Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

DEn last van Moab, ⁺want des nachts Armoab verwoest is, soe heeft sij gheswegen, want des nachts den muer, van Moab verdoruen, soe heeft sij ghesweghen,

+ A

2

Dat huys is opgheclommen ende Dibon tot die hoochden om te weenen ouer Nabo, ende ouer Medaba sal Moab huylen. In alle sijn hoofden sal caluheyt wesen, ende alle baert sal ghescoren worden.

3

⁺In haer drijsceydighe weghen sijn sij omgort met sacken, op haer daken ende in haer straten is alle ghehuyl nederghedaelt tot weeninghe

+ B

4

Hesebon ende Eleals sal roepen, tot

[p. *564]

Iasa toe is hen stemme ghehoort, daer ouer sullen die bereydde ten strijde van Moab huylen, haer ziele sal tot haer seluen huylen.

5

Mijn herte sal tot Moab roepen, ⁺haer hantboomen tot Segor, die veerse van drij iaren, want door den opganc van Luith salse weenende opgaen, ende inden wech Oronaim sullen sij het gheroep der droeffenisse opheffen,

+ C

6

Want die wateren Nemrim sullen verlaten wesen, want het cruyt is verdroocht, dat groeytsel is vergaen, alle groenicheyt is verstoruen.

7

Nae die grootheyt des wercs is oock hen versoecken, ⁺tot die beke der wilghen sullen si hen leyden,

+ D

8

want dat gheroep sal ommegaen die pale van Moab, tot Ballim sal sijn ghehuyl sijn, ende totten put Elim is sijn gheroep,

9

Want die wateren van Dibon sijn met bloet veruult, want ick sal op Dibon meerderinghen stellen den ghenen die van Moab vlieden sullen den leeuwe, ende den bleuelinghen des lants.