Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺VVee den ghenen die ongherechtighe wetten maken, ende die scrijuende hebben onrechtuerdicheyt ghescreuen,

+ A

2

dat sij int recht die arme verdrucken souden, ende ghewelt doen der saken van die ootmoedighe mijns volcs, dat die weduwen souden haren roof zijn, ende dat sij die weesen beroouen souden.

3

Wat suldi doen inden dach des ondersoeckens, ende der allenden die van verre coemt? tot wiens helpe suldi vlieden? ende waer suldi v glorie laten,

4

dat ghy niet ghebuycht en wort onder den bant, ende dat ghy metten ghedoodden niet en valt? Op alle dese dinghen soo en is zijn rasende gramscap niet affghekeert, maer noch is zijn handt wtghestrect.

5

Wee Assur hy is die roede mijnder rasender gramscap, ende den stock is hy, ⁺in haer lieder hant is mijn verbolghenheyt.

+ B

6

Totten bedrieghelijcken volcke sal ick hem seynden, ende teghen tvolck van mijnder rasender gramscap sal ick hem beuelen dat hy affneme die roouen, ende dat hy den roof rooue, ende stelle dat tot een vertredinghe als tslijck der straten.

7

Maer hy en salt alsoo niet achten, ende zijn herte en salt alsoo niet meynen, maer zijn herte sal wesen om heel te vernielen, ende tot doodinghe van vele volcs.

8

Want hy sal segghen,

9

En zijn mijn princen oock niet te samen coninghen? En is Calano niet alsoo ghelijck Charcamis? ende en is Emath niet alsoo ghelijck Arphad? En is Samaria niet alsoo ghelijck Damascus?

10

Ghelijck mijn hant gheuonden heeft die rijcken des affgodts, alsoo zijn hen affgods beelden van Ierusalem ende van Samarien.

11

⁺En sal ick niet, ghelijck ick Samarien ende haren affgoden ghedaen hebbe, alsoe oock doen Ierusalem ende haren affgods beelden?

+ C

12

Ende tsal zijn als die Heere sal volbracht hebben alle zijn wercken opden berch Sion, ende in Ierusalem, sal ick besoecken op die vrucht van dat grootdadich herte des conincs Assur, ende op die glorie van die hoocheyt zijnder ooghen.

13

Want hy heeft gheseyt, In die stercheyt van mijnder handt heb ict ghedaen, ende in mijn wijsheyt heb ict verstaen, ende ick heb wtghenomen die palen der volcken, ende hen princen heb ick berooft, ende ick heb ter neder ghetrocken als machtich, die int hooghe saten.

14

⁺Ende mijn hant heeft als eenen nest gheuonden die stercheyt der volcken, ende ghelijck die eyeren vergadert worden die verlaten zijn, alsoo heb ick alle dlandt vergadert, ende daer en heeft niet een gheweest die den vloghel roerde, ende den beck open dede, ende teghen creesch.

+ D

15

Sal een bijl glorieren teghen hem die daermede houwet? oft sal een saghe haer opheffen teghen hem daer sij aff ghetrocken wort? ghelijck oft een roede haer ophief teghen hem diese opheft, ende dat eenen stock hem verhief, die emmer een hout is.

16

Daer om sal die heerscappende Heere der heyrscaren, in zijn vette een magherheyt seynden, ende onder zijn glorie onsteken sal sij bernen als een berninghe des viers.

17

Ende dlicht van Israel sal wesen int vier, ⁺ende zijn heylighe in die vlamme, ende die sal ontsteken worden, ende zijn dornen ende bramen sullen onsteken ende verslint worden op eenen dach.

+ E

18

Ende die glorie van zijn bosschagie, ende van zijnen carmelus sal van die ziele totten vleesche verteert worden, ende hy sal van veruaertheyt vluchtich wesen.

19

Ende die bleuelinghen van die houten zijnder bosschagien sullen om die luttelheyt ghetelt worden, ende een kint salse scrijuen.

20

Ende tsal wesen op dien dach, dat het ouerblijfsel van Israel, ende die ghene die ghevloden zijn van Iacobs huys, voerts niet meer stuenen en sullen opden ghenen die hen slaet. Maer het sal stuenen op den Heere den heylighen van Israel in die waerheyt.

21

Die bleuelinghen sullen bekeert worden, die bleuelinghen (seg ick) van Iacob tot Godt den stercken.

22

Want eest dat v volck Israel wesen sal als dat sandt vander zee, soo sullen die bleuelinghen daer aff bekeert worden.

⁺Een vercorte voleyndinghe sal oueruloedige rechtuerdicheyt brenghen.

+ F

23

Want een voleynden ende vercortinghe sal die Heere die Godt der heyrscaren maken int midden van alle der eerden.

24

Daer om dit seyt die Heere die Godt der heyrscaren. En wilt niet vreesen mijn volck bewoonder van Sion van Assur, metter roeden sal hy v slaen, ende zijnen stock sal hy op v heffen inden wech van Egypten.

25

Want noch een weynich, ende een luttelken, ende mijn verbolghentheyt, ende mijn rasende gramscap sal voleynden ouer hen groot misdaet.

26

Ende die Heere der heyrscaren sal ouer hen verwecken een gheessele, na die plaghe van Madian in die steenroetse Oreb, ende zijn roede op die zee, ende hy sal die opheffen in den wech van Egypten.

27

Ende tsal wesen in dien dach dat zijnen last aff ghenomen sal worden van uwer scoudere, ende zijn iock van uwen halse, ende dat iock sal verrotten van daensicht der olien.

28

⁺Hy sal comen in Aiath hy sal doergaen in Magron by Machmas sal hy sijn vaten beuelen.

+ G

29

Sy sijn haestelijck doer ghegaen. Gabaa is onsen stoel Rama is verbaest gheweest. Sauls Gabaath is ghevloden,

30

briescht met uwer stemmen ghy dochter van Gallim, Kenmerct Laisa ghy arme Anathoth.

31

Medemena is verhuyst ghy bewoonders van Gabim wort versterct.

32

Het is noch dach datmen in Nobe staen mach. Hy sal zijn handt roeren opden berch der dochter van Sion, opden hueuele van Ierusalem.

33

Siet, die heerscapper de Heere der heyrscaren sal dat fleschken breken met veruaertheden, ende dlanck ghewassen hout der hoochden sal affghehouden worden ende die hooghe sullen verneerdert worden.

34

Ende die dicte der bosschagien sullen aff ghehouwen worden metten yser, ende Libanus sal met die hoochden vallen.