pleghen te comen van dlant van Cethim eest hen gheopenbaert.

+ A

2

Swijcht ghy die int eylandt woont, die de comenschap van Sidon sijt, die ghene die ouer die zee varen hebben v veruult.

3

In veel wateren eest tsaet van Nilus, den oochst des vloets is sijn coren vruchte, ende sij is gheworden die comenschap der Heydenen.

4

Scaemt v Sidon, want die zee seyt, die stercheyt der zee segghende. Ick en heb in barens noo-

[p. *567]

de niet gheweest, ⁺ende ick en heb niet ghebaert, ende ick en heb gheen ionghelinghen opgheuoet, noch ic en heb gheen maechden tot vollen wasdom ghebracht.

+ B

5

Alst ghehoort sal zijn in Egipten, soo sullen sij droeuich sijn als sijt hooren sullen van Tyro.

6

Vaert door die zee, huylt ghy die int eylant woont.

7

En is die niet die uwe, die glorieerde van die voorleden daghen in haer outheyt? haer voeten sullen haer verre leyden om buyten slants te ghaen.

8

Wie heeft dat ghedacht over Tyrum die hier voormaels ghecroont was? wiens coopluyden princen waren ende haer cramers die heerlijcke der eerden?

9

Die Heere der heyrscharen heeft dat ghedacht, dat hy nedertrecken soude die hoouerdie van alle glorie, ende dat hy ter versmaetheyt brenghen soude alle die heerlijcke der eerden.

10

⁺Gaet door v lant als eenen vloet, ghy dochter der zee, ghy en hebt voorts meer gheenen gordel.

+ C

11

Sij heeft haer hant wtghereyct op die zee, si heeft die conincrijcken verstoort. Die Heere heeft gheboden teghen Chanaan dat hy sijn stercke soude vernielen,

12

ende hy heeft gheseyt. Ghy en sult voorts daer niet meer toe doen, dat ghy glorieeren soudt, valsche besculdinghe lijdende ghy maghet dochter van Sidon, in Sethim opstaende vaert ouer die zee, daer en sal v oock gheen ruste wesen.

13

Siet het lant der Chaldeen en heeft sulc volc niet gheweest, Assur heeft haer ghefundeert, in die gheuanghenisse hebben sij sijn vrome ouergheuoert sij hebben zijn huysen ondergrauen, sij hebben haer ghestelt tot een nederuallinghe.

14

Huylt ghy schepen der zee, want v stercheyt is verwoest.

15

⁺Ende tsal wesen in dien dach ende ghy o Tyre sult vergheten sijn tseuentich iaer, ende ghelijck die daghen eens conincs, maer nae tseuentich iaeren salt Tyro wesen als een liedeken van eender hoeren.

+ D

16

Neemt die herpe, gaet omme die stadt ghy vergheten hoere singt wel, herhaelt dicmael het liedeken, dat ws ghedenckenisse si,

17

Ende tsal wesen nae die tesuentich iaren, dat die Heere Tyrum sal versoecken, ende hy sal die wederom brenghen tot haer coopgoet, ende sij sal wederom hoereren, met alle die rijcken der aerden, opt daensicht der aerden,

18

ende haer hanteringhen ende haer coopghelt sullen den Heere gheheylicht wesen, sij en sullen niet opghesloten worden, nocht achterwaerts gheleydt, want den ghenen die voor den Heere woonen, sal haer neringhe sijn, dat die moghen eten tot versaetheyt ende ghecleedt worden tot den ouderdom toe.