Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺INden iersten tijt is ghelicht geweest het lant van Zabulon, ende dlant van Nephthali, ende ten laetsten is beswaert gheweest den wech der zee ouer die Iordane, van Galilee der Heydenen.

+ A

2

Het volck datter wandelde, in duysternisse heeft een groot licht ghesien, den ghenen die int lantscap van die scaduwe des doots woonen es dlicht opghestaen.

3

Ghy hebt het volck vermenichfuldicht, maer ghy en hebt die blijscap niet groot ghemaect. Sy sullen hen voer v verblijden, ghelijck die hen verblijden in den oochst, ghelijck hen die verwinders verhueghen als sij den roof ghenomen hebben, als sij die roouen wtdeylen.

4

Want het iock van sijnen last, ende die roede zijnderscouderen, ende den scepter zijns verscatters hebdi verwonnen, als in den dach van Madian.

5

Want alle gheweldighe roouinghe es met gheruchte, ende dat cleedt met bloede ghemengt sal wesen ter verbrandinghen, ⁺ende een spijse des viers.

+ B

6

Want een cleyn kindeken es ons gheboren, ende een sone is ons ghegeuen, ende die heerscappie is gheworden op zijn scoudere, ende zijnen naem sal ghenoemt worden wonderlijck, raetsman, Godt, sterck, vader der toecomender werelt, Prince des vreedts.

7

Sijn heerlijcheyt sal vermenichfuldicht worden, ende des vreedts en sal gheen eynde wesen. Op den stoel van Dauid, ende op zijn rijck sal hy sitten, om dat te vestighen ende te verstercken doert ordeel, ende in rechtuerdicheyt, van nu voerts, ende tot inder eewicheyt. Die heete liefde des Heeren der heyrscaren sal dat doen.

8

Een woert heeft die Heere ghesonden in Iacob, ende tis gheuallen in Israel.

9

Ende alle tvolck van Ephraim salt weten, ⁺ende die te Samarien woonen, in houerdie ende grootheyt des herten segghende,

+ C

10

Die ghebacken steenen zijn gheuallen, maer wy sullen met viercante steenen timmeren, sij hebben die wilde vijchbomen affghehouwen, maer wy sullen daer voer ceder boomen veranderen.

11

Ende die Heere sal die vianden van Rasin verheffen bouen hem, ende zijn vianden sal hy in een gheruchte keeren

12

Syrien vanden oosten, ende die Philistijnen vanden westen, ende sij sullen Israel verslinden met gheheelen monde. In alle dese dinghen, soo en is zijn rasende gramscap niet affghekeert, maer sijn hant hant is noch wtghestrect,

13

⁺ende mijn volck en is niet wederghekeert tot den ghenen die hem slaende is, ende den Heere der heyrscaren en hebben sij niet versocht.

+ D

14

Ende die Heere sal vernielen van Israel thooft ende den steert, den nederbuygher ende den bedwingher op eenen dach.

15

Die oude van veel iaren ende die eerlijcke dese is thooft, ende die Propheet leerende loghenen dese is den steert.

16

Ende die ghene die dit volck salich maken hen verleydende, ende die voer salich ghepresen worden, sullen neder ghestort worden.

17

Daer om en sal die Heere niet blijde zijn op sijn ionghelinghen, ende zijnder weesen ende weduwen en sal hy niet ontfermen. Want een ieghelijck es een Hypocrijt, ende een scalck, ende alle mont heeft sotheyt ghesproken. In alle dese dinghen en is zijn rasende gramscap niet affghekeert, maer zijn hant is al noch wtghestrect.

18

Want die ongoddelijcheyt is als een vier ontste-

[p. *561]

ken, sij sal bramen ende dornen verslinden, ende sij sal ontsteken worden in die dicte der bosschagien, ende sal te samen ghewonden worden in die houerdie des roocs.

19

In die gramscap van den Heere der heyrscaren is die eerde verstoort, ende tvolck sal wesen als een spijse des viers. Die man en sal sijnen broeder niet sparen.

20

Ende hy sal affwijcken ter rechter handt, ende sal hongher lijden, ende hy sal eten aen die rechte handt, ende niet versaet worden. Een ieghelijck sal tvleesch van sijnen arm verslinden, Manasses Ephraim, ende Ephraim Manassen, sij te samen teghen Iudam.

21

In alle dese dinghen en is sijn rasende gramscap niet affghekeert, maer zijn handt is noch wtghestrect.