Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel.

1

⁺DEn last van Egipten. Siet die Heere sal climmen op een lichte wolcke, ende hi sal comen in Egipten, ende die afgods beelden van Egipten sullen tsamen beroert worden van sijn aensicht ende therte van Egipten sal verdwijnen int midden van haer.

+ A

2

Ende ic sal die Egiptenaers teghen die Egiptenaers te gader doen loopen, ende een man sal strijden teghen sijnen broeder, ende een man teghen sijnen vrint ende deen stadt teghen dander stadt, deen rijck teghen dander rijck.

3

Ende den gheest van Egipten sal verscoort worden in sijn binnenste inghewant, ende sijnen raet sal ick ter neder worpen, ende sij sullen vraghen hen afgods beelden, ende hen waersegghers, ende die waersegghende duyuels binnen hebben, ende die tooueraers.

4

Ende ick sal Egipten leueren in die handen der wreeder heeren, ende een sterck coninc sal heerscappie ouer hen hebben, seyt die Heere, die Godt der heyrscaren.

5

Ende dwater sal verdrooghen vander zee, ende den vloet sal verlaten worden, ende verdrooghen.

6

⁺Ende die vloeden sullen vergaen, die riuieren der dijcken sullen vermindert worden ende verdroocht. Dat riet ende die biesen sullen verdwijnen,

+ B

7

den gront van die riuiere sal ghebloot worden van sinen oorspronck, ende alle vochticheyt des ghesaeyt saets sal verdroocht worden tsal verdorren, ende ten sal niet sijn.

8

Ende die visschers sullen trueren ende sij sullen alle droefheyt maken die den visch haec inden riuier worpen, ende die het net wtspraeyen ouer daensicht der wateren sullen verdwijnen.

9

Sij sullen bescaemt worden die int vlas wrachten, vlechtende ende weuende subtijle wercken.

10

Ende haer waterachtige plaetsen sullen verdorrende sijn, alle die putten maecten om visschen te vanghen.

11

Dwaes sijn die princen van Taphneos, die wijse raetslieden van Pharao hebben onwijsen raet ghegheuen, hoe segt ghy tot Pharao. Ic ben een kint der wijser, een kint der ouder coninghen?

12

Waer sijn nv v wijse? laetse v vercondighen, ende v te kennen gheuen wat die Heere der heyrscaren ghedacht heeft ouer Egipten.

13

⁺Dwaes sijn gheworden die princen van Taphneos die princen van Nemphis sijn verdwijnt, sij hebben Egipten bedroghen, den hoeck van sijnen volcken.

+ C

14

Die Heere heeft int midden van henlieden ghemenghet den gheest der swijmelinghen, ende sij hebben Egipten doen dolen in alle sijn werck, ghelijck een droncken ende brakende mensch doelt.

15

Ende Egipten en sal gheen werck hebben, dwelck een hooft make ende eenen steert nederbuyghende, ende bedwinghende.

16

In dien dach sal Egipten wesen als vrouwen, ende sij sullen verbaest sijn ende vreesen van daensicht der beroerten vander hant des Heeren der heyrscaren, die hy roeren sal op haer.

17

Ende dlant van Iuda sal Egipten wesen tot een veruaertheyt, alle die des ghedachtich sal wesen, die sal hem verscroomen van daensicht des raets des Heeren der heyrscaren, den welcken hy ghedacht heeft ouer haer.

18

In dien dach sullen daer vijf steden wesen int lant van Egipten, sprekende die tale van Chanaan, ende swerende byden Heere der heyrscaren. ⁺Die stadt der sonnen sal deen ghenoemt worden.

+ D

19

In dien dach sal daer eenen outaer des Heeren sijn int midden des lants van Egipten, ende den tytel des Heeren by haer pale,

20

ende dien sal wesen tot een teeken, ende een ghetuyghenis den Heere der heyrscaren int lant van Egipten, Want sij sullen roepen totten Heere van daensicht des gheens diese quelt, ende hy sal hen senden eenen salichmaker, ende vooruechtere diese verlosse.

21

Ende die Heere sal ghekent worden van Egipten, ende die Egiptenaren sullen den Heere kennen, in dien dach, ende sij sullen hem goddelijcke eere bewijsen met slachofferanden ende ghiften, ende sij sullen den Heere gheloften ghelouen, ende betalen.

22

Ende die Heere sal Egipten met een plaghe slaen ende hy sal haer ghenesen, ende sij sullen wederkeeren totten Heere, ende hy sal met hen vernoecht worden, ende hy salse ghenesen.

23

In dien dach sal daer eenen wech wesen van Egipten tot die Assiriers, ende die Assirier sal in Egipten comen, ende die Egiptenaer in die Assiriers. Ende die Egiptenaren sullen Assur dienen.

24

In dien dach sal Israel die derde sijn den Egiptenaer ende den Assirier, een ghebenedijdinghe int midden der eerden

25

welck die Heere der heyrscaren ghebenedijt heeft, segghende. Ghebenedijt sij mijn volck van Egipten ende dwerck mijnder handen den Assirier, maer mijn erffenisse is Israel.