Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxij. Capittel.

1

⁺DEn last van die valleye des ghesichts. Wat is v oock dat ghy opgheclommen sijt, ende ghy alle op die daken?

+ A

2

Vol gheroeps, ghy volle stadt, ghy verhuegende stadt, v ghedoodde en sijn gheen ghedoodde metten sweerde, noch ghestoruen in die orloghe.

3

Alle uwe princen sijn te samen gheuloden, ende sij sijn hardelijck ghebonden, alle die daer gheuonden zijn die zijn te samen ghebonden, sij sijn verre wech gheuloden.

4

Daerom heb ick gheseydt. Gaet wech van my, ic sal bitterlijc weenen, en wilt daer niet nae staen dat ghy my soudt vertroosten van die verwoestheyt des dochters mijns volcs,

5

⁺Want den dach der doodinghen ende der vertredinghen ende der weeninghen den Heere den God der heyrscaren in die valleye des ghesichts, ondersoeckende den muer ende grootdadich opden berch.

+ B

6

Ende Elam heeft den pijlkoker ghenomen den waghen des menschen die een ruyter te peerde is, ende den scilt heeft den wandt ghebloot.

7

Ende v wtghecoren valleyen sullen vol waghenen met vier peerden sijn, ende dat peerde volck sal sijnen legher stellen in die poorte.

8

Ende het ouerdecsel van Iuda sal ontdect worden, ende ghy sult sien op dien dach, die wapencamer van dat huys des wouts.

9

Ende die scoeren van Dauids huys suldi sien, want sij veel gheworden zijn, ende ghy hebt verghadert die wateren van die nederste piscijne,

10

ende die huysen van Ierusalem hebdi ghetelt, ende ghi hebt die huysen verdoruen om den muer sterck te maken.

11

⁺Ende ghy hebt eenen poel ghemaect tusschen die twee mueren, ende dwater van die oude piscijne, ende ghy en hebt niet opwaerts ghesien tot hem die dese ghemaect hadde, ende haren wercmeestere en hebdy van verre niet ghesien.

+ C

12

Ende die Heere der heyrscaren sal op dien dach roepen tot weeninghe, ende tot een rouwich gheclach, tot caluheyt, ende tot omgordinghe der sacken,

13

ende siet blijscap ende vruecht, calueren te dooden, ende rammen te kelen, vleesch teten, ende wijn te drincken. Laet ons eten ende drincken want morghen sullen wij steruen.

14

⁺Ende in mijn ooren is ontdect die stemme des Heeren der heyrscaren. Ist dat v vergheuen sal worden dese boosheyt tot daty ghy sterft, seydt die Heere die Godt der heyrscaren.

+ D

15

Dit seyt die Heere die Godt der heyrscaren. Ghaet henen ende ghaet binnen tot hem die int tabernakel woont tot Sobnam den ouerste des tempels, ende ghi sult tot hem segghen.

16

Wat doedi hier? oft als wie sijdi hier? dat ghy v seluen hier een begrauinghe wtghehouwen hebt, ghy hebt in die hoochde een ghedenckenisse naerstelijck wtghehouwen, inden steen een tabernakel voor v.

17

⁺Siet die Heere sal v doen wech draghen ghelijck eenen haen der hinnen wechghedraghen wort, ende als een cleedt soo sal hi v doen opheffen.

+ E

18

Croonende sal hy v croonen met tribulatien, als eenen bal sal hy v worpen in een breedt ende ruym lant, daer suldi steruen ende daer sal den waghen uwer glorien sijn, ghy schandelijcheyt van ws heeren huys.

19

Ende ic sal v wt drijuen van uwer stacien, ende van uwen dienst sal ick v af setten.

20

Ende tsal sijn in dien daghe dat ic sal roepen mijnen knecht Eliacim den sone Helcie,

21

⁺ende ick sal hem cleeden met uwen rocke, ende met uwen gordel sal ick hem verstercken, ende v macht sal ick in sijn hant gheuen, ende hy sal wesen als een vader den ghenen die in Ierusalem woonen, ende den huyse van Iuda.

+ F

22

Ende ick sal den slotel des huys van Dauid gheuen op sijn scoudere, ende hy sal open doen, ende daer en sal niemant sijn die sluyte, ende hy sal sluyten en daer en sal niemant wesen diet open doe.

23

Ende ick sal hem vast maken tot eenen staeck in een ghetrouwe plaetse, ⁺ende hy sal wesen tot eenen stoel der glorien sijns vaders huyse.

+ G

24

Ende sij sullen op hem hanghen alle die glorie van sijns vaders huys, verscheyden manieren van vaten alle cleyn vaetkens, van die vaten der bekers tot die vaten der musijkers.

25

Inden dach seydt die Heere der heyrscaren sal den staeck wechghenomen worden die vast ghemaect was in die ghetrouwe plaetse, ende hy sal ghebroken worden ende vallen, ende tsal verloren gaen, datter aen ghehanghen hadde, want die Heere heuet ghesproken.