Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺HEt is by dat sijnen tijt come, ende sijn daghen en sullen niet langhe wtgestelt worden. Want die Heere sal Iacobs ontfermen, ende hy salder noch verkiesen van Israel, ende hy salse doen rusten op hen eerde, die vreemdelinck sal tot hen versaemt worden, ende hy sal den huyse van Iacob aencleuen.

+ A

2

Ende die volcken sullense houden, ende sij sullense aen brenghen tot in hen plaetse, ende thuys van Israel salse besitten op die eerde des Heeren tot knechten ende dienstvrouwen, ende sij sullen wesen vanghende die ghene die hen gheuanghen hadden, ende sij sullen hen verscatters tonderbrenghen.

3

Ende tsal wesen in dien dach als die Heere v sal rust ghegheuen hebben van uwen arbeyt, ende van uwer fortsen, ende van den harden dienst, waer mede ghi te vooren ghedient hebt,

4

dat ghy sult opnemen dese parabele teghen den coninck van Babilonien, ende segghen. ⁺Hoe heeft die verscatter opghehouden? hoe heeft den tribuyt gherust?

+ B

5

Die Heere heeft heel in stucken ghebroken den stock der ongoddelijcker, die roede van die heerscappende,

6

die volcken slaende met onwerdicheden, met een ongheneselijcke wonde, die Heydenen tonderbrenghende in rasender gramscappen wredeelijck veruolghende.

7

Alle eertrijck heeft gherust ende stil gheweest, sij heeft blijde gheweest, en haer verhuecht,

8

die abeel boomen sijn oock blijde gheweest ouer v, ende die ceederboomen van Libanus, van dat ghy gheslapen hebt soo en isser niemant opghecomen, die ons affhouden soude.

9

Die helle beneden is verstoort gheweest ten ontmoete van uwer toecomste, sij heeft v die ruesen verwect. Alle die princen der eerden sijn opghestaen van haren stoelen, alle die princen der natien.

10

Sij sullen alle gader antwoerden ende tot v segghen. ⁺Ghy sijt oock ghewont ghelijck wy, ons ghelijck sijdi gheworden.

+ C

11

V hoouerdie is totter hellen toe nederghetrocken, v doot lichaem is neder gheuallen, onder v sal die motte ghestroyt worden, ende v decsel sullen wormen sijn.

12

Hoe sijdi vanden hemel gheuallen Lucifer, die smorghens vroech op ginct? hoe sijdi nedergheuallen ter aerden ghy die de Heydenen wondet?

13

die in v herte seydt. Inden hemel sal ick opclimmen, bouen Godts sterren sal ick mijnen stoel verheffen, ick sal sitten opden berch des testaments, in die noort sijden.

14

Ick sal climmen bouen die hoocheyt der wolcken, ick sal ghelijck wesen den alderhoochsten.

15

Maer nochtans soo suldi ter hellen neder ghetrocken worden in die diepte des poels.

16

Die v sien sullen, ⁺die sullen hen tot v neyghen, ende v van verre aensien. En is dit niet die man die daertrijc verstoort heeft, die den conincrijcken ghewelt ghedaen heeft,

+ D

17

die de werelt verwoest ghestelt heeft, ende haer steden verdoruen, ende haren gheuanghenen en heeft hy den kercker niet open ghedaen?

18

Alle die coninghen der Heydenen sijn allegader ontslapen in glorie, een ieghelijck man in sijn huys.

19

Maer ghy sijt verworpen van uwen graue, als een onnutte plante, besmet, ende omwonden metten ghenen die ghedoot sijn metten sweerde, ende die nederghedaelt sijn, tot die fundamenten des poels, als een verrotte doode prije.

20

Ghy en sult gheen gheselscap hebben oock niet met hen in die begrauenisse, want ghy hebt v lant bedoruen, ghy hebt v volck ghedoodt. ⁺Inder eewicheyt en sal niet ghenoemt worden het saet der alderquaetsten.

+ E

21

Bereyt zijn kinderen ter doodinghen om haerder vaderen ongherechticheyt, sij en sullen niet opstaen, noch sij en sullen die eerde niet beeruen, noch sij en sullen daensicht van der werelts steden niet veruullen.

22

Ende ick sal ouer hen opstaen seyt die Heere der heyrscaren, ende ick sal te niet doen den naem van Babilonien, ende die bleuelinghen, ende dat spruytsel, ende tgheslachte, seyt die Heere.

23

Ende ick salse stellen tot een erffenisse des eghels, ende tot broeken der wateren, ende ick salse vaghen met den besseme wryuende seyt die Heere der heyrscaren.

24

⁺Die Heere der heyrscaren heeft ghesworen segghende, Eest dat niet zijn en sal als ick ghemeynt hebbe, ende ghescieden alsoo ict metter herten ouerleydt hebbe.

+ F

25

Dat ick den Assirier vernielen sal in mijn lant, ende op mijn berghen hen vertreden, ende sijn iock sal van hem affghenomen worden, ende sijnen last sal van hen scoudere ghenomen worden.

26

Dats den raet dien ick ghedacht hebbe ouer alle dlant, ende dit is die wtghestrecte hant ouer alle die Heydenen.

27

Want die Heere der heyrscaren heuet gheordineert, ende wie salt moghen van onweerden maken? ende sijn hant is wtghesteken, ende wie sal die affkeeren?

28

Int iaer doen die coninck Achaz ghestroruen is, soe is desen last ghesciedt.

29

En verblijdt v niet ghy gheheel lant van Philisthijm, ⁺want die roede van uwen slagher is in cleyn stucken ghebroken, want van der slanghen wortele sal eenen Basiliscus wtcomen, ende sijn saet verslindende den voghel.

+ G

30

Ende die ierste gheborene der armen sullen ghevoedt worden, ende die arme sullen met betrouwe rusten, ende ick sal doer den hongher v wortel doen vergaen, ende v bleuelinghen sal ick dooden.

31

Huylt ghy poorte, roept ghy stadt, gheheel Philistheen lant is neder gheworpen. Want vanden noorden sal den roock comen, ende daer en is gheen die sijn scare ontvlieden sal.

32

Ende wat salmen antwoerden den boden des volcs? Dat die Heere heeft Sion ghefundeert, ende daer in sullen die arme sijns volcs hopen.