Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

1

⁺VVee den lande van die cimbale der vloghelen, dat daer is ouer die vloeden van Morianen lant,

+ A

2

dat in die zee boden sendt, ende in vaten van pampier op die wateren. Gaet henen ghi rassche enghelen totten wtgherecten ende ghescoorden volcke, totten veruaerlijcken volcke, nae dwelcke gheen ander en is, totten wachtende ende vertreden volcke, wiens vloeden haer lant berooft hebben.

3

Alle ghy bewoonders der werelt die op daertrijc woont alst teeken opghehauen sal worden op die berghen suldijt sien, ⁺ende tgheclanck des trompets suldi hooren,

+ B

4

want dit seyt die Heere tot my. Ick sal rusten, ende ick sal aenmercken in mijn plaetse, ghelijck dat middaechs licht claer is, ende als een volcke des dauws in die daghen des oochsts,

5

want voor den oochst is

[p. *565]

hy gheheel wt ghebloeyet, ⁺ende die onrijpe volcomenheyt sal wtspruyten, ende sijn taxkens sullen affghesneden worden met sickelen, ende die achterghelaten worden, sullen affghesneden, ende wtgheslaghen worden.

+ C

6

Ende sij sullen tsamen ghelaten worden den voghelen der berghen, ende den beesten der aerden, ende door eenen eewigen somer sullen op hem die voghelen wesen, ende alle die beesten der aerden sullen op hem winteren.

7

⁺In dien tijt sal een ghifte ghebrocht worden den Heere der heyrscaren, vanden wtghetrocken ende ghescoorden volcke, vanden veruaerlijcken volcke, na dwelc gheen ander gheweest en heeft, vant verwachtende ende vertreden volcke, welcs vloeden haer lant berooft hebben, totter plaetsen vanden naem des Heeren der heyrscaren, den berch van Sion.

+ D