Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺SEndt wt Heere het lam den heerschapper der aerden, vanden steen der woestijnen totten berch der dochter van Sion.

+ A

2

Ende hy sal sijn als eenen vliedende voghel, ende als ionghe voghelkens wten nest wech vlieghende, alsoo sullen die dochteren van Moab wesen inden doorganc van Arnon.

3

Aengaet den raet, versaemt den raet, stelt als inden nacht v scaduwe inden middach, bergt die vliedende, ende die dwalende en melt niet.

4

By v sullen mijn vluchtighe woonen, Moab weest hen verberghinge voor des verderuers aensicht, want het ghestubbe is voleynt, ⁺die allendighe is ten eynde ghebracht, hy is ontbroken die deerde betredde.

+ B

5

Ende den richters stoel sal in die bermherticheyt bereydt worden, ende hy sal daer op sitten in die waerheyt in Dauids tabernakel ordeelende ende soeckende het ordeel ende haestelijc gheuende dat recht is.

6

Wij hebben ghehoort die hoouerdie van Moab, hy is seer hoouerdich, sijn houerdie ende sijn vermetelijcheyt ende sijn verbolgentheyt is meerder dan zijn stercheyt.

7

Daerom sal Moab huylen, tot Moab, hy sal altemael huylen, den ghenen die hen verblijden, opden muer vanden ghebacken steenen spreect sijn plaghen,

8

want die voorsteden van Hesebon sijn verwoest, ⁺ende den wijngaert van Sabama hebben die heeren der Heydenen affghehouwen, haer rancskens sijn tot Iazer ghecomen, sij hebben ghedoelt in die woestijne, zijn rancken sijn verlaten gheweest, sij zijn ghegaen ouer die zee.

+ C

9

Daer ouer sal ic screyen in die weeninghe Iazer den wijnghaert van Sabama, ick sal v droncken maken met mijnen tranen Hesebon ende Eleale, want ouer uwe wijnsnijdinghe, ende ouer uwen oochst is die stemme der treeders gheuallen.

10

Ende die blijscap ende dat verhueghen sal affghenomen worden vanden Carmelus, ende in die wijngaerden en sal hi niet verhueghen noch iolijt maken, den wijn en sal hi in die persse niet treden, ⁺die dien plach te treden, die stemme der treeders heb ick wechghenomen.

+ D

11

Daer ouer sal mijnen buyck tot Moab als een herpe gheluyt maken, ende mijn inghewant totten muer vanden ghebacken steenen.

12

Ende tsal zijn, alst openbaer wesen sal dat Moab gearbeyt heeft op sijn hoochden, dat hy sal inghaen tot sijn gheheylichde plaetsen om te bidden, ende hy en sal des niet vermoghen.

13

Dat is dwoort dat die Heere ghesproken heeft tot Moab van doen.

14

Ende nu heeft die Heere ghesproken segghende. Binnen drij iaren als die iaren van eenen huerlinc sal die glorie van Moab wechghenomen worden ouer alle dat veel volck, ende tsal ghelaten worden cleyn ende weynich, in gheender manieren vele.