Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxi. Capittel.

1

DEn last van die woestijne der zee. ⁺Ghelijck die stormen comen wt den zuytwesten, soo coemt hy van die woestijne, van dat veruaerlijck lant.

+ A

2

Een hart visioen is my ghebootscapt, wie ongheloouich is die doet onghetrouwelijc, ende die een verderuer is die verderft. Climt op ghy Elam. Belegtse ghy Mede, alle sijn suchtinghe heb ic doen op-

[p. *566]

houden.

3

Daerom sijn mijn lendenen met pijne veruult, een bangicheyt heeft my beuanghen als die bangicheyt van een barende vrouwe, ick ben ter neder gheuallen doen ict hoorde. Ick ben heel ontstelt gheweest doen ict sach.

4

⁺Mijn herte is verdwenen, die duysternissen hebben mi heel verbaest ghemaect. Babilon mijn beminde is my ghestelt tot een myrakel.

+ B

5

Stelt die tafel, siet toe in die wachtplaetse, ghietende ende drinckende princen staet op, neemt aen den scilt

6

want dit heeft my die Heere gheseyt. Gaet, ende stelt eenen wachter, ende dat die vercondighe alle dat hy sij.

7

Ende hy heeft ghesien eenen waghen van twee rijders, eenen opclimmer des ezels, ende eenen opclimmer des kemels, ende hy heeft naerstelijck bescouwet met veel aensiens.

8

Ende den leeuw heeft gheroepen op die wachtplaetse des Heeren ben ick, staende ghestadelijc den dach door ende op mijn wachte ben ick staende gheheel nachten.

9

⁺Siet hier coemt een rijdende man op eenen waghen van twee peerde rijders, ende hi heeft geantwoort ende gheseyt. Gheuallen, gheuallen is Babylon, ende alle die ghesneden beelden van haren goden sijn in stucken ghebroken teghen die eerde.

+ C

10

Mijn dorsschinghe, ende mijn dorschuloers dochter tghene dat ick ghehoort hebbe vanden Heere der heyrscaren Israels God, dat heb ick v vercondicht.

11

Den last van Duma. Daer roept een tot my van Seir, Wachter wat ist vanden nacht? wachter wat ist vanden nacht?

12

Die wachter heeft gheseyt. Den morgenstont coemt ende den nacht, ist dat ghy vraecht, soo vraget, keert v om coemt.

13

⁺Den last in Arabien. In die bosscagie des auonts suldi slapen, in die paden van Dedanim

+ D

14

ontmoetende brengt den dorstighen water, die woont int suyden lant, loopt met brooden den vliedende tegen,

15

want van daensicht der sweerden sijn sij gheuloden, van daensicht des aencomende sweerts, van daensicht des ghespannen boochs, van daensicht des swaren strijts,

16

want dit seyt die Heere tot my. Al noch binnen eenen iare als binnen eens huerlincs iaer, ende alle die glorie van Cedar sal wech ghenomen worden.

17

Ende die bleuelinghen van tghetal der stercker schutters van Cedars kinderen sullen ghemindert worden, want die Heere Israels Godt heuet ghesproken.