Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺DEn last van Babilonien, den welcken ghesien heeft Isaias Amos sone.

+ A

2

Op den neuelachtighen berch heft op dat teeken, verheft die stemme, heft op die handt, ende laet die vorsten in die poorten gaen.

3

Ick heb mijnen gheheylichden beuolen, ende ick heb mijn stercke gheroepen in mijn gramscappe, hen verhueghende in mijn glorie.

4

Die stemme der menichten is op die berghen, als van veel volcs, een stemme der coninghen ende der vergaerder Heydenen. Die Heere der heyrscaren heeft beuolen der ruyterscap der orloghen,

5

comende van verren lande van die wterste des hemels. Die Heere ende die vaten van sijn rasende gramscap, om te verderuen alle dlant.

6

Huylt, want den dach des Heeren is nae by, als een verwoestinghe sal hy vanden Heere comen.

7

Daer om sullen alle handen lam worden, ende alle menschen herte sal verdwijnen,

8

ende in stucken ghewreuen worden. Stercten ende pijnen sullen hen beuanghen, ⁺als een barende vrouwe sullen sij pijne lijden, een ieghelijck sal tot sijnen naesten verbaest sijn verbrande aensichten sullen hen aensichten sijn.

+ B

9

Siet den dach des Heeren sal comen wreet, ende vol van verbolghentheden, ende gramscappen, ende rasende toren om die aerde te stellen in verwoestheden, ende om haer sondaers te vernielen van haer.

10

Want die sterren des hemels ende haer scijnsel en sullen hen licht niet wtspraeyen, die sonne is verduystert in haren opganck, ende die mane en sal niet blincken in haer licht.

11

Ende ick sal versoeck doen op die quaden der werelt, ende teghen die ongoddelijcke hen boosheyt, ende ick sal doen rusten die houerdie der ongheloouigher, ende die vermetelijcheyt der stercker sal ick vernederen.

12

Costelijcker sal een man sijn dan gout, ende een mensch dan fijn ghesuyuert gout.

13

Daer ouer sal ick den hemel verstooren, ende die eerde sal beroert worden van haer plaetse, ⁺om die verbolghentheyt des Heeren der heyrscaren, ende om den dach van die gramscap sijns rasende torens.

+ C

14

Ende tsal wesen als een vliedende dasken, ende ghelijck een scaep, ende daer en sal niemant sijn die vergadere, een ieghelijck sal hem tot sijn volck keeren, ende sij sullen elck tot hen lant vlieden.

15

Alle die gheuonden wort sal ghedoodt worden, ende alle die ouercoemt sal doert sweert vallen.

16

Hen cleyn kinderen sullen doodt ghestooten worden voor hen ooghen, hen huysen sullen berooft worden, ende hen huysvrouwen sullen gheschent worden.

17

Siet ick sal op hen verwecken die Meden, die gheen siluer en sullen soecken, noch gout en sullen willen,

18

maer met pijlen sullen sij die cleyn kinderen dooden, ende den suyghenden kin-

[p. *563]

deren vanden buyck en sullen sij niet ontfermen, ende op die kinderen en sal hen ooghe niet sparen.

19

⁺Ende Babilon die gloriose onder die conincrijcken heerlijck in die houerdie der Chaldeen sal wesen ghelijck die Heere omgheworpen heeft Sodomam ende Gomorrham.

+ D

20

Sy en sal niet bewoont worden tot ten eynde toe, ende sij en sal niet ghefundeert worden van tgheslachte tot gheslachte, noch die Arabier en sal daer sijn tenten niet stellen, noch die herders en sullen daer niet rusten.

21

Maer daer sullen beesten rusten, ende hen huysen sullen vol draken worden, ende daer sullen struysen woonen, ende die ghehaerde wildemans sullen daer springhen,

22

en die wlen sullen malcanderen teghen roepen in haer huysen, ende die meerminnen in die tempelen der wellusticheden.